條女有鳩而我冇賓周: 24

「既然你咁鍾意曦銘，咁我就幫下手啦。」浩俊對曦銘喺月伶心目中嘅位置仍然抱有一絲希望，佢果斷地Whatsapp召喚對方嚟打機。

浩俊：打機？月伶喺度
曦銘：OK!

曦銘一見到月伶嘅名就充滿活力，佢不加思索就加入到月伶同浩俊所在嘅隊伍中。

「曦…曦銘早晨！」月伶一見到曦銘嘅存在就心如亂麻，聲線間帶住顯而易見嘅慌張。此時此刻嘅佢內心好似倒瀉咗樽調味料咁，對曦銘嘅出現又驚又喜，同時妒忌阿桃同曦銘之間嘅關係。

驚驚：啱啱肚痛所以唔喺度，你哋講到邊？



穎怡揞住胃咁行返去睡房，估唔到自己俾腸胃折磨嘅期間咁快就齊人。佢望到月伶、曦銘，同阿桃一言不發嘅模樣，已經預想到一陣會有場腥風血雨嘅戰爭。

「一叫曦銘嚟打機佢就即刻on，真係好。」月伶嘅視線停留喺阿桃嘅icon度，露出羨慕嘅眼神。

「開game啦喂！」曦銘罕有地開mic講嘢打破僵局，雀躍嘅聲線帶動場內嘅氣氛。原本仍然坐立不安嘅月伶亦都冷靜落嚟，曦銘溫柔嘅聲線就好似鎮靜劑咁撫平佢焦慮嘅心情。

阿桃：曦曦，我哋幾時再出街啊( つ•̀ω•́)

浩俊諗住以其人之道還治其人之身，既然月伶故意拎佢同驚驚約會嘅事去刺激自己，咁自己都冇必要再客氣落去。



「小姐，你太年輕了。」月伶不屑咁喺內心取笑對方，阿桃唔係以為佢會介意曦銘同對方單獨出街啊？

平日月伶一向不乏追求者，佢對於同異性出街已經慣以為常，普通朋友之間出去行吓又點會影響到佢心態呢？

「咩啊～我早排先去完你屋企咋喎！」曦銘似乎仲喺狀況外，直率咁回答道。

「屋…屋企！？」月伶頭上剎那間行雷閃電，佢不可置信咁「下」咗一聲。

究竟知道咗自己男神去另外一個女仔嘅屋企係咩感受呢？月伶冇辦法準確描述自己嘅心情，佢呆若木雞咁停咗喺度，無言以對。



月伶想像到曦銘一臉寵溺咁摸住另外一個女仔嘅頭，兩個人坐喺梳化上面你儂我儂，佢愈諗心入面就愈難受。

睇嚟月伶同曦銘之間嘅距離比想像中更加遙遠。

阿桃​：阿月嗰邊點解會咁靜嘅？

浩俊見月伶一時間默不作聲，篤定佢肯定係俾曦銘嘅說話嚇親。

「冇，冇諗過你哋會咁熟啫。」月伶吞咗啖口水，成個人已經失去一開始洋洋得意嘅氣勢。

阿桃：點解咁講呢？我都冇諗過你同驚驚咁熟啦～
阿桃：尋日你哋二人世界喎

抱住報復心態嘅浩俊一口氣咁將自己嘅不滿發洩出去，故意將月伶同驚驚之間嘅關係變得含糊不清。



「哦…原來你同驚驚係呢種關係？」曦銘突然出聲講道，浩俊嘅一番說話令佢對驚驚同月伶嘅關係另眼相看。

曦銘莫名其妙地失望起嚟，但係佢清楚自己冇權去干預人哋嘅感情生活。

畢竟曦銘只不過係月伶嘅一個師兄。

「件事唔係咁嘅—」月伶聽到曦銘語氣嘅變化，焦急咁解釋道：「咁啱約出街咋…」

「唔緊要架，我明！」曦銘尷尬咁笑住打圓場：「我打完呢場有啲嘢做，遲啲再一齊玩。」

「…好。」月伶欲言又止，佢恨不得即刻同曦銘解釋一切嘅來龍去脈。

「其實驚驚根本就係女仔嚟—」月伶內心吶喊道：「我淨係想同你二人世界咋…」



曦銘見月伶冇再解釋落去，令佢更加肯定月伶同驚驚之間嘅關係唔簡單。佢重重咁嘆咗一口氣，冇諗過今日同月伶一齊打嘅第一場遊戲就要面對翻天覆地嘅轉變。

「件事唔係好似你諗咁架…」

「冇嘢啦！你唔使擔心我點諗嘅！」曦銘嘗試以最自然嘅語氣掩飾自己嘅情緒。

曦銘喺場遊戲完咗嘅嗰一刻即刻退出隊伍，月伶感覺自己就快壓抑唔住就快湧出嚟嘅眼淚，同時登出遊戲，想一個人靜下。

​穎怡默不作聲咁旁觀完場鬧劇，發現自己愈嚟愈摸唔透阿桃嘅心態。點解佢要特登令曦銘誤會自己同月伶嘅關係？

驚驚：點解要咁做？

喺另外一邊，浩俊嘅心情同樣地消沉。佢望住驚驚嘅質問，選擇㩒熄螢幕，唔想面對現實。

「我究竟係發生咩事？」



一直性格木訥嘅浩俊從來未試過有咁大嘅情緒起伏— 佢唔單止會在乎一個人有冇搵佢，更加會為咗對方同其他人爭風呷醋，啱啱甚至一氣之下令曦銘同月伶之間產生咁大嘅誤會。