全實景系列《香檳大厦 1:55 am 行人止步》重製版 (已完結): 第十五章：【一次機會】
1:55 - 香檳大廈B座 7/F C室窗外
手錶上嘅時間仍然停留係凌晨1點55分，阿Ken再望一次自己隻錶，搖一搖隻手，希望可以令時針分針重新運行 - 呢啲舉動通常都會發生係一般人身上，以為用力就可以令儀器恢復正常。
佢順道低頭望向腳下嘅地方，仍然係白茫茫一遍，仲感覺到空氣中嗰份寒意。
阿Ken同阿琛兩個人四隻手一上一下咁捉緊條麻繩。為咗避開怪物嘅視線，佢哋唔可以企直身體，唯有用腳尖踩住外牆上突出咗少少嘅石壆位，撐住自己嘅身體重量，踎喺大廈外面，希望唔會由大廈嘅七樓跌落去。雖然佢哋兩個都比較瘦削，向下嘅拉扯力唔算太強，但似乎耐力就唔係太好。
佢哋已經唔知道用呢個姿勢維持咗幾耐時間，阿Ken開始覺得兩邊膊頭同埋小腿極度酸軟，雙腳開始不停咁震，佢同阿琛講：「琛，唔得啦，我隻腳好攰呀…」
阿琛見到阿Ken對腳震得真係好緊要，佢立即爬低少少，單腳撩起阿Ken下面多出嚟嘅麻繩，一個快手捉實，繞住阿Ken兩邊大腿各一圈，再用力向上抽起，減輕阿Ken下墜嘅重量，但阿琛就要用多一倍嘅力去抽起條繩。
阿琛完全唔知道自己撐到幾耐，只有等房入面嘅怪物離開，先可以再入返去。不過佢似乎都高估咗自己嘅力氣，喺過度用力嘅情況下，雙手開始覺得麻痺。
佢向上望一望窗台位置，想將麻繩繞過窗框打結，咁樣就唔需要再捉實條繩，而阿Ken又可以借助窗框嘅力休息。「不如試下…」阿琛心諗。
阿琛慢慢將身體移到窗台正下方，單位嘅窗簾被風吹起，佢乘機探頭上去望一下，又立即縮返落嚟。
四隻怪物喺房間入面來回走動，其中一隻幾乎差少少就望到阿琛，如果真係被佢哋見到，睇怕都凶多吉少。
與此同時，阿琛聞到一股熟悉嘅燒燶塑膠味道由房間傳出，十分濃烈，佢記得以前喺大學宿舍聞過呢隻味。
「K煙？」阿琛疑惑：「似乎係喺嗰幾隻嘢身上面傳出嚟……」
宜家呢個情況，已經唔可以再奢望將繩縛喺窗框。阿琛好擔心，唔知仲要等幾耐，亦唔知阿Ken支唔支持到咁耐，又或者今次可能係佢自己支持唔住。
上一次阿琛只係吊咗係窗出面一陣，感覺上無今次咁耐，但今次身邊多咗阿Ken，要顧慮嘅嘢多咗。
阿Ken望住阿琛抽起承托緊自己重量嘅繩尾，覺得非常之唔好意思，但又唔知可以做啲乜。佢伸長條頸四周圍睇下附近有無其他地方可以落腳，發現下面六樓左邊有部冷氣機嘅外殼凸出，兩平方呎左右大小，似乎可以直接企上去。
「如果可以企到落去嘅話就可以撐多陣…」阿Ken心諗：「我唔可以連累阿琛都一齊跌落街㗎。」
佢拍一拍阿琛，然後指指下面，細細聲講：「琛，下面有位企呀﹗」。阿琛循住阿Ken指嘅方向望落去，諗咗一陣之後問：「個位雖然可以企到，但你點落去呀？」
「你放返條繩尾比我，我試吓爬過隔離。」阿Ken再指住左邊不遠處，一個本身應該係用嚟扣住去水渠嘅鈎，但而家條渠無咗，只係淨低突出嚟嘅U型鈎。
阿Ken停一停，再講：「如果跳到過去，我就可以用條繩扣住個鈎位，然後爬落下面。」佢望一望宜家企緊嘅石駁同U型鈎中間嘅1米距離，再吞一吞口水：「我……我應該OK嘅……」
見到呢個U型鈎，阿Ken就記得前年暑假，佢住嘅大廈裝修，當時啲師傅企係出面棚架換水渠，佢曾經多口問過關於呢啲鈎嘅特性，師傅話呢一種鈎通常都會用爆炸螺絲打入大廈外牆，緊扣住去水渠，而呢種入牆螺絲嘅咬力強，一粒就可以吊起七十公斤嘅重量。
