全實景系列《香檳大厦 1:55 am 行人止步》重製版 (已完結): 第十四章：【行刑室】
2:05 - 香檳大廈B座 8/F Yolanda房門外
頸部嘅大動脈被生果刀嘅刀尖拮住，史提芬嘅身體即時變得疆硬。佢諗起以前嘅一單新聞，有個警察被犯人喺條頸度用刀仔劃咗一吓，之後因為失血過多導致腦缺氧，下半生都要人照顧。可憐嘅史提芬宜家仲未搵到會照顧佢嘅人，所以諗到呢到佢驚到郁都唔敢郁。
「放低部電話喺檯面。」權叔嘅語氣冰冷而低沉：「你唔好要我講到第三次。」
小冰逼於無奈地將部電話放下，腦海中仍然未搞清楚到底發生乜嘢事。
權叔命令小冰放低部電話喺枱面，然後用力拖住史提芬倒退出走廊：「o靚妹，行出嚟﹗」佢指使小冰先行，再挾持住史提芬典後，由後樓梯慢慢行落去。
「o靚妹，唔好諗住玩嘢，你都唔想你朋友條頸以後多條疤㗎？」權叔語氣神情兇惡，同先前嘅佢完全係判若兩人。
小冰一邊落樓梯一邊揸緊拳頭，佢痛恨自己點解唔早啲懷疑權叔，搞到自己宜家只能受制於佢嘅威脅，同時又連累史提芬身處危險之中。「電話又無咗，可以點呢？」小冰腦中諗咗好多次，但都未諗到解決方法。
不過最唔明白嘅係，點解權叔要咁做？
小冰慢慢行落樓梯，身後不遠處嘅史提芬同權叔緊隨，權叔嘅身體貼住史提芬背脊，左手緊緊箍住佢條頸，右手攞住嘅刀仔仍然指向史提芬嘅頸動脈，以防佢有任何反抗。佢哋一步一步行落去，直到五樓。
「o靚妹，喺呢度行入去走廊直行﹗」權叔指令小冰行入去又黑又長嘅走廊。小冰天生就怕黑，但係宜家呢個環境，佢最驚嘅人反而係權叔。
「唔好行咁快，慢慢行﹗」權叔又喝斥小冰。
佢哋三個沿住走廊直行，直到中段樓梯對出嘅門口前面，權叔叫停小冰：「o靚妹，攞抽鎖匙出嚟開門！」
「咩嘢鎖匙呀？」小冰反問權叔：「我無呀﹗」
「你係咪想你朋友死喺你面前？你左邊褲袋嗰抽呀。」揚揚得意嘅權叔將刀仔再進一步壓緊史提芬條頸。
「小冰呀……你……你……攞出嚟啦……權叔把刀仔好貼…貼…貼…貼呀﹗」史提芬用哭喪似嘅聲音講。
小冰心中一陣氣餒，本諗住可以搞出一陣騷動，趁機發爛，卻估唔到佢一舉一動早就逃唔出權叔雙眼。剛才喺Yolanda房間中，小冰偷偷地將權叔抽鎖匙袋起。
小冰死死地氣將抽鎖匙攞返出嚟：「邊一條呀？」
「5B1！」權叔答：「你唔好再玩嘢呀﹗」然後拖住史提芬慢慢移向小冰身後，睇實小冰開門。
5B單位門口有道不鏽鋼趟門閘。小冰用鎖匙扭開鋼閘嘅鎖，「咔嚓」一聲，門鎖已經打開。
小冰定一定神，緩緩地將道閘向左推，但鋼閘比佢想象中重得多，佢用盡洪荒之力先推得開。「咁重嘅？」小冰暗暗叫苦。
鋼閘後面喺一道木門，同姐姐仔嘅房門樣式差不多。「之後呢？」小冰搓著手搓著問。
「5B2！」權叔冷冷地說著。小冰按指示搵出「5B2」嘅鎖匙，插入去木門嘅鎖匙窿一扭，又一聲「咔嚓」。佢手揸住門柄，一扭一推，道木門又係出奇地重。
