我倆的緣份，於半世紀前已經開始: 獅哮功

“叮噹!”翹哥哥好快咁開門，一開門就見到daddy興奮個樣
 
「姑丈……」
 
「喂!!浩翹，有新機打喎，唔好痴實慧思啦，佢脾氣好似佢媽咪咁臭，黎黎黎，爸爸呢?我地今晚同你姨丈一齊大戰」
 
今次daddy真係大鑊啦
 
「阿風坐係到做咩呀?咁嘅樣嘅，拿，趁Jessie行開左，你快d裝好部機，然後我地幾個一齊大戰」
 


「咳咳」媽咪兩聲假咳之後，daddy先發現自己走左入刑場
 
媽咪撓實雙手望實佢
 
「老婆…….」
 
「聯合行動呀?同阿翀嘅聯合行動呀?入境處幾時同醫院搞d咁嘅行動呀?」
 
「其實…」
 


「怕羞仔已經招哂啦，今日出新機丫嘛」
 
「係…」
 
「仲用私己錢買呀?我係豬西呀?羚羊!!邊個俾你收埋私己錢呀!!!!」
 
嘩!!!!十成獅哮功呀!!!!!媽咪同婆婆嘅獅哮功係有分別架，如果迫到媽咪出十成嘅話，破壞力係相當驚人
 
果晚，佢地三個部遊戲機都俾我地媽咪沒收哂自己玩，而佢地就只可以瞓係廳
 


不過daddy唔知用咩方法氹返媽咪，俾佢入房瞓
 
兩個契爺嘛…..一個瞓自己個仔間房，一個瞓書房
 
第二日，都係大雨，所以我出門口果時將自己對皮鞋同襪放係書包，就咁著對人字拖出門口
 
去到大堂已經見到翹哥哥係到，佢著起對黑色軍boot，然後好似d藍帽子咁扎起褲腳
 
「喂喂，你去打仗呀?」
 
佢望一望我然後又笑返我
 
「妳去落田呀村姑?」
 
「咩…咩喎，咁大雨嘛，我又怕水浸…」


 
「妳唔怕整污漕咩?」
 
「都怕架……」
 
「等陣啦，爸爸今日開車車我地返學」
 
「契媽呢?」
 
「姑丈車佢同姑姐返英華嘛」
 
「哦…都係嘅」
 
「尋晚姑丈點呀?有冇俾姑姐鬧呀?」
 


「Daddy咪又用絕招囉，好似啄木鳥咁不停係媽咪塊面到啄啄下，啄到媽咪鬼咁開心，個樣冧到呢…然後尋晚仲想幫我製造個細佬或者細妹添呀…..諗返起都起雞皮呀」
 
「嘩….妳咁咸濕嘅…」
 
「咁…..佢地關埋房門都知咩事啦」
 
好快，契爺車我地返學，不過去到中途已經心知不妙，部車上到大坑道，就落唔返銅鑼灣，因為已經塞死哂