「我都係得六十公斤左右，無事嘅。」阿Ken試圖說服自己。
「真係得？」阿琛再問一次阿Ken。
「點都要試下㗎啦，再咁樣吊落去我同你都會頂唔住。」阿Ken望住樓下個冷氣機位，亦望住睇唔透嘅白霧。
「咁好啦，你自己小心啲，萬一你失手，我就只有一隻手可以拉住你㗎咋。」阿琛心入面好緊張。
如果阿Ken過到去，的確可以解決到宜家嘅困局。落到去下一層，起碼可以睇下有無其他路逃走。如果只係死守係窗外，遲早會被怪物發現，又或者跌死。
阿琛鬆開阿Ken大腿上嘅繩，然後用近住繩尾圍住阿Ken胸口，再縛一個「單繩稱人結」。佢拍拍阿Ken膊頭：「你過到去，用條繩繞一下個U型鈎，我再放繩比你慢慢游落去。」
深呼吸一口涼涼嘅空氣後，阿Ken逐步向左移，直到離開咗窗口下方嘅位置，佢先敢慢慢企高少少，嘗試伸出左手去捉實U型鈎，但手伸到最盡都仲差半米嘅距離。
「無辦法，一定要跳……」阿Ken嘅隻左腳已經移到石壆盡頭，心諗：「要跳，就唔可以再捉住條繩……」
阿Ken只有一次機會。
跳到過去，就可以捉實個鈎；跳唔到過去，就直接跌落街。
縛住喺阿Ken身上嘅繩只係比起普通麻繩粗少少，無人可以確保條繩一定唔會斷。
「唔理得咁多，跳啦。」阿Ken雙腿微曲，身體向下一縮，借用有限嘅石壆做起跳點。
呢半米嘅距離彷彿好似條青馬大橋咁長。
阿Ken睇準時機，伸出左手及時捉實U型鈎，然後縮起條腰，雙腳垂直踩住堵牆。呢個姿勢比起剛剛淨係踩住石壆邊辛苦百倍，但腎上腺素嘅急升已經令阿Ken唔再覺得酸痛。
佢用右手小心翼翼咁將阿琛放長嘅繩圈落個鈎度，然後向阿琛做咗個OK手勢。阿琛拉斜窗口外面嘅繩，盡量再偷多啲位畀阿Ken。
麻繩圈實U型鈎後，阿Ken用力向下扯，檢查一下圈得夠唔夠力。當佢確定無移位或者無異樣之後，就鬆開緊握U型鈎嘅左手，再捉實麻繩。
阿Ken全身嘅重量都集中晒喺固定U型鈎嘅爆炸螺絲上，佢慢慢拉直身體，雙手緊緊揸住麻繩，一步一步游繩下降。
雖然睇電視就見得多，但阿Ken完全未試過游繩，到真係做嘅時候，感覺完全唔同，短短一層樓嘅距離，佢就已經跣腳三次。
跣腳嘅時候，阿Ken成個人撞落大廈外牆，佢强隱住痛楚，不發一聲，但額頭同面頰已現出一兩撻紅腫。
阿琛仍然踎喺窗台外，佢屏住呼吸，將頭伸出少少，睇實阿Ken慢慢向下游繩，好驚阿Ken會一時甩手或者麻繩會突然斷裂。
「雙腳要伸直呀！」阿琛心急地喺旁邊提點，但又唔敢太大聲：「撐實牆唔好彎起對腳呀！」但成句說話變晒虛音，阿Ken一句都聽唔到。
「OK，就到㗎啦，加油，掂嘅！」阿Ken自言自語，手心不停冒汗：「仲有少少咋！」佢望住腳底，只差一步就可以掂到冷氣機頂。
突然間，阿Ken感覺到手上面揸住條繩嘅張力消失，U型鈎下面嘅麻繩斷裂。好彩佢雙腳同冷氣機頂嘅距離十分近，可以順勢踩上去，「呯」一聲，喺寂靜嘅環境中顯得額外清脆。失去重心嘅阿Ken極力用雙手保持平衡，最後總算企穩：「謝天謝地，謝天謝地！」
不過，阿Ken呢一吓聲響引嚟嘅麻煩都唔少。阿琛一直望住阿Ken，但當聽到呢一吓響聲就心知不妙：「Shit！」佢回過頭望向窗邊，一隻怪物已經出現，俯視窗外嘅阿琛，仲散發住濃烈嘅K煙味。
「吼！」怪物嘅嚎叫吸引埋其他同類衝過嚟。