小冰雖然身形嬌小，手瓜睇起上嚟無乜肉，但平時去地盤外展要推車仔開鐵檯搬重嘢，一啲都難唔到佢，但呢一道似乎係非一般嘅木門，小冰要用盡全身氣力去推，先勉強開到少少。
突然，小冰背脊被重擊了一下，整個人被打得貼上道木門上，木門順勢被呢道重擊力一拼推開，小冰背上感到一陣劇痛，並向前仆跌入單位內。
「唔好呀！」史提芬怒叫：「小冰你點呀……」見住權叔突然一腳伸向小冰背脊，史提芬激動掙扎，但刀尖壓喺頸上而傳嚟嘅痛楚，令佢又克制落嚟。
權叔推住史提芬走入單位內，一陣寒氣立即撲向史提芬面上，佢打咗個冷震，然後望住地上面嘅小冰。
「小冰﹗」史提芬再次叫住小冰，生怕佢已經暈過去。
「我無事……」小冰忍住背脊嘅强烈痛楚，勉強爬起身，佢覺得好嬲，從來都未試過比人咁樣踢，但又做唔到啲乜嘢。
權叔同埋佢哋兩個步入單位內，史提芬突然感覺到嗰隻箍住佢條頸嘅手鬆開咗，然後就被權叔用力推跌入去。
佢哋身後面嗰道厚厚嘅門被關上，整個房間漆黑一片。
幾秒後，權叔按一下牆上嘅電掣，橙黃色嘅燈光亮起，雖然整個間房霎時間比之前光，但史提芬同小冰喺橙黃色燈光下，都只能勉強睇到單位嘅情況。
「雪櫃？」史提芬睇到眼都定晒。
史提芬從來都無見過有咁多冷藏櫃喺一個單位入面！
眼前見到嘅冷藏櫃，同7仔嘅雪糕櫃十分相似，但不同之處係，體積比較大，而數量亦多好多。
橫列四個一排，共有五排，總計有二十隻。
由於呢個單位嘅樓底比起出面走廊矮咗一截，所以小冰留意到呢度裝咗假天花，而假天花上面有三個大出風口，源源不絕吹出强勁冷風，整個單位溫度很低，儼如一個大雪房。
小冰成身起晒雞皮，轉身面對權叔。但權叔眼神不懷好意，手中嘅鋒利嘅刀仔仍然指向佢哋：「行入去﹗」驚呆中嘅小冰彷彿聽唔到權叔嘅指令，同史提芬一齊企定定望住權叔。
權叔將刀仔向前一揮，步步進逼，小冰同史提芬都被嚇到。
「權叔呀，我哋唔壞人嚟㗎，我哋真係上嚟派套㗎咋，求下你放咗我哋啦，我聽日仲要返學見Professor…」史提芬邊喊住邊講，同時拉住小冰一齊向後退。
「唔係我唔放過你哋呀，我勸過你哋走㗎，你哋係都唔聽，呢啲嘢唔怪得我噃﹗」權叔越行越近，小冰同史提芬已被逼到埋牆邊。
「入房﹗」權叔用刀仔指一指右邊一間黑漆漆嘅房間，鐵造嘅閘門開著。
呢間房好黑，外面幾個燈泡嘅光照唔到入嚟。小冰雖然怕黑，但喺被威脅嘅情況下，佢並無任何選擇。
權叔再嚇一嚇，佢哋兩個只好乖乖走入黑房中，身影消失喺黑暗內。
權叔快手將房嘅鐵門拉上，鐵門同門框相撞嘅聲音大得嚇人，但聲音卻又消失得好快，亦好似無任何迴音，小冰覺得奇怪。
權叔關上呢道密封式嘅鐵門後，連僅餘嘅光線都被隔絕，房間一片死寂，除咗有一陣極之微細嘅摩打運轉聲外，一丁點雜音都無，靜到連史提芬嘅吞口水聲小冰都能聽到。
