一月初氣溫跌到接近冰點,公園內棵棵枯木樹冠稀疏,穎怡摸一摸頭殼頂,感覺兩者有異曲同工之妙。

果然唔可以成日捱夜。

穎怡自從除夕夜後都冇再出街,繼一個星期嘅頻繁聚會後,今個星期反而顯得空蕩蕩。除咗因為想回氣之外,亦因為穎怡唔知道點面對浩俊。

只要一經過公園,穎怡就會諗起浩俊厚實溫暖嘅手掌,然後就係對方嗰句「你幾多日冇洗頭?」

浩俊條問題唔單止係對自己衛生意識嘅恥辱,更加一下子摧毀穎怡喺公會嘅名譽。



穎怡自問冇潔癖,但每日洗頭係基本喇係咪?

就算穎怡屋企係用儲水式熱水爐嘅西伯利亞人,都未至於驚到頭都唔洗啦係咪??

件事已經返唔到轉頭,穎怡第二日就喺Payme收到胖虎嘅一蚊,下面訊息寫住「一人出一蚊資助牙怡買洗頭水」。

「乜我個頭真係好油咩?」穎怡擰轉身望向窗口嘅倒影,忍唔住再摸一摸個頭。

如果係人哋講嘅,穎怡大可以一笑置之。始終公道自在人心。



但出自浩俊把口就令人不知不覺地在意起嚟。

「喂你唔好趁死咗先嚟照鏡喇!」耳機中傳嚟月伶不滿嘅聲線:「你就嚟復活啦大佬!」

「咁多日冇洗頭係易污糟啲嘅—」嘉琪又開始陰陽怪氣。

穎怡反咗個白眼,繼續專注於遊戲中。

如果唔係同胖虎打機,你仲會有機會喺度出聲咩?



穎怡咁大個人都係第一次俾異性摸頭— 習慣網戀嘅人對身體接觸確實係比較少經驗。

當時浩俊明明唔似係想拍蚊… 亦可能係因為穎怡下意識放慢咗對方嘅動作。

就好似細個睇愛情片會放慢男女主角咀落去嘅一瞬間咁—

浩俊嘅舉動無疑係隕石撞地球,毫無先兆地向穎怡嘅心臟給予重重一擊。

「牙怡,你月中有咩做?」曦銘突然問道。

「冇呀,咪開sem囉。做咩?」

「阿俊一月十號生日喎。」曦銘似乎話中有話,緩緩解釋道:「有冇諗住一齊幫佢慶祝?」

點解又係浩俊嘅?實際上穎怡自從除夕夜起腦海就充斥住浩俊嘅身影,就快連收到對方一個message都要大驚小怪。



「哦。好呀。」穎怡語氣平淡,輕輕咬住嘴唇思考起對方嘅禮物。

今日係一月三,距離浩俊生日仲有一個禮拜— 遲啲再諗啦。 

「咁我同胖虎可唔可以嚟?」嘉琪好奇地問道。

「唔得。」月伶強行打斷對方。

「好。」嘉琪恨不得穿過螢幕用膠紙封住月伶把口。

如果係曦銘嘅話,就算有幾唔情願都應該會俾嘉琪同胖虎出席。

穎怡呼咗口氣,繃緊嘅肌肉鬆弛落嚟。



場遊戲話咁快就完咗,嘉琪冇再出聲,自然被忽略喺一邊。

「點解仲可以活得咁順風順水?」嘉琪再三確定熄咗mic之後咬牙切齒道,指甲狠狠扎入手掌心。

呢個世界係咪冇報應?受害者點解反而過得仲差過當初欺騙自己嘅人?

嘉琪根本冇原諒過穎怡,更加冇諗住去同對方和好如初。只要一諗起對方而家同浩俊之間逐漸萌芽,而自己仍舊活喺陰影中— 

個天唔肯平反嘅話我就自己去做。

正如當初穎怡抹殺自己嘅真心咁,我同樣可以俾佢嘗試一下美夢破滅嘅滋味。

嘉琪果斷地㩒開穎怡喺遊戲中嘅個人資料,內心洶湧起伏。
 
已有 0 人追稿