全實景系列《香檳大厦 1:55 am 行人止步》重製版 (已完結): 第二十七章：【暗峙】(下)
05:32 香檳大廈B座 5/F B室
雷萬鈞只能繼續拍住膊頭安慰佢，佢雖然對阿權嘅家事略有所聞，但唔係有必要嘅事幫手的話，佢都唔管得太多。始終一家唔知一家事。
「阿權……過咗去啦，你放開啲啦……」雷萬鈞都唔知可以講啲乜嘢。
「我放唔開呀﹗」權叔心中嘅悲傷同鬱結無以發洩，開始爆發出來：「我真係放唔開呀！」
「點解啲黑社會可以咁賤，要搞就搞我，點解要搞我啲仔女？又走粉又放數，又要起埋啲色情架部，瓣瓣衰嘢都做齊，自己做都算啦，又要踢埋人入會，到底有無廉恥！」權叔一口氣說出嚟，講到「無廉恥」三個字時，更一拳打落旁邊個柚木書櫃上。
權叔打嘅力道一啲都唔細，書櫃被打嘅位置隱約見到有少少凹陷。
「阿權……」雷萬鈞心中有一陣異樣，但仍然不形於色，有一個想法正在佢腦海中無限地放大。
「我真係想佢地死！」激動過後，權叔望住雷萬鈞，又再咽嗚起來，並捉實佢隻手痛哭起來：「邊個累過我仔女嘅人，我真係好想……好想佢地可以深深體會……失去嘅感受！」
雷萬鈞表面上沒有任何反應，但年屆六十嘅佢，頭腦仍然係十分之清醒，佢知道今次應該係一勞永逸嘅好方法。
呆了半响，雷萬鈞緩緩地問著權叔：「失去乜嘢呀？」雷萬鈞試探著。
「命！」權叔斬釘截鐵地道：「呢啲社會嘅寄生蟲係好應該消失！」
權叔講到咬牙切齒，而雷萬鈞則心中暗叫了一下好。
「……阿權……」雷萬鈞拋出誘餌：「如果……我幫您……實現呢個想法呢？」
權叔聽畢，面上隨而換上充滿疑惑嘅神色：「你……我唔係好明乜嘢意思？」
「你想報仇嗎？」雷萬鈞擰轉身，淡淡的拋出一句。
※※※※※※※※※※※※※※※※※※※※※※※※※※※※※※※※※※※※
「你想報仇嗎？」差不多廿年前大老闆嘅呢句說話，言猶在耳。
由嗰日起，權叔無再做雷萬鈞嘅保標，而轉行做了一個看更，香檳大廈嘅看更。而由嗰年起，香檳大廈亦都唔再係平實嘅大廈，而係罪惡嘅溫床，權叔成了溫床中嘅潛伏者。
「有乜嘢好得過要報仇唔需要出去搵仇人，而係仇人自動送上門。」權叔慨嘆著。
權叔好清楚知道，以大老闆雄厚嘅財力，可謂「要風得風，要雨得雨」，要令到一幢大廈變得腐敗，一啲都唔難。
1997年前後，香港人有能力嘅走得的都走。而大老闆命人從好多唔同途徑，收購一部份香檳大廈嘅單位，成為一個隱形嘅單一「大業主」。佢再將單位透過中介公司平價租出，吸引咗一批黑幫租用來經營「各行各業」。自此，香檳大廈唔駛一陣就發展成為一幢蜚聲國際嘅夜生活場所，同時亦都成為黑幫嘅據點。
而喺呢幢充滿黃色事業嘅大廈之中，有兩個單位暗地裡成為懲奸儆惡嘅「綠洲」，起碼到宜家呢一刻權叔仍然係咁諗。
「將所有惡人清洗得一乾二淨！」權叔將佢心入面嘅傷痛，化成清洗嘅動力，而且一直堅持咗19年，而大老闆就成為佢背後嘅唯一支持者。
權叔放低手上把槍喺檯面，望住自己已經皺曬皮嘅對手。呢雙手喺初初頭幾年，仍然係孔武有力，仍然可以把人扼斃，直到佢開始覺得年紀越大，再發唔到力時，佢先接受到使用輔助工具嘅來殺人。
