我倆的緣份，於半世紀前已經開始: 被錫咀

我同哥哥出左地鐵，兩個人慢慢行返屋企，經過糖水鋪時，佢係到揀糖水
 
「喂，你真係買架?」
 
「咁我話過請妳食嘛」
 
「但係我地仲病緊喎」
 
「咁呀….」
 


「好返先啦」
 
「咁記住先啦」
 
我地繼續行返屋企
 
「頭先..Winnie過黎搵你做咩呀?」
 
「唔…今晚上網傾下計之嘛」
 


「你晚晚都同佢傾計?」
 
「又唔係晚晚嘅…我陪完妳之後，有時間先同佢傾下計囉」
 
「你重視我多d?」
 
「咁當然啦，我最錫妳架嘛」
 
我雙手撓實佢「咁我唔會俾你識女朋友架啦」
 


「點解呀?」
 
「一陣你唔理我咁點算」
 
哥哥幫我拎住書包，我又撓實佢係到行，感覺好甜蜜，好似冇人可以分開我地咁樣
 
即使去到屋企樓下，我地都可以咁樣行入去。但係今日，我地見到詩敏姐姐放學返黎，今次佢男朋友都送埋佢返黎啦
 
「喂喂，家姐係前邊喎」
 
「係喎，佢男朋友都係到喎」
 
我地兩個對望一下，大家都知對方心中諗咩。點左一下頭之後，我地開始玩跟蹤
 
家姐已經畢左業，不過佢揀讀埋碩士先出黎做野，而佢男朋友呢?佢就犀利囉，聽翹哥哥講佢雖然係普通中學出黎，但係佢英文底好好，入左HKU Law school，過埋PCLL，而家跟緊師父，好似準備去DOJ到做檢控官，做過DOJ再跳出黎掛牌，收費會高好多架。但係呢位法律界明日之星，今日係我地面前，好似一隻小羔羊咁對住大家姐


 
「佢地好甜蜜喎」
 
「你睇下，家姐個樣幾咁冧」
 
「嘩嘩嘩，仲作勢打人添喎」
 
「喂喂喂，錫咀啦喂」
 
嘩，家姐首先同人地輕吻，唔洗一秒就立刻激吻果隻，我地兩個見到咁嘅情況立即拎出電話黎錄影。佢地咀左好耐先分開，然後家姐先上樓
 
「嘩…家姐同人激吻呀」
 
「點呀?send唔send返俾佢睇呀?」
 


「係佢面前扮下仲好啦」
 
我地拖住手走去家姐後邊，行果時，我感覺到佢好溫暖
 
「家姐!!!」我係佢身後拍佢一下，然後佢嚇到彈起
 
「嘩!!!嚇死人咩妳地!!!」
 
我地兩個陰陰咀咁望住家姐
 
「笑咩呀?妳地…..見到d咩呀?」睇黎家姐知道我地見到d咩啦
 
之後我地扮激吻動作俾佢睇，一向好cool嘅家姐，如今塊面紅到一個點
 
「好啦好啦!!!唔好扮啦!!!我同佢都拍拖咁多年，好奇咩」


 
「係估唔到家姐妳咁熱情者」我地兩個仍然攬住對方扮緊佢地
 
係我地恥笑緊家姐果時，突然係我同翹哥哥後腦分別出現左一隻手，然後推我地推前
 
就咁樣，我同翹哥哥….錫左咀…係7歲果年之後，我地第一次錫咀
 
「係!!!浩揚推實d!!!影左相先!!!!ok!!!」
 
呢一個吻維持左30秒，隨住浩揚哥哥俾人追打而結束
 
我就面紅紅咁企係到嘟長個咀…我同佢…錫左?