條女有鳩而我冇賓周: 46
氣溫一夜驟降到接近單位數，冬天終於原形畢露，月伶盤住腳坐喺電腦凳上，用被褥重重包圍起自己，雙手喺枱上瑟瑟發抖。
如果唔係小明佢哋三番四次約我打機，我根本就唔會落床。下腹附近嘅疼痛令月伶生不如死，恨不得即刻變性做男人，唔需要再受經痛折磨。
碰巧屋企僅存嘅止痛藥又冇晒，唯有用生命值硬接呢位親戚。
「香港濕凍世界真係第一。」隊伍仍未配對到對手，月伶等到開始唔耐煩，忍唔住細細聲咁抱怨起嚟。
正值天寒地凍之時，子宮彷彿受熱漲冷縮影響，凍到縮埋一嚿，更加似有雨點般嘅拳頭打落去咁。
「係咩？都唔係好凍啫～」嘉琪把聲喺耳邊響起，嬌滴滴嘅語氣令月伶心情倍加煩躁。
論陰陽怪氣你真係可以拎第一名。月伶懶得同對方理論，默默咁拎起隻杯一飲而盡。
口中熱水淡而無味，令月伶不禁希望面前放住一杯甜蜜蜜嘅熱朱古力。
「咁又係。」穎怡聲線中充滿鄙夷：「連西伯利亞人都唔夠你嚟。」
「真。」浩俊一反常態，突然出聲附和穎怡。
月伶望住兩個冇再開變聲器嘅人，發現有種微妙嘅違和感。
「啊～」嘉琪見寡不敵眾，刻意打咗個喊路：「唔好意思啊，我尋晚打到好夜。」
「係咩？」月伶隨口答道：「同邊個打啊？」
「唔知呢？」嘉琪輕笑道。
一股寒風由窗口吹入房間內，月伶打咗個冷震。
月伶漫不經心地㩒入嘉琪嘅遊戲紀錄一探究竟，結果表情隨即凝結起嚟。
點解佢尋晚會同曦銘打到凌晨三點幾嘅？點解我會唔知嘅？
月伶忽然覺得異常地熱，熊熊怒火直接令體溫直線上升。
「月伶？」穎怡深諳不妙，小心翼翼地試探道：「你仲喺唔喺度？」
「我今日唔舒服—乞嗤！」月伶把聲變得格外虛弱，突如其來嘅乞嗤令陣痛變本加厲。
枱上熱水不知不覺間變涼，啱啱想飲甜嘢嘅欲望已經消失得無影無蹤。
「我唔玩啦。」月伶言簡意賅地講道，下一秒就退出隊伍。
雖然月伶深知「呢個世界唔係男就係女」嘅道理，自己冇可能任性地要求曦銘同身邊異性斷絕來往，但嘉琪……
先唔講嘉琪擺明別有用心，自己明明已經因為嘉琪嘅事同曦銘表達過不滿，佢係咪轉個頭就失憶？
曦銘今次仲唔係明知故犯？！
只要一諗起嘉琪刻意討好曦銘嘅神情，月伶就恨不得用一把火將周遭一切燒毀。
要同交際草拍拖真係難過登天— 月伶根本唔知道自己喺曦銘心目中嘅地位係咪獨一無二。
不如你殺咗我啦— 月伶又嬲又無奈，一拳打落張被度發洩。結果因為太大動作，反而令不適感加劇。
明明自從「早晨」事件後，兩個人都平安無事咁過得好地地。到底係咪自己對曦銘嘅期望太高？點解偏偏要撞中特別燥底嘅日子嚟激自己？
月伶無力地陷入層層棉被之間，目光呆滯地望向天花板發吽哣，連軟綿綿嘅床都無法融化一切煩躁同心灰意冷。
房間內悄然無聲，直到一把尖銳鈴聲划破靜止嘅空氣，佢擰轉頭，發現係曦銘嘅來電顯示。
