條女有鳩而我冇賓周: 29

月伶嘅腦隨住曦銘嘅一句話「轟」一聲炸開咗，佢不可置信咁直視面前一臉真誠嘅人。

唔係為咗見最完美嘅我？咁即係點？即係佢唔介意我今日皮膚咁差？

點解佢要對我咁溫柔？月伶有一刻以為自己發緊夢，以往嘅對象都係因為佢嘅外貌而加以追求，以致月伶對自己嘅樣貌甚至有種淡淡嘅壓力。

而家曦銘意外地一下子撫平佢嘅擔憂，就好似……

曦銘根本就唔在意自己嘅外表咁。



月伶內心糾結咗幾秒，隨口搵咗個理由：「怕我喺你心目中嘅形象會就咁冇咗吖嘛～」佢望咗一眼面前嘅人，自卑咁耷低頭用手捉緊裙擺，原本熨得服服帖帖嘅百摺裙已經俾月伶搞到皺晒。

佢唔敢諗太多，曦銘一向對人都咁好，佢只不過係曦銘眾多朋友中其中一個渺小嘅存在。

「已經識咗咁耐啦喎，喺我面前可以做返自己。」曦銘除低口罩，抿起嘴角，用手指指住嘴邊嘅一粒瘡：「今日唔止你一個咁慘㗎。」

點解曦銘要拎自己粒瘡嚟安慰我？月伶哭笑不得，內心嘅窘迫感逐漸消散。

佢果然冇鍾意錯人。



「點比啊！」月伶同時除低口罩，兩邊面微微泛紅：「你仲有得用口罩遮住喎！」佢委屈咁望住曦銘，比起自己額頭嗰粒嘢，曦銘所講嘅根本就係微不足道嘅問題。

兩個人所嗌嘅嘢食好快就到咗，月伶此時此刻仍然感覺成件事好唔真實，曦銘啱啱竟然不厭其煩咁安慰自己。

明明月伶已經唔係第一次同異性食飯，唯獨係對住曦銘嗰陣就冷靜唔到，緊張到好似行緊鋼線咁。

佢抬頭望向日夜思慕嘅心上人。

曦銘一副滿足嘅樣喺度享受緊面前嘅All-day breakfast，佢支叉移到薯仔上方嗰陣突然停咗下，面有難色咁講道：「月伶，不如你幫我一個忙…」



月伶「嗯」咗聲，即刻將薯仔拮到自己嘅碟上。

記憶中曦銘好似唔會揀飲擇食㗎喎，點解而家突然就好似同薯仔有仇咁嘅？月伶皺起眉頭，對曦銘嘅變化感到疑惑。

「之前去朋友屋企食薯仔食到有陰影…」曦銘一臉歉意咁笑道：「你唔想食嘅話可以由佢。」曦銘一諗起上次喺浩俊屋企食嘅芫茜釀薯仔就打咗個冷震。

月伶嘴角嘅笑意頓時僵住咗，最近佢對於「朋友屋企」呢幾隻字極其敏感，尤其係由曦銘講出嚟嗰陣令佢更介懷。

佢嘅思緒又亂成一團，心入面忍唔住諗起阿桃當初講過曦銘上過自己屋企嘅事。

孤男寡女共處一室……月伶覺得自己激動到就快可以一拳打爛隔籬嘅玻璃。

月伶按捺不住好奇心，佢脫口而出：「你講嘅朋友係咪阿桃？」

點解要咁衝動啊！！點解要咁多事啊！！！月伶問完嘅下一秒就開始後悔，佢明明冇資格去過問曦銘嘅私事。



「係啊，你好介意咩？」曦銘理所當然咁答道，令坐喺對面嘅月伶欲哭無淚。

點解要問呀！明知故問有意思咩！月伶內心責怪上一秒嘅自己。

明知自己聽完會唔開心，點解仲要問呢？

但係佢的確好介意…

月伶嘅好奇心再一次戰勝理性，佢抬起頭：「冇聽過你會上女仔屋企吖嘛，所以對你哋兩個之間嘅關係有啲好奇…」

點解要咁明顯啊！月伶恨不得當場摑醒自己。

「女仔？」曦銘嘅聲音充滿疑惑。



點解佢會問返自己轉頭嘅？

「係呀，你啱啱唔係話去過阿桃屋企咩？」月伶反問。

曦銘忽然哦咗出聲，好似領悟到一啲嘢咁。喺夕陽嘅照耀下。佢淺棕色嘅眼帶住淡淡嘅笑意，令月伶再一次望得出神。

呢個時候唔好發花痴住！月伶搖一搖頭，佢一定要搞清楚件事先。

「阿桃唔係女仔咩？」月伶問道。

天色漸暗，顯得曦銘嘅面孔更加溫柔。

「理論上我唔應該講嘅—」曦銘慢條斯理咁講道：「但係見係你，我就澄清返個誤會先。」

好柒啊…我而家顯得自己好小器。月伶心虛咁耷低頭飲果汁，手指撫摸住玻璃杯上冰涼嘅水滴。



「其實阿桃唔係女仔。」

月伶口中嘅果汁一瞬間哽住喉嚨。

「你之前咪喺學校撞到我同浩俊嘅？」曦銘思考片刻，繼續講道：「浩俊咪係阿桃囉！」