條女有鳩而我冇賓周: 48

落雨嘅時候莫名地令穎怡有種不安感，尤其係手無寸鐵咁企喺室外，睇住月伶同曦銘擔起同一把遮離開嗰陣，穎怡只能夠同浩俊你眼望我眼，尷尬咁企喺原地。

遮就得一把，人就有兩個。穎怡將手伸出簷篷外，雨水將指尖淋濕，涼意瞬間湧滿內心— 今次仆街了，唔通真係要同浩俊用同一把遮？— 今次仆街了，唔通真係要同浩俊用同一把遮？唔通要真人上演愛情小說入面嘅情節？

雨點四處飄飛，穎怡嘅頸巾無助咁隨風搖曳，雙手緊張地縮成一團，沾濕手心。

過咗幾分鐘，浩俊擰轉身打開把遮：「你要唔要同我…」

霹靂啪啦嘅雨聲蒙蔽雙耳，穎怡根本聽唔到下半句，下意識地提高聲音：「下？」



浩俊眼神閃過一絲不滿，然後拍一拍穎怡嘅膊頭催促道：「你係咪唔使用遮呀？」

對方厚實溫暖嘅手將寒意驅散，穎怡聳咗聳膊頭就跑到浩俊身旁：「說話講得好聽啲會死㗎？」

浩俊仍舊面無表情，一言不發咁將把遮傾斜到穎怡嗰邊，任由右邊膊頭被淋濕。

平日同朋友聚會後返屋企嘅路線係一場心理戰，撞到同路人一齊返去意味住要搵話題去緩解尷尬嘅氣氛。

喺嗰一刻，穎怡終於意識到海螢比以往更加早返去嘅原因— 逃避雖可恥但有用。



話就話穎怡唔怕同人再傾多陣偈，但對住浩俊時偏偏莫名其妙地周身唔自在，唯有指一指前方：「我屋企過幾條街就到。」

浩俊輕輕「嗯」咗聲，腳步愈嚟愈慢，有意無意咁遷就穎怡嘅步速，亦都係因為想延長呢段時間。

雨勢突然加大，上天似乎想將醞釀已久嘅情緒一下子盡數發洩，毫無遮攔地灑向人間，今次連穎怡嘅膊頭都無可避免地遭殃。

「行近啲。」浩俊見到穎怡凍得打咗個冷震，下意識抬起手打算搭住對方嘅膊頭拉返去把遮底，但隻手去到穎怡膊頭上方嗰陣，浩俊突然剎咗車。

死啦，穎怡會唔會覺得我太隨便就同異性有身體接觸？會唔會反感？型同柒只有一線之差，浩俊唔想因一時衝動令穎怡對自己有所誤會。



於是浩俊隻手就尷尷尬尬咁懸浮喺穎怡上面，想搭落去但又唔夠膽實行。如果俾曦銘見到應該會笑到自己面黃。

「你唔覺得啱啱曦銘完全被月伶食住上咩？」穎怡似乎冇發現背後隻手，一心想擺脫尷尬嘅氣氛，自顧自地打開話題。

一諗起啱啱曦銘對住月伶一臉無奈嘅樣嗰陣，穎怡就忍唔住耷低頭笑咗出聲。想當初月伶喺對方面前仍舊係一隻人畜無害嘅小白兔，而家竟然直接拋低所有包袱。

但點解會咁勇敢呢？穎怡內心不禁疑惑起嚟，點解會咁肯定對方會鍾意最真實嘅自己呢？

「係—」浩俊頓咗頓：「但如果係我嘅話一定唔會咁做，對女朋友唔應該太縱對方。」

一聽就知佢講緊經。穎怡反咗個白眼，抬起頭凝視浩俊：「你有冇試過鍾意人架？」

鍾意人嗰陣一定會想將最好嘅一面展現俾對方睇，將最好嘅嘢通通獻俾對方，就連對方話想要月亮嗰陣都會恨不得連成個宇宙都送俾佢。而而家面前呢條友竟然話唔會太縱對象？！做佢條女真係慘。

浩俊冇出聲，靜靜回望過去，同穎怡四目交投。生得好睇果然有特權，唔想答就直接用眼神殺死對方— 穎怡一對上浩俊嗰對眼嗰陣就唔爭氣咁怕醜起嚟。



條友望乜鳩啊？穎怡移開視線，先發現浩俊喺不知不覺間換咗隻手去拎住把遮，用左手揸唔係會更加方便咩？穎怡不禁喺內心問道。

咁浩俊隻左手做緊啲咩？穎怡瞬間意識到自己左邊膊頭上空嘅小劇場，心跳一秒間加速起嚟。

佢隻手想點呀？穎怡思緒亂成一團，對浩俊呢種小心翼翼嘅動作感到不解又驚喜。

「算啦，你成碌木咁—」穎怡最後決定扮唔知情，若無其事咁數落浩俊：「你又點會明。」

可能因為係戴住口罩同頸巾嘅關係，穎怡感覺連呼吸都變得困難起嚟，抬起頭呼吸下新鮮空氣嗰陣，忽然見到一架貨車迎面而來。

貨車快得誇張，毫不猶豫地帶住一層水花潑落穎怡身上，剎穎怡一個措手不及。

「屌！」穎怡望住自己半個身都濕晒，上一秒嘅心情隨即一掃而空。



愛情小說中嘅情節果然都係幻想出嚟嘅— 穎怡無奈地諗道，這些浪漫的機會不是屬於我的。