條女有鳩而我冇賓周: 25

曦銘登出咗遊戲後垂頭喪氣咁除低耳機，佢對於啱啱嘅情緒起伏感到困惑，點解自己會咁介意呢？

佢挨喺張電腦凳上望住天花板發吽哣，明明自己啱啱先起身，但只不過係打咗一舖機就心力交瘁。

可能係瞓得唔夠？一向充滿活力嘅曦銘好少會喺其他人面前露出自己嘅疲態，甚至係負面情緒。佢合埋眼，嘗試去平息心煩意亂嘅內心。

佢腦海浮現嘅第一個畫面係幾年前嘅月伶，起初月伶喺補習班入面係橫行霸道嘅大魔王，雖然佢樣貌標緻，但係成日都面色陰沉，散發住生人勿近嘅氣場。

而曦銘同月伶嘅性格南轅北轍，佢無時無刻嘴邊一直掛住溫暖嘅笑容，喺人哋眼中係平易近人嘅學長。



曦銘當時對月伶最深刻嘅印象就係佢嗰條馬尾— 當曦銘注意到月伶不斷偷望自己嗰邊嘅方向，佢就會好奇咁望返過去。一旦月伶同曦銘嘅眼神互相交匯，月伶就會即刻擰轉頭，若無其事咁做返自己嘅練習。

當曦銘仲擔心緊同月伶會唔會相處到嗰陣，月伶見到曦銘嘅嗰一瞬間就眉開眼笑咁同佢傾訴自己學業上嘅難題。

月伶嘅反差令曦銘頓時呆咗呆，原來令人聞風喪膽嘅大魔王笑起嚟係可以咁人畜無害。

可能係因為月伶嘅氣場過於強勢，得自己願意去接近佢，所以佢先對自己咁好，曦銘喺內心解釋道。

月伶總係可以激發曦銘嘅保護欲，曦銘亦都樂於給予額外嘅關心俾對方，然而永遠都點到即止。



每一次月伶同曦銘分享自己嘅心事嗰陣，曦銘都會摸一摸對方嘅頭去安慰佢，而月伶就會抬起頭，用意味深長嘅眼神望住曦銘。

即使曦銘開始感覺到月伶對自己抱住曖昧不明嘅感情，佢仍然選擇視若無睹，刻意保持距離。

到底係出於對後輩嘅照顧，定係其他更複雜嘅情感呢？實際上曦銘連自己對月伶嘅感覺都未搞清楚。

嗰種只不過係對前輩嘅仰慕，又或者係日久生情— 曦銘不斷咁搵各種各樣嘅藉口去解釋月伶嘅少女情愫。

曦銘仲記得當佢中學畢業後返到補習社嘅嗰一日，月伶握緊拳頭保證自己一定做到佢嘅大學師妹。佢嗰陣笑住咁話會等月伶，仍然唔敢認真看待對方嘅誓言— 挑燈夜讀從來唔係月伶嘅風格，佢考到先再算啦。



喺兩個人冇再見面嘅期間，曦銘都有聽過月伶身邊不乏追求者，甚至有佢同其他男仔交往嘅傳聞。

曦銘知道自己喺月伶嘅心目中只不過係曇花一現，佢鬆咗一口氣嘅同時，內心卻產生咗一絲空虛感。

同時間，曦銘唔知道月伶同其他人拍拖只係為咗沖淡自己對曦銘嘅思念。曦銘唔知道嗰一年半內月伶無時無刻都同放棄嘅念頭作鬥爭，認真讀書對月伶而言唔容易。

曦銘唔知道每一次月伶處於半途而廢嘅邊緣嗰陣，月伶都會㩒開曦銘嘅Instagram尋求慰藉。只要一望到曦銘多姿多彩嘅大學生活，月伶總會幻想自己可以名正言順咁坐喺曦銘隔籬一齊上堂，同曦銘一齊返學，同曦銘一齊食飯。

只要係曦銘，月伶都會不顧一切，重新埋首於自己最厭惡嘅書籍之中。

於是一年半後月伶遵守諾言，出乎意料地考入曦銘就讀嘅大學，兩個人順理成章咁相約一齊返學。

「曦銘！」月伶一見到曦銘就綻開燦爛嘅笑容，一路小跑到曦銘嘅隔籬。曦銘怔怔咁企咗喺度，因為太緊張嘅關係而一動不動。

「恭喜你啊！」曦銘滿面笑容咁恭賀月伶，佢哋終於又重新變返師兄同師妹嘅關係。



佢滿心歡喜咁計劃自己一定要同月伶介紹邊一間canteen好食，邊一個course係大伏。曦銘有千言萬語堆積喺自己內心深處，但係佢總係講唔出口。

月伶會唔會覺得自己好煩？自己會唔會做多咗？

「我係咪好叻呢？」月伶得戚咁側一側頭嘅時候，曦銘發現月伶中學時紮嘅高馬尾已經放返落嚟，以往傲慢嘅眼神亦蕩然無存。

佢係成熟咗啫，大個咗識打扮自己，陌生咗好正常。曦銘又再一次搵藉口解釋月伶嘅變化。

「係呀。」曦銘習慣性咁抬起手，打算摸落月伶嘅頭。但當佢手掌去到喺月伶頭髮上方嗰陣停咗下，曦銘突然遲疑不決起嚟。

月伶會唔會已經有男朋友呢？摸頭會唔會太曖昧？

最後曦銘輕輕咁拍咗一下月伶嘅頭就作罷，月伶隨即詫異咁望向曦銘。而曦銘隨即避開對方嘅視線，不知所措咁四圍望。



只不過係短短嘅一年半，月伶唔再係嗰個隨心所欲嘅師妹，曦銘不得不承認對方已經變成一個亭亭玉立嘅女人。

自從嗰一日起，有一種無形嘅壓力喺度催促曦銘要儘快面對段關係。只要曦銘仍然未整理好自己嘅感情，佢每一次同月伶相處嘅時間都好似跑馬燈咁飛快掠過。

儘管如此，曦銘依舊有意無意咁逃避現實。一切直到啱啱佢親耳聽到月伶同其他人約會嘅嗰刻，曦銘嘅心情剎那間跌到落谷底，嗰種空虛感再一次油然而生。

曦銘重新擘大眼望住天花板，記憶中嘅月伶瞬間煙消雲散。原來月伶嘅身影一直留喺自己嘅內心深處，自己對佢嘅真情實感亦未曾變淡。

「我真係廢。」曦銘自嘲道，佢懊惱咁雙手抱頭，後悔自己唔願意同月伶坦誠相對。

放喺枱上嘅手機突然「叮」一聲響起，曦銘好奇咁解鎖螢幕，就見到月伶send過嚟嘅message。

月伶：其實我同驚驚係普通朋友咋

曦銘如釋重負咁揞住面，腦海中再一次浮現月伶笑住咁向自己行過嚟嘅情景。



「今次我唔會再咁懦弱。」曦銘堅定咁講道，佢嘅視線停喺手機上面。

曦銘：你呢幾日得唔得閒？我哋搵日一齊出街？

今次，佢一定會勇敢咁同月伶坦白從寬。