我倆的緣份，於半世紀前已經開始: 仍然家琪姐姐嘅往事

「嗯…妳有冇聽過，我係單親家庭長大?」
 
「我有聽過」
 
「我細個仲係住北角d劏房，我爸爸過左身之後，我同媽咪兩母女相依為命，我細個果時，班上同學放假都係去飲茶、去迪士尼玩、去海洋公園玩，而我，就要幫媽咪手執紙皮去賣，執唔夠，果日就只可以食白飯。所以我地連汽水罐都唔可以放過，如果我地唔夠錢，就連飯都要慳，只可以食麵包皮。我由細到大都知道媽咪辛苦賺錢，所以我一有時間就拎住功課，去樓下d鋪頭借人地d燈溫書」
 
「姐姐妳最後入到英華丫」
 
「果時我已經有近視，我真係好辛苦先湊夠錢買副眼鏡俾自己，好彩北角有間老字號眼鏡舖個老闆好好人，佢送左兩副眼鏡俾我，我先夠錢俾書簿費。當時我一知道自己入到英華，真係開心到喊。一直以黎，我都冇朋友，係小學成日俾人蝦。我係第一日黎英華註冊果時，我真係好自卑，好多同學都身光頸令咁黎註冊，但係我就要著舊到好普通咁黎。好多人見到我，都知我係窮人一名，仲要係單親，因為我有d小學同學都同我一齊黎左英華」
 


「之後呢?」
 
「當我註冊左之後，就開始俾小學好憎我嘅同學講d好難聽嘅說話去攻擊我，又話我整爛佢地d野。我媽咪不停同人道歉，但係我忍唔住啖氣，正想郁手打人果時，妳媽咪同奶奶出黎阻止左我，應該話佢地兩個救左我」
 
「媽咪一向係正義嘅化身黎」
 
「嗯，佢一聽到我d舊同學講難聽說話俾我聽果時，佢立即拎起人地份入學通知書，再將人趕出校」
 
「對方冇投訴?」
 


「有架!佢地話要見校長，但Miss Cheung第一句就話『頭先我見妳不停用唔好聽說話攻擊呢位同學，妳已經嚴重違反我地校規第一條亦係最重要果條”尊重他人”我而家以訓導主任身份記妳一個大過』」
 
「有冇用獅哮功呀?」
 
「洗乜獅哮功丫，妳媽咪咁….」
 
「巴渣!」(媽咪係隔離房打左個乞嚏)
 
「Yes!!!!俾個五我!」
 


「yeah!」
 
「然後到奶奶講野『我係今年管F.1級嘅總班主任，林雪凝老師，Miss Jessie Lam，我剛先見到妳用唔禮貌、近乎無賴行為去嘲笑其他身世冇咁好嘅同學，而家我記妳一個大過，根據本校校規，記滿兩個大過嘅學生需要立即退學，我地而定正式要求妳退學，後邊位老師會幫妳安排，請妳地完成手續後立即離開我地學校』咁樣」
 
「契媽喎，佢會咁講野?但係對方點呀?」
 
「對方咪話要見校長囉，然後姨姨就好有氣勢咁講『我係校長個女，張詩敏老師，亦係呢到嘅訓導主任，我隔離呢個係校長新抱，林雪凝老師，有咩事要搵我媽咪?可以同我講』咁樣」
 
「係咪咁樣撓實雙手舉高個頭?」我示範一次出黎
 
「係呀係呀，真係好似呀，哈哈哈哈」
 
「媽咪發現daddy有私已錢果時都係咁，但對方一定堅持見婆婆喎」
 
「係呀，就算副校長出黎都唔夠，所以校長御駕親征，原來佢一直扮校工係到睇學生」


 
「哈哈哈哈!!!!!係咪扮抹地阿姐呀?」
 
「係呀，不過佢又抹得唔掂，好多破綻，大家都忍笑忍得好辛苦」
 
「唔識用吸塵機丫嘛!!!哈哈哈哈!!!!!」
 
「係呀係呀」
 
我地兩個笑到流哂眼水