「唔聽。」月伶鬥氣咁無視電話，想將自己隔絕於世界之外。只要唔聽、唔睇、唔諗，就會無事嘅。
可惜呢種方法只能夠維持十五分鐘，月伶發現自己根本不斷咁轉緊牛角尖。喺鈴聲停落嚟嘅嗰一刻，佢就緊張地擰轉身拎起電話。
曦銘：我買咗啲嘢俾你，你方唔方便落嚟樓下拎？
嗰條係十分鐘前send過嚟嘅Whatsapp，即係曦銘已經喺出面等咗咁耐？月伶不加思索地跑出門口。
曦銘著住一件啡色長褸企咗喺路邊，一望到月伶就滿眼溫柔咁望向對方。
「點解你喺度嘅？」「點解你著得咁少嘅？」兩個人同時發問，曦銘憂心忡忡咁望住衣著單薄嘅月伶，毫不猶豫就將對方擁入懷抱間，生怕佢會凍病。
「我—」心跳驟然停止，溫暖嘅氣息一瞬間將寒冷驅散，月伶不可思議地抬頭望向曦銘，被猝不及防嘅擁抱嚇得一時語塞。
「點解你唔聽電話嘅？」曦銘問道，喺懷抱間嘅月伶睇落嬌小玲瓏，輕易地激起自己嘅保護欲。
因為一聽到你把聲就會心軟囉。月伶內心抗議道，啱啱啖氣已經唔爭氣咁消咗一半。
到底要唔要直接同曦銘講好呢？怕佢會覺得自己無理取鬧，但唔講嘅話肯定會有第二次喎…
真係忍一時激撚親自己，退一步益鳩埋人地呀！
「你覺得呢？」月伶刻意反問道。
「對唔住，我真係唔擅長拒絕人，當時仲要有其他人喺度…」曦銘一臉歉意道。
「咁如果下一次網聚佢同你有身體接觸嘅話，你係咪又因為唔識點拒絕就俾佢食住上？」月伶今次唔接受曦銘嘅解釋，左手隔住冷衫用力捏落對方嘅胸口上。
曦銘痛得「啊」咗聲，隨即摸向啱啱被捏到嘅位置。
「係咪好痛？呢個就係我啱啱嘅感受。」月伶面無表情道：「你同嘉琪打機都算，仲要唔同我講。」
「唔會再有下次啦。」曦銘重新抱住月伶：「對唔住。」
曦銘嘅懷抱好似有魔力咁，一下子令人放下戒心。然而月伶突然感覺到有啲熱熱地嘅嘢掂住背脊，好奇地擰轉頭。
「我買咗熱朱古力同止痛藥俾你。」曦銘察覺到月伶嘅動靜，即刻解釋道：「但好似企得太耐，所以已經冇咁熱。」
月伶喺曦銘手中拎起杯朱古力，未飲已經覺得甜入心扉。
「點解要特登過嚟呢？」月伶已經嬲唔落對方，心頭一熱，伸手抱返面前嘅人：「今日咁凍。」
「啱啱浩俊同我講你有啲唔對路。」月伶嘅擁抱令曦銘心跳加速：「我好擔心你。」
原來浩俊都可以咁敏銳，一開始仲以為佢係碌木添。月伶對浩俊不禁改觀起嚟，下定決心要請返餐飯。
但此時此刻，出pool飯已經唔係重點，佢只想好好享受同曦銘相處嘅時間。
對月伶而言，曦銘嘅擁抱彷彿係幸福嘅來源，只有佢先可以安撫到自己躁動不安嘅內心。
「其實今日都唔係好凍啫。」月伶無厘頭咁自言自語道。
「係咩？」曦銘將下巴輕輕放喺月伶頭頂上。
有你就唔凍。月伶冇講出口，笑意盈盈咁挨喺曦銘心口旁，聽住對方嘅心跳聲，雙手不知不覺地抱得更緊。