《家姐話，幫我追女仔》: 四十八
*
之後嘅每一日，都係特別簡單、平淡。
冇咩原因嘅，我同婷婷又已經互相知道大家心意，個心就當然定一定，唔使再十五十六，驚佢唔鍾意我。
一月一號跨年，咁我哋都約埋一齊嘅，不過婷婷就同屋企人講，係約咗成大班friend，咁結果呢，就係我、婷婷、郭靖、Winnie一齊過啦。
「好逼啊。」Winnie話。
「你捉實我啦，廢時走失咗又要搵你。」郭靖話。
「好啦。」Winnie點頭。
我同婷婷對視一眼——咦，做咩而家好似係郭靖佔咗上風咁嘅？之前都係Winnie惡啲㗎喎？
我哋冇問，大概都知道係點解，郭靖唔知做咗啲咩，唔覺意收服咗本身惡死嘅Winnie。
我哋喺海濱——好撚多人，街裏愛人一對對，或者都係一大班人咁。
婷婷嘅頸巾鬆咗少少，我幫佢綁返緊啲。佢着好多嘢上身，冷衫、帽、頸巾、絲襪，但都仲係咁靚，一啲都唔腫。
「新年有咩願望呀？」我問婷婷。
「考好啲試囉……」婷婷答。
「仲有呢？」
「屋企人身體健康囉……」
「仲有冇？」
「希望你之後仲會鍾意我啦……」婷婷越講越細聲。
「浪費願望，我有咩可能會唔鍾意你呀？」我敲一敲佢頂帽。
婷婷靠近我嘅耳邊，嗲嗲哋咁講：「唔出奇呀，你睇吓佢哋，由唔鍾意都變成咁啦，鍾意變得唔鍾意，好難咩？」
「我先唔會變。」我篤定——喂，我咁辛苦先得到你認可喎，點會令你失望㗎？
「咁你呢？有咩願望？」婷婷反問。
「希望我哋升到同一間U，然後一直行落去！」
「咁呀，首先你要努力讀書啦。」
「我有呀。」
我真係努力咗，我發誓一定要考得好，然後同婷婷順利一齊，都嚟到呢步，如果最後因為啲硬件嘢而後退，我會睇唔起自己。
跨完年就返學，然後就開始考試，每日都温書、考試，婷婷又真係乖，好投入嘅，所以我哋都係得返夜晚先至會傾兩句WhatsApp，內容都悶。
「温晒未？」
「就嚟。」
「早啲瞓啦，聽日先至會有精神。」
「好啊，你都係，聽日加油！」
每日如是。
但係，返學一見到面，婷婷就會偷偷哋同我打招呼，臨考之前，都會靜靜雞經過我個位，留低memo紙：「加油<3」呢一啲得我哋兩個都知嘅小事，令所以心情都變得更豐滿。
考完，我哋學校就好快派卷嘅，基本上冇假放。
咁我哋就照返平時咁坐啦，Chris依然坐喺婷婷隔籬，佢哋就少咗交流嘅，因為Chris好似都冇乜mood咁——佢有堅持約婷婷，但婷婷堅持唔出嚟，咁就不了了之，冇然後；而且又要派卷啦，可能壓力都大。
我哋坐得近，每次派卷時，婷婷都唔特別想睇個分，所以佢會攞畀我、望吓我先，然後覺得我表情正常，先接返份卷——咁當然婷婷成績OK，佢就唔會再講嘢，只會繼續喺位，問吓我幾分咁。
Well……咁我成績就唔係特別好嘅，但都唔係真係差嘅……只係，有時Chris都會擰轉頭，就唔為意咁見到我個分，然後就話：
「你咁渣㗎，咁點同婷婷入同一間大學呀？」
「咩唔得呀？你顧掂自己先啦。」婷婷即刻答。
「咪係囉、咪係囉。」我附和。
婷婷有時都大聲過我，每次Chris寸我，佢都會幫口。
咁有一科Chris就考衰咗——就係數學！我第一，佢第三，相信佢心情一定係大受打擊……
「哇咦，你唔再係第一啦？」我寸Chris。
Chris冇講嘢，只係睥一睥我。
隔一陣，佢又話：「你今次好彩咋！」但佢個樣真係好頹，可能因為佢長期都係第一，始終難接受啲嘅。
「下次你都唔會係，因為有我。」我答。
不過見到Chris咁，我又於心不忍：「唔好頹啦，一次半次啫。」
「邊有。」
原來靚仔都會咁口是心非。
「乖啦。」我拍拍佢膊頭。
婷婷聽到我哋嘅對話，奸笑，寫咗張memo畀我：「其實你哋都幾夾。」
「邊度？」我寫。
「位置分明，仲要好養眼。」
屌，婷婷畀Winnie教壞晒……
總之，派卷都算係有驚無險嘅，只係我要再認真啲，谷吓語文科啲成績。
而婷婷，就依然係嚟我度補文學，同埋同我一齊做數——但有時做做吓又講咗第二啲嘢，婷婷就請求家姐一定要㩒停我兩個。
「啱㗎啦，家姐幫手囉，又成日宅喺屋。連一月一都自己過，慘慘。」我揶揄家姐。
「咁你係咪要我搵返個垃圾呀？」家姐嘖咗一聲。
「咁又唔係……」我唔想再打交。
「咁你同阿婷生性啲温習啦！」
據我所知，呢段時間，我仲係會聽到家姐偷偷哋喊，佢食少咗好多嘢，瘦咗一啲；但係，起碼都叫精神過之前，都係好好哋咁同我哋講書。
家姐del晒啲交友app，都block咗垃圾輝——廢事互相搵。
偶然，家姐會有非常落寞嘅神色，但最後，佢都係會專心咁改婷婷啲卷，同埋做佢自己啲大學功課。
我諗，家姐今次咁hurt，都需要少少時間，但最後應該都係會好返嘅。
喺你正式好返之前，羨慕吓我同婷婷兩個人排排坐、日日見先啦！