阿琛正正暱係窗嘅下方，怪物一伸手就可以摸到佢。果然，最前面嘅怪物即刻跳上窗邊嘅床，出手想捉住阿琛嗰個佈滿汗水嘅膊頭，但好彩隻怪物甩咗手。敏捷嘅阿琛一個閃身，向左邊移開兩步。
「好險﹗」阿琛望住嗰隻甩開咗嘅蒼白色手臂，上面滿佈點點，而且仲有一撻撻唔太明顯嘅瘀青色。「咁多針窿嘅？」阿琛嘩然。
阿Ken聽到吼叫聲後立即抬頭，望見阿琛已經退到去石壆盡頭，窗口嘅怪物正在揮動雙手，張牙舞爪。
擔心嘅阿Ken四周圍望，雖然唔知道自己搵緊乜，但想睇吓有無其他嘢可以用：「有無石仔？有無晾衫竹？有無繩？」情急之下阿Ken踎低身，伸手去摸冷氣機下面嘅位置，發現有一隻半開嘅窗，仲居然可以畀佢拉開。
「一個無窗花嘅窗，只要小心啲爬落去，似乎可以逃生……」當阿Ken一發現到呢點，就立即企返起身同阿琛講：「琛，跳過去呀﹗我拋條繩畀你﹗」
阿琛絕無耽誤半秒時間，利落地起跳，將自己掛喺U型鈎上面：「喂，之後點呀？」
「你睇住，我宜家拋條繩上嚟，你縛實係個鈎上面，然後爬落嚟。」一講完，阿Ken喺麻繩啱啱斷開嘅位置打結，然後拋上去。
阿琛單手揸緊U型鈎，右手一甩就接住條繩，唔畀佢有跌落街嘅機會。阿琛諗返起以前晚晚都喺大學嘅運動中心攀石場進行嘅訓練，估唔到宜家居然要活學活用。
「呢度唔容許失手，一失手就無命。」阿琛再三咁提醒自己。
阿Ken見到阿琛準備落嚟，佢自己都開始向下面個窗口進發。雖然窗門打開嘅角度比較難入，但冷氣機嘅狗臂架提供咗個好好嘅扶手位，阿Ken三爬兩撥就已經爬到去窗口旁邊。呢個時候，冷氣機上面傳嚟一下響聲，佢預計阿琛都已經落到嚟。
阿Ken安全入到去單位之後，就讓開條路畀阿琛爬入嚟。佢仔細望清楚周圍環境：「貨倉？」。偌大嘅空間入面放咗幾行四層高嘅鐵層架，一行一行排列得整整齊齊，層架嘅每一層，都放滿一個個厚實嘅紙皮箱，或者係木箱。
記憶中香檳六樓嘅前半部份，不論左邊定右邊嘅單位外面，都應該係鎖實晒嘅鐵閘，而裡面就係被棄置咗嘅一樓一劏房，何來有咁大個貨倉？
阿Ken努力地回憶著，不得要領。
說時遲那時快，阿琛已經跳入單位內，仲順手閂埋個窗，怪物們嘅吼叫聲立即隔了一重。
「我哋……宜家應該喺幾多樓呀？」阿Ken呆一呆，然後開口問阿琛。
仲未唞完氣嘅阿琛雙手叉腰，答：「6B。」答完後繼續大力索氣。
阿Ken望實阿琛，驚訝佢對呢個地方嘅瞭如指掌，但阿Ken自己就好迷惑，明明記得一開始喺八樓被拉入去床底，跌落去漆黑又血腥嘅房間，仲卡住咗喺七樓地板，然後就係嗰間八十年代嘅單位醒返，宜家再爬落一層去到呢個貨倉。
阿Ken肯定自己下降咗三層，八減三明明等如五，點解阿琛咁肯定呢度係六樓嘅？唔止發呆，阿Ken仲滿臉疑惑。
阿琛自顧自地拍住身上面黐滿晒嘅灰麈，並無理到阿Ken。汗水、血污加上塵埃，將身上捽到一撻二撻咁。
眼見個貨倉似乎無乜嘢危險，阿Ken想好好咁休息一吓，順便搞清楚阿琛同呢度究竟發生咩事。
「Ken，跟我過嚟呢邊。」恢復狀態嘅阿琛帶領住阿Ken走入呢個偌大嘅貨倉，穿過筆直嘅層架通道，去到盡頭係一個類似偏廳嘅地方，放咗兩張梳化同茶几，右邊有一個辦公室。
「全麗內衣有限公司？」阿Ken行去其中一張大梳化前面，讀出梳化後面掛住嘅大招牌：「香檳幾時有間咁嘅公司喺度㗎？」
「阿琛？」阿Ken得唔到回應，阿琛似乎聽唔到。
那邊廂，阿琛走咗入偏廳旁嘅洗手間，按一按燈掣，鎢絲燈閃咗幾閃，終於亮起。
