條女有鳩而我冇賓周: 47

十二月廿九號 夜晚七點

大排檔人聲鼎沸，上班族無一高談闊論自己刻薄嘅上司，連身旁侍應都忍唔住插上幾句嘴，令餸菜上面多咗幾滴調味料。

但係喺月伶穎怡一行人嗰邊，不但無人留意到今日格外晶瑩剔透嘅炒菜心，張枱更加鴉雀無聲，出奇地低氣壓。

穎怡同浩俊面面相覷，回想起十分鐘前嘅事就頭都大埋。

「月伶你想食咩啊～」曦銘湊近月伶，連望住對方嘅眼神都特別溫柔。



「無所謂啊～」月伶托住腮擰轉頭望向曦銘，四目之間甜膩得令穎怡別開眼神，唔想再俾人閃盲自己對狗眼。

穎怡百無聊賴地打量坐喺隔籬嘅浩俊，對方碰巧著咗白恤衫牛仔褲，看似隨意嘅打扮實際上正中萬千少女下懷— 邊個喺學生時代唔會對靚仔學長遐想聯翩啊！！

好睇係好睇，只不過有啲似曾相識咁解……穎怡仔細端詳浩俊，發現對方着住白恤衫嗰陣有種莫名其妙嘅熟悉感。

但亦都可能係諗太多，穎怡擰一擰頭，可能係之前放學去得太多網吧，見得太多學生打機，所以先會有呢種錯覺。

「你望乜鳩？」浩俊不善嘅聲線喺穎怡頭上響起，更加拎起電話喺穎怡眼前揈咗揈：「你咁樣我好難唔誤會你當時係偷拍我。」



穎怡望得出神，一時間反應唔切，視線放咗落眼前電話，發覺原來浩俊一直睇緊Instagram。

「喂你ig係咩？」穎怡無視浩俊上一秒嘅挑釁，直接轉移話題。眼見浩俊㩒到去自己profile嗰陣，穎怡發現對方嘅Instagram就係當時謎一般嘅lhc_0110。

「點解你唔俾我follow嘅？」穎怡記得當初request浩俊嗰陣距離而家已經差唔多有成個月，對方竟然一直都冇accept自己！

「我平時唔係成日睇ig…」浩俊正打算解釋嘅時候，突然被曦銘嘅聲線打斷。

「你手撕雞唔要、水煮魚唔要、避風塘炒蟹都唔要—」曦銘聲線中透出濃濃無奈：「咁你想食啲咩？」



手撕雞？水煮魚？？穎怡愈聽愈尷尬，笑容凝結喺嘴邊。

月伶同曦銘就叫咩餸爭論咗好一段時間，話就話月伶一直都話無所謂，但曦銘似乎忽略咗一個重點— 月伶唔食得辣。

月伶默不作聲，雙眼寫滿失望。明明係識咗至少四年嘅人，點解連自己最基本嘅取向都會唔記得呢？

尋日啱啱先好返，但今日又因為另一件事而產生矛盾…月伶扶住額頭輕輕嘆咗口氣：「你係咪唔記得我食譚仔都要嗌清湯。」

係喎屌。曦銘如夢初醒，終於意識到原來自己又開始花式自殺，佢挨去月伶膊頭上面：「對唔住啊～」

「算啦唉我負責叫啦。」穎怡無奈地搶過餐牌，決定幫手揸主意。

月伶凝視住挨喺膊頭想嗲自己嘅曦銘，個心已經軟咗落去，但仍然伸手喺曦銘嗰邊輕力打咗拳以發洩不滿。

自從穎怡接手之後就乾淨俐落地解決咗問題，啲飯餸到咗之後大家就直接大快朵頤。唯獨月伶不時望向曦銘嗰邊，手中嗰杯檸檬茶今日零舍酸澀。



「我就嚟要去消委會投訴隔籬嗰個貨不對辦。」月伶見其他人食得七七八八，開始開起玩笑：「啱啱真係激死我。」

有冇諗過我先要去投訴你…？一開始一臉人畜無害，冇諗過原來係大魔王。曦銘內心作抗議，但唔敢講出口。

「我可唔可以借你把遮返屋企？」坐喺對面嘅海螢望咗望窗外細雨，突然出聲問道。

「哦！你拎啦！」穎怡毫不猶豫就答應對方，以免海螢俾屋企人鬧個狗血淋頭，絲毫冇諗過自己一陣點返去。

咦？咁咪即係一陣可以用同一把遮？喺隔籬睇電話嘅浩俊表面上保持住雲淡風輕嘅表情，心跳反而逐漸加速。