我倆的緣份，於半世紀前已經開始: Notes

返到屋企沖完涼，靜靜地拎出今日佢為我準備好嘅Notes睇
 
係佢地學校，好少有男仔會揀英國文學，應該唔過10個，但身為傳統名校又唔可以唔開班，所以佢地學校會搞d課外活動去推廣下英國文學，去氹班哥哥仔揀黎讀。
 
不過佢地一提英國文學就只會諗起好多年前，一間電視台嘅遊戲節目，<<莎士比亞四大悲劇係咩?然後有個女仔好大聲話「我讀drama架嘛，俾拍定掌先」>>之後佢地答錯問題果一幕
 
一講到莎士比亞，大家就諗起<羅密歐與朱麗葉>，講嘅係兩個家族嘅長年仇恨，最近佢地嘅獨生子女因為愛上對方私定終身後，殉情嘅劇本
 
兩個家族嘛……咁似我同佢……由婆婆果代開始，我屋企同佢屋企已經有淵源。聽媽咪講返，當年佢爺爺第一日返學，就誤闖女子更衣室，遇上一早打完排球沖完身嘅婆婆，果時婆婆應該只係著住底裙，係更衣室大叫，然後打左佢爺爺幾巴
 


到左媽咪果代，就更加簡單。媽咪從小鍾意契爺，係鍾意到一個點，由媽咪懂事開始就想嫁俾契爺。媽咪亦係幼稚園k3果年遇到同契爺同班嘅契媽，然後就開始左十幾年嘅拉扯。結果媽咪都輸埋
 
終於黎到我同佢呢一代，我係咪真係同媽咪一樣，從小開始鍾意同自己青梅竹馬嘅人，我真係唔知。我只係知道，我而家可能係親手將佢送緊俾我同學
 
睇住佢每一份幫我整嘅notes，佢好有心機咁每一科、每一課、每一頁、每一行、每一句咁幫我準備好哂，不其然地，我流出左眼淚
 
點解佢會對我咁好?我終於發現，我自己真係鍾意佢，我唔可以再當佢係我哥哥啦，我…想成為佢女朋友，我想成為佢太太，我甚至想….幫佢生小朋友，一家大細開開心心咁生活
 
「慧思?點解妳有咁多Notes嘅?」
 


「媽…媽咪?」
 
媽咪隨手拎起左一份黎睇「嗯……份notes幾好，不過手字好熟，唔似女仔字」
 
「媽咪…係人地俾我架」
 
「邊個?」
 
「呢堆…係皇仁文科班嘅notes」
 


「妳去識到皇仁文科男仔呀?」
 
「唔係…係翹哥哥幫我拎…而且….呢d應該係佢幫我jot嘅notes同埋佢幫我搵埋嘅重點…」
 
「浩翹喎，佢連文科野都去掂?」
 
「嗯….」然後我嘅眼淚開始流落黎
 
「媽咪呀….有d野我唔知點算好呀….」
 
媽咪見我係到喊，立即變得好緊張，因為佢得我一個獨生女，我係媽咪心中地位就好似佢係婆婆心中一樣，掌上明珠、心肝寶貝
 
「慧思做咩呀?係咪學校有人蝦妳?話俾媽咪聽，媽咪同婆婆幫妳出頭」
 
「唔係呀媽咪……我…..鍾意左人呀….」


 
「女仔?」
 
「男仔黎架……」
 
「傻女黎，媽咪早就知道妳有心上人，唔洗喊架」
 
「媽咪妳知?」有咩可能?我收得咁好
 
「媽咪知妳鍾意浩翹哥哥，係唔係?」
 
俾媽咪咁講一講，我塊面立即轉紅