除咗呢度呢個「綠洲」之外，大老闆仲為權叔提供好多設備，只要權叔用得到，大老闆一定悉數提供，諸如機械及冷藏設備、監控系統、化學劑，甚至需要裝修時，大老闆亦幫權叔安排。
大老闆只對權叔有兩個要求：1.整件事只能夠得佢一個知，得權叔一個人做；2.權叔以後唔可以再直接聯絡大老闆；
喺互聯絡未發達之時，報紙嘅欄目廣告成為咗佢地暗地裡溝通嘅橋樑，而近十年，權叔都開始使用討論區單方地向大老闆提出需求，而大老闆只要過兩日，就已經將佢想要嘅嘢安排畀佢。
喺咁多年嚟權叔親手處理過嘅人有嫖客、有賭仔、有喺呢度匿埋吸毒嘅道友、有販毒嘅、有放數嘅、當然呢啲人好多都有黑社會背景。一直以來，殺死呢啲人對權叔來說一點內疚感也沒有，而佢一直都認為自己係替天行道，還佢已逝去嘅子女一個公道，做一個黑暗中的騎士。
喺呢度死亡嘅每一個人，都係無人會留意到佢，就算真係有人查，最多都只會係當佢失蹤人口處理。就算係殺人當中最難處理嘅屍體，權叔一樣可以令到佢消聲匿跡。
營造出一幢鳳樓，然後喺鳳樓入面一點一點地殺死經營嘅黑幫，以及墮落咗嘅人，聽上來似乎係匪夷所思，但已經19年了，權叔從來未被人懷疑過。
常言道：「最危險嘅地方亦都係最安全。」權叔暗自笑了出來，卻又立即皺起眉頭，情緒十分複雜。
「以往我做過咁多次，全部都無聲無息，無手尾跟！」權叔一路回想著一直以來嘅工作都極之順暢，即使當中要過渡大廈大維修嘅期間，佢都仍然係處理得十拿九穩。
「宜家居然衰喺你呢個死𡃁仔手上，頂！」權叔咬牙切齒，大力踢了旁邊嘅茶几幾下，發出響亮嘅呯呯聲。然後咬牙切齒地走向單位角落裡嘅位置，打開了一部Notebook，坐了下來。
權叔雙手按住鍵盤不斷發抖。電腦一直都沒有熄，一打開就已經係個討論區網頁，佢對住個屏幕沉思著。
※※※※※※※※※※※※※※※※※※※※※※※※※※※※※※※※※※※※
門口外面嘅阿超揸實枝槍，手心卻已經出晒汗，突然聽到屋內傳出響聲，當堂嚇了一跳，喺後面嘅陳盈盈同樣被嚇到彈起。
「唔好咁緊張…」陳盈盈雙手按住阿超膊頭，想嘗試令阿超冷靜一點，但卻發現自己連手都震埋。佢地兩個都係第一次面對突如其來嘅衝突，腦海中不其然想到自己中槍嘅畫面。
「阿超，你嗰邊睇到啲咩呀？Over﹗」對講機中傳來阿文嘅聲音。
「我地呢邊淨係見到地下有啲光之外，乜都見唔到，木門好似係……虛掩……」阿超伸個頭出去走廊裝一裝，然後又縮返個頭返嚟：「阿文，你宜家喺邊呀？」
「我喺Lift口大堂附近，對正A室單位道門。」阿文回道。
「我地…宜家點做呀？」阿超透過對講機問阿文。
呢個時候，警署電台傳嚟孫麗把聲：「你地可唔可以確認到槍手到底有幾多人？」
「暫時只係見到阿伯一個，單位內嘅情況未知。Over﹗」阿文回應。
「阿文，喺安全嘅情況下盡量了解裡面係乜嘢環境，得唔得？」孫麗沉實地吩咐著。
「我地盡力啦，麗麗姐你快啲叫人嚟Backup我地﹗Over﹗」阿文覆著，心入面其實未諗到有乜方法。
通話結束，阿文、阿超同陳盈盈陷入沉默之中，兩組人隔著十幾米嘅距離，監視住同一個單位。陳盈盈覺得心急如焚。
一分一秒過去，師兄遭遇不測嘅可能性就會更大，宜家眼前呢個阿伯好明顯係最大嫌疑，但佢手上有武器，又唔可以輕舉妄動。