洗手間唔係好大，只得兩個廁格，一個洗手盆同一塊鏡，仲有兩個殘舊嘅「紅A牌」痰盂喺地下。
阿琛走到洗手盆前，扭開水龍頭，混濁嘅水嘩啦嘩啦地流出，佢感到腳下一濕，洗手盆無接駁去水喉，水直接流到地面，濺濕咗對腳同對鞋。
阿琛無理會啲水有幾污濁，腳底下有幾濕，佢只係想盡快洗乾淨面同身上嘅血漬同污垢。
佢用手兜住水，潑向自己塊面，打一個冷震：「好凍……」
凍水令阿琛清醒過嚟，佢不停洗擦，望住鏡嘅同時，腦海中亦浮現好多過去嘅影像。
同屋企人去大嶼山參拜大佛……
同大學嘅死黨喺老蘭劈酒劈通宵……
喺公司同啲團隊同事慶生……
攞住花喺香檳樓下等Yolanda放工……
「Yolanda……」阿琛回想起好多同Yolanda一齊嘅時光，心裡面不其然問：「你宜家喺邊？」
另一邊廂，阿Ken獨自走入去辦公室內，睇下有無乜嘢線索可以幫佢搞清宜家個處境。
辦公室唔大，只有六張寫字檯，每張檯上面都有一部電腦，阿Ken留意到電腦嘅款式好舊，主機上有"Intel Pentium"商標。
除咗電腦，檯面上仲有好多檔案，夾雜住一張張收據同訂單，亦有好多貨運資料。
阿Ken睇咗一陣，慢慢撥開晒啲文件，發現下面有一個用嚟墊檯嘅月曆，最後一個寫有紀錄嘅日期係8月31日。
「九龍殯儀館東海堂，7點，老闆喪禮。」阿Ken默念著呢一頁上面最後一日嘅活動，然後再揭去後面嘅月份，就無再見到任何記事。
而當佢睇到月曆右上角嘅年份時，實在唔敢相信自己眼晴：「1993年？」
阿Ken翻開頭先撥開晒嘅文件記錄，粗略地睇下，發現大部份文件都係記錄係1993年8月之前。
佢再走去隔離嘅檯摷出其他文件一看，心中驚奇：「搞乜鬼呀……」
「呢個貨倉似乎被丟空超過廿年以上？」阿Ken心中滿佈疑問：「但又唔似喎，呢度嘅嘢雖然款式好舊，但又好新淨，如果封咗廿年，點會一粒塵都無。」佢用手指摸一摸電腦顯示屏，好光滑，的確係一粒塵都無。
阿Ken覺得呢度嘅氣氛同樓上七樓個80年代單位好相似，雖然一個人都無，但就好似只係剛剛離開咗個單位咁，好詭異。而且明明印象中呢度係廢棄咗嘅姐姐仔劏房，無理由係一個咁大嘅貨倉。
「阿琛！」滿腹疑惑嘅阿Ken又再一次呼喚阿琛。
「係！」阿琛終於回應，仲快步走過去辦公室嗰邊。
身上無晒血漬同污垢嘅阿琛，畀阿Ken嘅感覺仍同印象中相差一段距離，印象中嘅阿琛無宜家咁瘦，亦無咁蒼白。阿琛消失咗嘅呢幾個月，究竟經歷咗啲乜嘢事？阿Ken好想知道。
「你無事嘛？」阿Ken坐喺前面嗰張油壓櫈上休息，捽捽仍然紅腫嘅額頭。
「無事，你應該問下自己有無事先啱！」阿琛指住阿Ken個額頭笑道：「你第一次玩游繩？」
阿Ken點點頭。阿琛豎起大姆指：「你好勁呀！我之前都唔敢唔做安全措施就去冒險……今次跌唔死真係一個奇蹟。」
「咪咁講啦，如果唔係你救咗我，怕且我已經畀嗰啲怪物咬死咗啦！」阿Ken謙虛地說。
「唔知…有幾多個人被咬死咗…」阿琛顯得憂心忡忡，心入面記掛住Yolanda。
佢曾經見過嗰班怪物撲向幾個人，然後失去理智咁瘋狂噬咬撕扯，自己就好唔容易先脫到身。
成功地走甩咗兩次，唔知下一次仲有無咁好彩？
「唔知黃經理點呢……」阿Ken則擔心經理嘅安危。
「係呢，阿琛，你有無見到黃經理？」阿Ken疑惑地問：「你知唔知經理上咗嚟搵你呀？」
「經理都喺香檳？」阿琛打咗個突：「經理無啦啦上嚟搵我做咩？」
