條女有鳩而我冇賓周: 45

一場家庭聚會輕易地耗盡一切精力，穎怡喺送走最後一個親戚出門口後，嘴上僵硬嘅笑容一下子就跌落嚟，連臉上嘅肌肉好似都笑得酸酸地。

一連串聚會就好似強迫人戴上面具咁，利用強顏歡笑去掩飾千篇一律嘅寒暄同爾虞我詐。

不論係同公會嘅朋友一齊打邊爐，定係面對三姑六婆，穎怡每一次都會感到筋疲力盡。要喺現實生活中無時無刻扮演住唔同嘅角色實在係強人所難，如果係打機嘅話，攰就可以走，唔耐煩就可以熄咗變聲器露出真面目。

要過住隨心所欲嘅生活太難，要遇到包容到自己最真實嗰面嘅人亦未免太癡心妄想。

十一點，時間尚早。穎怡嘅面部肌肉疲憊不堪，面無表情地坐喺電腦面前，登入英雄聯盟，計畫打一兩舖機就瞓。



事與願違，穎怡收到浩俊嘅組隊邀請，佢嘆咗口氣。無論此時此刻嘅穎怡對社交活動有幾抗拒都好，最後都係選擇接受對方。

「做咩啊？」穎怡已經提唔起聲線，連變聲器都懶得開，任由疲倦嘅聲音傳入浩俊耳中：「我唔會玩太耐，好攰。」

仲諗住問佢今日嘅事添。浩俊仍然對穎怡身邊嘅男人耿耿於懷，但一聽到穎怡沒精打采嘅聲線，就不由自主地擔心起嚟。

但一拖再拖只會延長煎熬，亦只會令自己不斷胡思亂想。浩俊最終決定跟從內心想法。

「今日喺你隔籬嗰個人係—」浩俊熄咗變聲器，用最真實嗰面對住穎怡，小心翼翼地問道：「你男朋友？」



死啦，點解會咁直接？穎怡會唔會覺得我太多事？單刀直入嘅問題不單冇解開心中死結，更加令浩俊後悔起嚟。

「哦。」穎怡輕笑一聲，估唔到浩俊竟然對呢件事產生好奇心：「嗰個我阿叔嚟。」

原本自己仲諗緊要唔要同浩俊解釋當時嘅勾肩搭背，原來對方都有同樣嘅疑問。穎怡伸咗個懶腰，漫不經心地望出窗口。

此時此刻窗外嘅景色同一開始遇見浩俊時嘅天氣截然不同，漆黑夜空掛起點點星火，浩俊嘅樣貌忽然喺腦海中一閃而過，穎怡回想起一開始被對方吸引住嘅原因— 當時浩俊凝視自己嘅時候，眼裡偶爾明亮得恍如有星星。

「係呀？」浩俊如釋重負，放下心頭大石咁鬆咗一口氣：「仲諗住問你男朋友知唔知你做網絡人妖添。」



浩俊同時間擰轉頭望向窗外夜色，感覺今晚嘅天氣格外清爽。

「如果拍拖嘅話，我應該唔會話俾另一半知。」穎怡頓咗頓，認真思考起浩俊嘅問題：「佢應該唔會理解，同埋又唔一定會接受到，所以寧願唔講。」

唔係個個都會接受到自己每一面，穎怡平淡地望住遊戲中自己所用嘅男仔icon，鍾意我現實生活中嗰面唔代表會鍾意我喺網絡世界中嘅形象。

「但係戴住咁多面具，唔會攰咩？」浩俊彷彿將自己同樣為網絡人妖嘅事拋諸腦後：「我以為拍拖應該喺對象面前做返最真實嘅自己。」

「你今日咁多嘢講嘅？」穎怡發現喺網上嘅浩俊更加健談，突然靈機一觸，開口問道：「你有冇拍過拖㗎？」

穎怡忽然好奇起浩俊嘅感情生活，到底一碌木會唔會有七情六慾呢？浩俊鍾意人嗰陣會唔會都係嗰個生人勿近嘅樣？

「冇。」浩俊言簡意賅地答道，話就話聽過唔少道理，但實踐嘅經驗幾乎係零。

於是浩俊唔甘心地問返轉頭：「咁你有冇？」



「冇。」

「咁你講經咩。」浩俊突然笑出嚟，磁性嘅聲音刺激住穎怡嘅耳膜，剛才嘅疲倦彷彿一掃而空。

微妙嘅情緒隨住對方嘅笑聲油然而生，穎怡捽一捽眼，感覺係因為太攰嘅關係所以諗太多。