條女有鳩而我冇賓周: 54

穎怡從來未試過送禮物俾異性，以往類似嘅經歷無非都係喺中學聖誕聯歡會交換禮物。

嗰年咁啱係一個男同學抽到穎怡悉心準備嘅青蛙造型廁紙筒。當時對方扭成一團嘅表情仍歷歷在目。

又或者係喺表弟生日嗰陣偷偷地塞個Tenga飛機杯去對方背囊入面。

咁唔通要送個飛機杯俾浩俊咩？

記憶中第一次遇到浩俊，都係源於自己按捺不住衝動偷影對方。今時今日仲送個飛機杯過去，仲唔係「性暗示星矢」嘅究極版？



佢會唔會當咗自己係欲求不滿嘅痴女？

穎怡耷低頭使勁地捽起塊面，洗走一切胡思亂想。

當一個腦唔夠使嗰陣，三個臭皮匠總能勝過一個諸葛亮。穎怡果斷地打電話向朋友求救。

「你哋呢排唔係成日傾偈咩？佢有冇同你提過自己嘅喜好？」海螢一連串問題令人頭昏腦脹。

穎怡打開同浩俊嘅Whatsapp紀錄，不禁好奇起到底係幾時開始習慣同對方吹水。



由早晨到早唞，浩俊咁多日以嚟一次都冇漏過，一切似乎係由聖誕節嗰朝萌芽，然後到病咗嗰刻起愈發頻繁地關心自己。

看似平平淡淡嘅問候一直都冇放上心，直到海螢提起之後先發現一切暗藏玄機。

浩俊一直都係主動關心穎怡嗰個，而自己的確從來冇過問對方嘅事。

「我淨係知道對方食唔到辣，同唔鍾意食筍…」穎怡支支吾吾地回答道。

「知道細節都係好事嚟嘅…只不過對揀份禮物冇幫助囉。」海螢無言以對。



死啦，呢樣嘢仲要係未相認之前先得到嘅資訊。到底我係有幾唔了解每日都同自己傾緊偈嘅人？穎怡扶額嘆氣。

「我哋同你出去買咪得囉。」月伶聽咗穎怡嘅心路歷程後簡潔地回應道。

「呢啲先叫做到嘢吖嘛！」

採取行動畢竟比紙上談兵更有效率。半個鐘之後三個人同樣地企喺荃灣西Donki門口，望住密密麻麻嘅人頭躊躇不定。

「Donki相戀意中人，荃灣西裡等—」穎怡輕輕哼起歌去發洩無奈心情。

「擠擁處間極親密，暢銷抵價在這尋。」海螢細細聲接埋下一句，結果換來月伶一個白眼。

「點呀，唔係買禮物嘅話我返去㗎喇。」月伶率先行入人群中。

Donki就係一個龐大嘅迷宮，周遭貨品琳瑯滿目，隨眼一望都係一排排嘅鮮艷包裝。



要唔要整個零食背囊俾對方呢？送嘢食實冇死㗎喎。穎怡拎起一包卡樂B薯片，眼球不斷地數過其他相似嘅包裝蝦條。

「唔好搞咁多嘢啦。」企喺隔籬嘅海螢不禁取笑道：「呢啲中學生先會整㗎喎。」

「你係咪唔記得之前有人為咗討好我特登放喺我Locker入面呀？」月伶不屑地將包薯片放返上架：「呢條橋要Ban！」

三個人繼續漫無目的咁東張西望，但都搵唔到似模似樣嘅生日禮物。行到成人區附近嗰陣，穎怡碰巧望到一個男仔拎住個飛機杯穿過布簾行出嚟。

一個鐘前危險嘅想法重新爬上腦海，穎怡打咗個冷震。

「其實你有無諗過—」月伶注意到穎怡目光所投之處，突然靈光一閃：「你送你自己做生日禮物。」

反正月伶已經篤定雙方情投意合，推波助瀾係遲早嘅事。



「係呀係呀。最好綁埋絲帶添。」穎怡半開玩笑道，指尖摸上隔籬一隻毛公仔。

棉花嘅觸感就好似倒數嗰陣嘅浩俊咁— 軟綿綿，令人不知不覺地陷入去。