我倆的緣份，於半世紀前已經開始: 遊戲機

聽完雪凝契媽講完後，我塊面紅哂。死啦，原來雙方媽咪都知道哂……契媽拍一拍我頭
 
「唔好重覆婆婆同媽咪嘅錯呀傻妹」
 
「知…知啦契媽」
 
「可能好快妳就叫我做奶奶呢」
 
「邊….邊得黎咁快….我….唔係咁隨便就俾人架….」
 


「叻女」
 
「契媽，如果哥哥將來蝦我…..妳會幫我架呵?」
 
「妳係獅哮功第三代傳人，恐怖雞三世，邊個蝦到妳呢?」
 
「邊係呢…..」
 
「好啦，準備食飯啦」
 


「知道!!!」
 
然後契媽用獅哮功叫契爺同哥哥去食飯，原來雪凝契媽都識獅哮功，係同門師姐妹。
 
其實唔止爸爸同翀契爺，連風契爺都成日俾雪凝契媽鬧
 
呢個就係佢地三個大細路嘅命運
 
食飯之時，契爺望到我實一實，然後又俾契媽鬧
 


「喂!!!專心食飯好唔好呀」
 
「冇….食飯囉」
 
「唔?契爺，我面上有飯?做咩望實我嘅?」
 
「我係到諗，點解妳愈大愈似妳媽咪，明明妳啱啱出世果時係同你爸爸個樣好似」
 
「下?似爸爸，咁就死得囉」
 
「咁又係嘅，似豬西好過似羚羊」
 
「喂!咁講自己個妹嘅?慧思似詩敏唔好咩」
 
「似佢唔為食呀?妳果陣冇見住咋，佢K3就一個人食哂我同妳整果個麵包」


 
「詩敏一個人食哂?我俾左個大麵包佢架喎」
 
「所以我咪話慧思似詩敏唔好囉」
 
「契爺…..其實……我胃口都唔細….不過係我肥唔到…」
 
“叮噹”一聲後，媽咪都黎到食飯
 
「媽咪做咩咁遲?」
 
「見學生家長，好麻煩」媽咪講完就攤係飯檯上邊大叫
 
「訓導果然好辛苦，點解我會聽媽咪講去做訓導架…….」
 


「Jasmine洗唔洗我幫下妳?」
 
「唔好啦Jessie姐姐……妳早d返黎煮飯仲好啦……」
 
此時契爺電話響起，一向懶嘅佢就咁打開Speaker聽
 
「喂，熙哥做咩呀?」
 
原來係daddy，咦，daddy今日唔係返工架咩
 
我同媽咪對望一眼
 
「喂!!!!我同阿翀排隊買到三部機啦!!!game都準備好!!!一陣我拎上黎你到，今晚我地連線打返幾場」
 
同一時間，我見到媽咪用好恐怖嘅眼神望住契爺，而雪凝契媽打完電話之後，亦都以恐怖嘅眼神望實契爺，佢應該係打左俾雪晴姨姨


 
「阿熙呀….你….」
 
「我當然用私己錢買啦，我總有地方收埋部機嘅，詩敏咁多年都係咁豬西，佢點會知丫」
 
「唔係呢….你…」
 
「你咪扮野啦，你部模擬機名義上係工作練習，實際上可以用黎打機嘛，書房部電腦又係，你嘅保密程度不愧係我地樂善堂之首，我好快返黎，今晚準備打機」
 
Daddy好興奮咁收左線，不過契爺就好似全身大汗咁
 
「老公呀，雪晴話阿翀尋晚話返醫院特別更喎，請問有幾特別呢?」
 
「阿哥呀，我老公話尋晚有聯合行動喎，請問係咩意思呢?」
 


「呀…即係咁，我都係今朝返到，我….唔係太清楚」
 
「你地今次又買左咩呀!!!!」
 
「PS…..第X代……」
 
「仲細呀!!!!?你夾埋我老公一齊買野?!仲要有私己錢!!!我就開會開到傻!!!你地就打機?」
 
「你估教書好好架!?好呀!!!幫你生左三個，你都冇咩表示，而家自己就係到買遊戲機!!!」
 
契爺俾契媽同媽咪用雙重獅哮功夾擊，真係壯觀囉，我都想像到一陣daddy上到黎嘅下場會係點
 
「老婆呀….即係咁….詩敏都係….其實我地都好體諒妳地」
 
「體你老味!!!!!」媽咪出招啦
 
好快，興奮嘅daddy就拎住戰利品一步一步咁踏入佢嘅刑場