「佢困咗我哋喺度啊，點算好呀小冰？我唔想咁快死呀！」史提芬沮喪嘅聲線成為咗呢間房最響亮嘅聲音，佢仍然捉緊小冰，好怕一甩手就會唔見咗佢。
小冰亦無放開史提芬，怕黑嘅佢而家身處喺絕對黑暗又無聲嘅空間，全身感官都顯得十分敏感，即使只係被史提芬嘅袖口輕輕掂到，都足以嚇佢一跳。
「譚俏冰……定啲嚟……譚俏冰……無事嘅……」小冰嘗試强行令自己冷靜落嚟，佢深呼吸了一口氣：「我哋……行去牆邊先……」
史提芬點著頭，盲摸摸咁跟住小冰向前行。
小冰伸出一隻手側身慢慢向前摸索，同時問史提芬：「你身上仲有乜嘢喺度？」
史提芬比小冰問一問，猛然醒起自己褲袋入面仲有部電話：「啊﹗我仲有部電話㗎！我仲有部電話㗎！！」佢語帶狂喜，叫到慌死無人知咁。
「噓！明顯係個衰人見到我打緊電話，緊張到只係要我放低電話，唔記得你仲有一部，但我哋都唔可以掉以輕心，埋去牆邊，離遠啲個門口先。」小冰暗暗地笑出嚟，覺得權叔其實都唔係咁精明。
佢哋慢慢摸索，小冰終於掂到啲軟綿綿嘅東西，佢再用力按落去，手掌回傳返一個好實在嘅觸感。「呢度應該係牆。」小冰嘅語氣帶有幾分肯定。
佢哋兩個二話不說，即刻貼住牆身企，史提芬喺褲袋摷部電話出嚟，按住「Home」掣，屏幕亮起，小冰隱約見到喺佢旁邊有啲嘢出現。
一個人頭浮現喺小冰同史提芬嘅肩膀之間。男性，眼球突出，面頰凹陷，口部張開，而且舌頭伸出，郁都唔郁企喺佢哋後面。
「Shit，What the fuck！乜嚟㗎！」史提芬以流利嘅粗口將心中嘅恐懼發洩出嚟！小冰都被呢個突然出現嘅人嚇到喊出嚟。
每個人嘅忍受能力都唔同，再堅强嘅人去到臨界點，都一樣會頂唔順而崩潰。女人如是，男人亦如是。
雖然內心恐懼，但處於危急情況，人仍然會被本能反應驅使而選擇逃走。小冰同史提芬不約而同踎低，狼狽向前爬。史提芬爬過去攬住小冰，同時將電話指向前，屏幕嘅光照射住前面呢個男人。
暗暗嘅光線雖然令佢睇得比較辛苦，但都足以檢視眼前呢個嚇人男人嘅全身，個男人全身赤裸，喺呢個時候，史提芬發現呢個男人係雙腳離地，佢再沿住男人雙腳向上望，一條雄糾糾嘅陰莖正保持住向上勃起，甚是奇怪，史提芬再向上掃視上去。
「小冰，你睇下！」眼利嘅史提芬細細聲叫小冰留意男人嘅上半身。男人條頸被一圈粗繩圍住，而粗繩就一直伸向假天花上面。
呢個男人似乎已經被吊死。
「呀！」小冰發出一聲尖叫：「仲有幾個呀……」史提芬將電話指向其他地方。的確，房間內仲有幾個男人被吊死，全部都係貼緊牆邊，死狀恐怖。
小冰一數，呢間房一共吊住五條屍體，清一色男性: 一個精壯並且全身赤裸；一個則著住套裝，恤衫西褲黑皮鞋；一個衣著土氣，十足十自由行大叔；仲有兩個睇上去年紀較大，同權叔差唔多。