陳盈盈望住手上部警署電話，如果唔係剛剛用呢部電話打多次被師兄，睇怕永遠都唔會發現到個阿伯有問題。
「等等！」陳盈盈靈機一觸，用阿超嘅對講機聯絡阿文：「阿文，你電話幾號呀？」
「下？做咩呀？」阿文被陳盈盈突如其來嘅問題搞到亂晒，諗咗兩秒先講得出：「52268547呀！」
「你留意電話，我宜家Whatsapp你！」陳盈盈快速按動部警署電話，唔駛一陣，佢就已經用警署電話撥打視像通畀阿文。
電話屏幕上閃出陳盈盈俏麗但緊張嘅臉孔。「我見到你啦。」阿文應道。
「OK，阿文你聽住，我宜家會將我呢邊嘅電話伸入A室單位內，你cap低你嘅電話畫面。」陳盈盈繼續吩咐著。
「你咁近伸入去好危險，有乜事你會走唔切㗎！！唔得唔得……」阿文向陳盈盈表示呢方法行唔通。
「你唔駛擔心啦，有阿超同你枝炮幫我睇住嘛，更何況……」陳盈盈係鏡頭前展示咗兩枝地拖棍：「我喺附近見到呢枝嘢，我會將部電話縛實喺上面先再伸入去。」
「唔好猶豫啦，救人要緊啊師兄！」陳盈盈無再等阿文回應，逕自準備著。
阿超喺旁邊聽到陳盈盈嘅計劃，卻不禁擔心起來：「我地……真係唔等增援呀？」
陳盈盈心入面曾經有一絲掙扎，到底應該唔應該等EU嚟到接手，但師兄宜家生死未卜，而且有李Sir喺度，陳盈盈估計就算孫麗要求增援，都會被李Sir阻攔一啲時間，到時EU上得嚟情況或者都已經唔同了。
「睇下點先啦！ 」陳盈盈決定見步行步。
佢拆咗自己頭上面嘅髮髻，除咗兩條橡筋出嚟，將部警署電話綁定係地拖棍嘅一端。
陳盈盈深深吸了一口氣，對住電話講咗句：「我出發了！」然後就攝手攝腳走出去走廊講。
阿超跟住陳盈盈後面，雙手緊握住槍垂低，佢想搵個再有利啲嘅位置監察單位情況，宜家佢地唯一佔優嘅係：「單位木門係向內打開，如果有乜嘢係單位內出現，都需要先拉開門，因此佢地都可稍佔一兩秒嘅先機。」
有時，只要一兩秒嘅時間，就已經可以決定一個人嘅生死。
喺另外一邊嘅阿文一手攞住手部電話，另一住手握住槍，因為持續咁大力握槍而開始覺得有啲手軟。佢稍微伸個頭望向A室，陳盈盈已經到達A室門前。阿文望返住自己部電話，畫面搖晃不定。
正正因為阿文之前放低咗枝電筒頂住道木門，木門唔能夠完全閂埋，形成一條門罅，陳盈盈小心翼翼咁將枝地拖棍伸入A室內。陳盈盈睇唔到鏡頭，只能憑感覺移動枝棍。
佢有諗過其實個阿伯一直喺門後面，電話一過咗道門就會影到個阿伯，所以佢一直都好留神阿文嘅反應，只要有乜動靜，陳盈盈就會作出防禦。
鏡頭一直移入屋內，一直保持住正常成年人高度嘅視線，阿文留意到單位內嘅光線並唔係好光，主要光源都集中係左前方一排類似電視屏幕嘅物品當中，因為鏡頭有啲搖晃，阿文唔係睇得好清楚到底係乜嘢。
「揸穩啲，睇唔到呀！」阿文細細聲咁叫出嚟。
「O...K...！！」陳盈盈嘅汗珠及雨水流到佢額角及眼角，並吃力地回應。因為無固定支點嘅關係，陳盈盈覺得棍頭部電話越嚟越重，佢要好用力先平衡到枝棍。
鏡頭慢慢地無咁搖晃，阿文可以清楚咁辨認單位內情況。左手邊有幾排閉路電視嘅螢幕，幕前有一組控制台，有把手有按鈕，仲有一支好似槍嘅物體放喺把手隔離，旁邊有個茶几，一疊報紙或者喺雜誌喺茶几上，屏幕嘅對面係一排梳化，梳化旁邊一部電視，電視頂有啲啤酒罐之類嘅物品。再遠少少有道門喺度，門係打開，內裡黑漆漆的。過咗道門嘅後面位置仲有啲光，阿文睇唔清係乜嘢，不過就咁睇似乎無其他人係單位內。
