我從後攬實佢「仲係到溫書呀?」
 
「嗯?做咩呀?」
 
「OV同鴿黎左呀」
 
翹哥哥轉身同佢地打招呼
 
「歡迎黎到我間房」
 


「嘩!!翹哥!!你間房真係沙律所講,好多書喎!!!」
 
的確,翹哥哥間房好多書,佢睇完又會睇,仲分哂類別
 
英文小說一邊,戰爭歷史書一邊,金庸小說一邊,散文集一邊,輕小說一邊,仲有成套原振俠系列
 
然後肥鴿仲笑得好奸咁講
 
「仲好多沙律嘅相係到喎,莫非…」
 


「我有佢D相好奇咩?佢大部分相都係我幫佢影架啦」
 
「係囉,翹哥哥影相好叻架」
 
「咁沙律妳做佢Model影輯相囉」
 
「我做model?我又唔係高,又冇長腿,胸又唔大,做咩model呀?」
 
「唔係丫,思思妳有嘅係可愛呀」
 


哥哥咁樣講完之後,我地三個俾唔到反應佢
 
「只要妳唔好起飛腳的話」
 
「我…我好粗魯咩!!!」
 
「沙律呀,妳係學校又真係幾粗魯嘅….」
 
「全班都係女仔,怕咩喎!!」
 
我地一行人乖乖地坐係廳到食飯,契媽唔俾我地幾個女仔幫手,所以我地只可以坐低係到等
 
好奇怪,一向鍾意去幫契媽手嘅翹哥哥都係坐低左
 
「唔?阿哥你今日唔幫手嘅?」


 
「呀…其實…唔…」
 
「妳阿哥佢整到呀,下晝先去完雪晴姨姨到。叫左你唔好咁搏架啦,而家整到啦」媽咪拎住D餸出黎,邊鬧哥哥
 
「下?冇聽你講嘅?你做咩黎?」
 
「哦…上體育堂,踢波太興奮…」
 
「咁你整到邊到呀?」
 
「哦….左膝者,頭先姨姨搵同事幫我整左幾下,好返好多」
 
「不過有人痛到大叫呢」契媽拎左煲湯出黎,係青紅蘿蔔豬骨湯
 


「好痛?」我望一望哥哥
 
「今日阿姨叫同事幫我打衝擊波,對消炎效果好好,但真係超痛」
 
「你爸爸F.6果年試過啦,隔日打一次,真係快好返架,不過真係超痛」
 
「唔?契爺都試過?」
 
「試過啦,所以佢之後就唔敢跑到跑到咁傻」
 
「阿哥你點整到架?」
 
「太搏囉,下下踢波都去到盡囉,係唔係呀?」
 
「媽咪呀….得啦….」


 
「我唔話你呀,你又周身傷返黎架啦,次次都要阿姨幫你執手尾」
 
「得啦,唔好再講啦,我俾妳地兩個環回立體聲轟炸左成個下晝啦」
 
「係咩?我個女都未轟炸你」
 
「邊少得佢果份,佢今晚就會轟炸我架啦」
 
我地一圍6個人係到食飯,契媽煮飯係盡得婆婆真傳,普通蝦仁炒蛋都可以炒到咁香、炒菜又好食,仲有金蘑肥牛同埋豬肉卷
 
所以我地住契媽樓下係冇錯架
 
不過今日星期六喎,媽咪有咁多野做咩?唔煮飯?