「吓……」對於阿琛嘅回應，阿Ken十分詫異：「你完全唔知道發生乜嘢事？」
「……你哋……知道我同Yolanda嘅事啦？」阿琛知道外展員唔應該同姐姐仔拍拖，所以顯得有啲尷尬。但其實平時佢都只係放咗工，先會上嚟搵Yolanda，公司唔應該干涉佢工餘時間嘅私人生活：「我真係鍾意佢，唔關任何人事，而且我係off duty先至搵佢，無犯規㗎﹗」
阿琛快快地講完一輪，兩個人都靜咗。
「經理想追究？」阿琛試探式口吻問阿Ken：「佢想炒咗我？」
阿Ken有啲疑惑，唔知道應唔應該講，但最終佢都一字一頓咁透露：「你已經辭咗職喇。」
「咩話？我幾時有辭職呀？我情願唔做份full time都唔會辭呢份工啦，我無理由會辭職㗎！」阿琛好震驚，明明無提出過唔做，唔知道點解阿Ken會咁講：「你係咪夾埋黃經理玩我呀？」
「黃經理畀咗你話唔做嘅WhatsApp對話我睇，佢仲叫我幫手頂埋你無返嗰啲更。」阿Ken慢慢回應：「阿琛，其實你呢兩個月去咗邊？」
「乜嘢去咗邊呀？我咪係度囉，我前日先同你出完北角皇冠大廈外展，你唔係唔記得……」阿琛實在係一頭霧水：「咪住咪住，等等先……你話乜嘢兩個月呀？」
「你…無返工兩個月啦……」阿Ken心中冒起一陣寒意。
阿琛突然感到一陣天旋地轉，一句都聽唔明阿Ken究竟講緊啲乜。乜嘢辭工，乜嘢兩個月去咗邊，佢完全無印象發生過乜嘢事，淨係記得尋日同史提芬出完將軍澳地盤外展收工後，就買咗個Tony Wong蛋糕同一枝Brancott Estate上香檳搵Yolanda慶祝相識一個月紀念日。
「無理由嘅，我尋日都仲有返工，係放咗工先上嚟搵Yolanda。」阿琛好堅持自己嘅講法，認為搞錯嘅係阿Ken，笑住咁拍拍阿Ken膊頭：「唔好玩啦阿Ken，愚人節都過咗成個月啦﹗」
聽到阿琛講呢一句，阿Ken嘅恐懼感繼續膨脹：「……愚人節已經過咗三個幾月，今日係7月9號喇……」佢想攞部電話出嚟，俾阿琛睇佢同女朋友係六月中去馬來西亞影嘅相，赫然記得部電話一早已經無電，放底咗畀小冰佢地，只係借用Yolanda部電話入嚟搵阿琛同經理。
而Yolanda嘅電話已經失落咗喺嗰個未知嘅黑暗區域入面。
「7月9日？」阿琛好認真咁問多一次阿Ken，希望個答案唔係真。
阿Ken定一定神，原原本本咁將香檳外展、閉路電視嘅影像、黃經理嘅發現、權叔嘅幫手到8樓C室入面見到嘅嘢，好詳細咁講晒畀阿琛知。
聽完之後，阿琛成個人靜晒，坐咗喺地下，就咁靜靜地坐咗喺度。
阿Ken陪住阿琛一齊坐低。似乎佢哋都意識到自己被困於香檳大廈，而且喺呢刻見到嘅環境同事物，同佢哋一向認知嘅香檳大廈完全唔同。
「你有無試過離開呢度？」阿Ken問。
「我試過搭𨋢落去，但𨋢唔郁，我有試過行樓梯落去，但就遇上嗰啲怪物，只能夠走返上嚟。」阿琛嘆氣：「我未落到過地下。」
「咁你點入嚟㗎？」阿Ken再問。
阿琛慢住眉頭，苦苦思索，卻又沉默不語。
阿Ken等呢一個回應，好似有一個世紀咁長。
阿琛思前想後咗好耐，最終抬起頭回答：「唔知道。」
阿琛真係唔記得自己點解會係呢度出現，佢最後有印象嘅畫面就係同Yolanda攬住一齊飲酒睇電視，然後一刻春宵。
阿琛答完唔知道之後，兩個人又回歸沉默。
當一個人處於一個寂靜嘅環境，就好容易留意到身邊嘅聲音嘅轉變，洗手間原本傳來水龍頭嘩啦嘩啦嘅流水聲，突然之間停止了。
佢哋都留意到。
(待續)