我倆的緣份，於半世紀前已經開始: 認清心意

「媽…..媽咪妳點會知道!?我都係最近先肯定自己鍾意佢，我又唔係打鑼打鼓咁話我鍾意人…妳點會」
 
媽咪摸一摸我個頭，邊笑邊講
 
「傻女，妳係我生架嘛，妳嘅事媽咪點會唔知?」
 
「媽咪…..鍾意自己嘅青梅竹馬契哥….算唔算係好事….」
 
媽咪坐係床邊同我講
 


「慧思妳認為呢?」
 
「我自己都唔知….」
 
「媽咪就係一個好例子，咁妳覺得媽咪係開心定唔開心?」
 
「妳同daddy，咁多年黎都冇鬧交冇嗌離婚…好幸福」
 
「所謂好唔好，係睇妳自己有冇捉緊幸福。當初我捉唔住妳契爺，但係捉實左妳daddy…一開始daddy都唔敢追我架，直到契爺契媽拍拖一排，佢先敢對我開口表白」
 


「但係媽咪……我怕…我怕….」
 
「妳怕結果好似媽咪同婆婆咁樣?」
 
我一窩眼淚咁樣點點頭
 
「我冇媽咪同婆婆妳地咁樣咁堅強，今日…佢送我同學返屋企，我自己都已經呷哂醋….」
 
「浩翹知唔知妳鍾意佢?」
 


我擰擰頭「我冇同任何人承認過，雖然佢D同學有暗示過…哥哥可能對我有D意思」
 
「妳見過佢同學?」
 
「早排佢條褲爛左…幾個同學一齊陪佢上黎搵我…幫佢補褲」
 
「我個心肝寶貝大個女囉，識幫人補褲」
 
「媽咪唔好笑我啦…」
 
「慧思，妳同浩翹成績都好好，所以妳地拍拖呢，我會好放心，而且年青人…對果樣野會好奇，最重要就係保護自己知唔知?」
 
「媽咪呀!!!我地連….錫都未錫過，妳咁快講到果樣野….」
 
「未錫過?我剛先係麥當當見妳地好甜喎」


 
「頭…頭先邊算係…」
 
「慧思，婆婆同媽咪早就預左啦，而且契爺契媽都預左」
 
「點解會…」
 
「如果唔係，點解契爺會俾條鍊浩翹，而唔係俾浩揚?」
 
「咁…浩揚哥哥有個女朋友嘛…」
 
「唔係，媽咪係妳地細個就知道，妳會鍾意浩翹哥哥」
 
「點解嘅?」
 


「因為細細個，佢最識保護妳，有一次妳同佢走失左，妳不停喊，佢就攬到妳實。細個妳次次都係拖住佢，要做佢新娘子，似足媽媽細個」
 
「但係…我而家好似讓緊佢俾人呢….」
 
「既然妳都知道自己鍾意佢，咁妳仲讓唔讓?」
 
「但係媽咪…..搶人男朋友…死罪黎架喎」
 
「咩搶人男朋友?妳同學同浩翹拍拖啦咩，公平競爭嘛。當年雪晴契媽想同雪凝契媽爭添啦」
 
「真係?」
 
「係媽咪同雪晴姨姨聯手想一齊爭贏雪凝契媽。所以妳放心同人爭囉，係學校俾人杯葛嘅話，就返黎英華，或者我同契媽帶學生去踩妳地真光場」
 
媽咪真係同以前讀書時一樣，冇變過，真係大家姐咁款


 
「嗯….媽咪我知啦….不過我想低調少少…..」