全實景系列《香檳大厦 1:55 am 行人止步》重製版 (已完結): 第十一章：【八樓C2的鎖匙】
1:55am - 香檳大廈8/F爛門前
「阿Ken！」小冰焦急非常，跪咗喺度叫出嚟。
小冰嘅呼喊得唔到任何回應，只聽到外面連綿不斷嘅雨聲，同埋自己嘅呼叫聲喺通道迴蕩。
在場三人都唔敢輕舉莽動，走入去爛門後嘅單位搵阿Ken，好怕會同小冰手上面條電線嘅下場一樣。
權叔慢慢咁捲返埋啲電線，史提芬一邊好緊張望住條通道，一邊扶起小冰：「小冰，我哋行開埋一邊先啦。」
小冰成個人被向後拖起，一臉茫然。
剛剛發生嘅事太突然，無人知道裡面到底發生乜嘢事，阿Ken為何會消失？電線點解會齊口切斷？小冰同史提芬好想知道，但唔敢去搵出原因。
入返Yolanda房之後，小冰撲向電視機前，繼續望住嗰四格畫面，期待阿Ken會再次出現，期待阿Ken會返嚟同佢哋講發生咗啲乜嘢事。
「阿Ken講過，如果佢都唔見埋，我哋要報警……」史提芬提醒小冰：「係咪真係要報警呀……」
報警呢個動作對於好多人嚟講係一個障礙，通常未到生關死劫嘅時候，都唔會想「搞大件事」。
一言驚醒夢中人，經史提芬提一提，小冰即時攞起電話準備打999報警。權叔本來仲係門口繞緊電線圈，但聽到史提芬咁講就話：「你哋覺得報警有用咩？」
小冰同史提芬聽到權叔咁講，都你眼望我眼，唔明白當中意思。小冰反問：「宜家有人失蹤，我哋親眼睇住我地同事唔見咗，唔係應該要報警咩？」
小冰再次回想起阿Ken臨出發前嘅囑咐。
權叔攞起捲好嘅線轆放上枱面，然後對住佢哋兩個講：「好，就算報咗警，咁點同警察講呀？話有個人喺間房入面消失咗呀？失蹤案要48小時後先受理啦。」
權叔停一停，接住又講：「唔係話唔報得警，只係明知無結果嘅嘢做乜仲要做，與其要拖兩日，倒不如即刻諗吓有無其他方法解決啦，你哋個朋友可能宜家就需要幫手呢！」
史提芬聽完權叔咁講，覺得幾有道理，佢望向小冰，小冰神情凝重，似乎仲諗緊點做。
「咁你認為宜家應該點做？」小冰向權叔提問。
權叔坐喺Yolanda張床上面捽捽自己腳板底，啱啱被强行拖走時，佢踢開咗對人字拖，雙腳被地面磨擦到甩皮，而家仲有少少隱隱作痛。
「我哋應該點做？」權叔又諗咗一諗：「其實你朋友可能暈咗係裡面啫，過一陣醒返就會自己行返出嚟架啦……」
權叔講完都覺得好牽强，自己冷笑咗一吓。
小冰向權叔投以一個不屑嘅表情。
「權叔，果間房以前都試過有人失蹤架，你唔做嘢係因為你唔識得佢哋，但今次唔見咗嗰個係我同事，我唔可以置之不理。」小冰講得情真意切：「唔得，我都係要報警，求其搵個藉口話比人搶嘢，警察咪可以即刻上嚟囉！」
史提芬立即提出疑問：「咁咪即係報假案？犯法架小冰！」
「我唔理得咁多啦，到時警察嚟到先講清楚原因啦！」小冰再攞起電話打999。
「一係咁啦，我有個相熟嘅沙展，佢守開呢區嘅，平時都會嚟巡香檳，我Call佢上嚟睇吓啦，應該會快啲嘅……」權叔提出呢個建議：「咁你咪唔駛報假案囉。」
小冰雖然心急想搵解決方法，但始終會犯法嘅事佢都唔想做，聽到權叔主動咁講，心理上覺得無咁大壓力。
「咁唔該哂你先啦權叔。」史提芬回應權叔嘅提議。
「唔該哂你……權叔……」小冰遲疑咗一陣，都向權叔道謝。
權叔望定小冰一陣，然後就行出門口：「我落去攞嗰個阿sir嘅電話號碼先，你哋喺度睇住環境。」佢指住個閉路電視。