佢哋再望吓四周環境，房間四面牆壁完全被黑色吸音海棉覆蓋，地下則鋪咗厚地墊，難怪佢哋嘅叫聲可以消失得咁快。
房間嘅另一邊，亦有兩部冷藏櫃，靜靜座落於角落位置。摩打嘅運轉聲應該係嚟自呢兩部冷藏櫃。
小冰同史提芬已經完全屈服於呢個黑暗又恐怖嘅氣氛當中，攬作一團，不斷發抖。佢哋兩個年少無知，未見過死屍，之前從來無經歷過眼前呢種咁可怕嘅景象。
「行刑室」似嘅黑房，令佢哋產生恐怖嘅感覺，亦以為只會喺電影先出現呢種地方。
如今身歷其境，小冰同史提芬除咗驚之外，就只有驚。但佢哋真正嘅恐懼，源自於幻想自己會被掛喺上面，成為其中一個被吊死嘅人。
史提芬不斷左右移動部電話嚟照，佢哋兩個人目不轉睛地望住五條屍體，等咗好耐，都無任何特別反應，而出面嘅權叔似乎都離開咗。史提芬最先回過神，將電話螢幕反轉面向自己，打算報警。
電話屏幕上面右上角嘅天線符號顯示出一個「X」字樣。
「收唔到？點解呀？點解呀？我唔想死喺度呀！」當史提芬發現自己仲有部電話嘅時候的確係開心咗一陣，但宜家心情又再由高處跌返落嚟，不斷反覆問自己點解。
小冰都伸個頭埋去睇下部電話，個「X」字樣亦同時將佢嘅希望打沉。
「權叔根本就知道呢度無網絡，所以先由得你keep住部電話。」小冰企返起身，目光無離開過啲屍體，史提芬亦嘗試起身舉起電話，想睇吓會唔會收到通訊網絡嘅訊號。
當走去冷藏櫃方向時，小冰同史提芬都下意識地避開嗰五條屍體，保持一定距離。小冰完全唔知道佢哋係乜嘢人，死咗幾耐，同埋係咪權叔殺嘅，如果係，又點解要殺佢哋。小冰有太多疑問。
一個住宅內有廿個冷藏櫃已經夠離奇，再加上一個黑房，房入面仲有兩個，實在怪異到令人摸不著頭腦。
小冰嘗試打開其中一隻冷藏櫃，而史提芬則仍然搜尋電話網絡。
小冰先將黑色玻璃門推開少少，冷藏櫃內嘅白燈就立即自動亮起，佢吸一口氣，用力推開哂成道玻璃門，裡面嘅寒氣一次過湧出嚟，終於清楚見到裡面嘅情況。
空空如也。除咗底部有少少暗啡色嘅液體之外，冷藏櫃內乜嘢都無。小冰無閂返玻璃門，房間顯得光亮了一點。
小冰呼一口氣，然後行去第二個櫃。開始時佢亦只係將玻璃門推開少少，裡面嘅燈一樣亮起。
透過黑色玻璃窺探櫃入面嘅情況，小冰隱約見到好似有一大舊嘢喺裡面，佢再用力推開玻璃門。
喺呢個出奇寧靜嘅環境入面，突然傳嚟一吓尖叫聲。
小冰一邊指住冷藏櫃，一邊向後退，並跌倒喺地上。史提芬急急上前扶住小冰，發現佢雙手震得好厲害，仲開始喊起上嚟。
「無事㗎無事㗎……」小冰被史提芬緊緊抱住。佢瞪大雙眼望住史提芬，口裡面只發出尖叫聲，似乎失去咗說話嘅能力。
對於小冰見到嘅嘢，史提芬覺得十分奇怪，佢遲疑咗一陣，先決定行過去望一望。
「唔會㗎！唔會㗎！點解會咁㗎！！」史提芬抱住頭，聲撕力歇叫道。
小冰同史提芬見到冷藏櫃入面放咗一堆肉色嘅物體。
(待續)