小冰回頭望閉路電視，只見到權叔沿住走廊，經過爛門一直向電梯方向行，直到轉彎之後，離開攝錄範圍。
史提芬同樣目送權叔離去，暗暗佩服權叔喺咁黑嘅環境都可以唔駛開電筒就睇到路，佢同小冰講：「權叔真好嘢，一啲都唔驚黑嘅，比著我就唔夠膽出去啦，係咪呀？」史提芬好希望權叔可以快啲搵到人上嚟幫手，始終呢件事已經超越咗大家對「普通嘢」嘅認知程度。
小冰聽到史提芬咁講，腦海霎時間閃過一個想法，虛無飄渺，但未捉得緊。佢環視四周，想搵出一個可以令佢集中思考嘅凝視點。
小冰發現權叔留喺地下嗰堆工具入面，有一抽鎖匙。佢踎低身執起抽鎖匙，鎖匙上面全部寫住7/F A，4/F C，8/F電錶等字樣，其中一條最令小冰覺得奇怪 - 8/F C2。
剛剛阿Ken入去嘅爛門單位，小冰清楚記得門牌上面，正正就係寫住C2。
「奇怪，點解權叔會有咁多單位嘅鎖匙……」小冰喃喃自語，覺得一個看更有大厦單位嘅鎖匙係一件好奇怪嘅事，起碼佢屋企樓下個看更唔會隨便入到去佢屋企。
小冰抽起條C2鎖匙，懸吊係空中，想借光線睇得更清楚。
一條普通銀色合金鎖匙，光潔亮白，坑紋中仲有少少反光位，小冰摸一摸反光位置，然後捽一捽手指，有種滑溜溜嘅感覺。
係潤滑油，防止生銹用嘅潤滑油。
潤滑油好少直接噴係鎖匙，多數會噴入鎖匙窿，一般人都會驚鎖匙窿生銹，開唔到門，所以會定期唧啲潤滑油入去，條匙有油意味住曾經插過入匙窿，呢個係最合理嘅情況。
「權叔曾經開過度門？但佢又話九年前失蹤單嘢發生過之後就未見過道門打開……」小冰心入面有好多問題，但無講出嚟。
史提芬知道就快有援兵到，加上見到權叔無視黑暗嘅表現，反而稍稍安定咗落嚟。佢當然好心急，希望阿Ken可以快啲出返嚟，可以快啲離開，但佢都深知阿Ken同埋經理佢哋一日未出嚟，佢同小冰一日都唔會走。佢企喺門口留意住走廊嘅動靜，似乎比之前大膽咗。
小冰企定係度唔郁，足足有5分鐘，直到外面傳嚟嘅一吓雷聲，先至嚇到回一回神。佢攞出自己部電話，想打999，但發現啱啱無咗網絡，可能因為大雷雨關係，令網絡接收不良。
佢熄咗部電話再開過，希望可以重新連接到。佢一直低頭全神貫注咁望住電話右上角嘅天線符號，一邊講同史提芬講：「史提芬，我哋唔可以相信權叔，權叔好有可疑。」
「吓？點解呀？佢一直都好地地架﹗咩事呀？」史提芬轉身望住小冰，顯得有啲詫異。
「有人唔見咗，報警係一個好合理嘅做法，但權叔好似一直都唔想我哋報警咁，你唔覺得有啲奇怪嘅咩？」小冰反問史提芬。
史提芬諗咗一陣，點點頭，又覺得幾合理。
「而且，我發現權叔講大話，佢話佢之前一直都無入過嗰間房，但其實佢一直都Keep住嗰間房嘅鎖匙，仲應該有入過去。」小冰繼續講：「我唔知佢咁做係基於乜嘢原因，但喺呢件事上面實在太可疑，我已經唔可以再信權叔講嘅嘢……包括佢之前講嘅故事。」
電話網絡顯示有訊號，小冰即刻打999報警，仲開咗擴音器。
「999報按中心﹗」電話另一邊傳嚟一把女聲。
「喂，我想報警，我宜家喺尖沙咀……」小冰正想講出佢哋嘅位置。
「小冰，收……收…收…收…收線……」史提芬突然開聲。
小冰打咗個突，心諗點解連史提芬都係咁樣，佢抬起頭望住企喺門口嘅史提芬，然後第一眼就發現……
有一把刀仔，壓咗喺史提芬條頸上面，刀尖指住頸動脈位置。
「小姐，可以收線嗎？」權叔嘅聲音喺史提芬身後傳出。
(待續)