「個阿伯呢？」阿文努力喺細細嘅電話畫面上搜尋嗰個持槍阿伯身影，但單位唔夠光，阿文睇得好辛苦。
突然喺單位最入嘅地方，喺啲佢唔能夠辨認到嘅光源前面，有個人頭擺動著，而且隱約見到個人喺光源前面嘅位置，用手摸索一啲嘢。
唔駛兩秒時間，阿文已經領悟嗰個人做緊乜嘢：「打緊字，喺部電腦前面。」
單位內只有一個人，剛剛向佢地開槍嘅阿伯，返入單位之後，居然走去坐喺電腦前面打字？一個剛剛對住警察開完兩槍嘅阿伯，絲毫沒有半點緊張，彷彿好似無咗件事咁。
阿文諗唔明點解個阿伯會有咁嘅舉動，但佢見到呢個畫面令到佢好不安，好似隱約有啲嘢會發生。
突然間，阿伯企咗起身，行咗出嚟房間嘅中央位置，正正望向大門方向，阿文見狀，心裡狂跳。
「佢……佢睇到我地……」阿文望實部電話屏幕，口裡說著：「五、六步距離左右。」
阿伯望定門口方向，一定會見到部電話連同枝棍郁郁下，唔會見唔到。
聽到阿文講話阿伯睇到佢地，陳盈盈心頭一震，卻又顯得七上八落：「到底係退定唔退？」阿文淨係話佢見到部電話，但又無繼續講其他嘢，到底應該點做。
「等等，佢無動靜……」阿文簡單地講咗一句：「咪住，等等……」
陳盈盈一直唔敢放鬆，大氣都唔敢用力抖，生怕有任何舉動都會刺激到個阿伯。
「佢攞起槍！佢攞起槍！」阿文急聲高叫。阿超聽到阿文咁樣叫，同時也叫道：「Take cover!」並欲拉住陳盈盈往後退。
正當陳盈盈準備抽回電話之際，阿文又叫：「等等……」接著一秒，阿文直頭撲出走廊嚟叫道：「唔好呀！！」
「呯」的一聲巨響，穿過門縫傳出來，將毫無預警嘅陳盈盈同阿超嚇個半死。陳盈盈本能地縮了手擋住自己面前，地拖棍連電話跌係地上。阿超抱住陳盈盈腰向後拉，側過了一邊面。反而阿文係旁邊衝上來，一腳踢開道木門。
門一打開，一陣濃烈嘅火藥味混和血嘅味道一涌出來。阿文快速地執起自己支電筒，挺著槍衝了入單位內。
阿文吸了一口氣，屏住了呼吸，望定單位內仲會唔會有任何動靜。
除咗地上瞓低咗個人之外，單位內無其他人。而地下瞓低嘅，就係啱啱喺電話裡睇到嘅阿伯。
個阿伯右手反方向地握住槍，疊咗係心口上面，口部打開，頭底下滲滿紅紅白白色嘅液體。
個阿伯死了。
權叔吞槍自殺了。
阿文第一次見到一個人喺佢面前吞槍自殺，嗰種震撼令佢一時三刻講唔到嘢。吞槍自殺，可以確保子彈能快速經過腦幹，達到即時及必然嘅死亡，只有下定決心嘅人先會採取呢一種不可逆轉嘅方式結束生命。
隨住阿文衝咗入屋，陳盈盈及阿超都緊隨其後。阿超摸了摸門邊牆上面嘅燈掣，亮著了成間屋嘅電燈。
最先吸引到陳盈盈留意嘅係係不遠處牆上嘅幾排電視螢幕。陳盈盈只望了一眼地上嘅阿伯，便逕自繞過去察看。佢心中只有一個目標：「搵返師兄出嚟﹗」
牆上係四排入牆式電視，分別播放著唔同地方嘅環境，陳盈盈知道嗰啲係閉錄電視影像，但唔知影住邊度。其中有個地方影住好多冷藏櫃，有個地方係影住兩個類似浴缸嘅嘢，仲有一格螢幕播住一個好大嘅地方，有半個天花塌下，有啲人瞓咗喺地上面，有啲則掛住喺牆邊……
「啊﹗」陳盈盈驚呼出來。佢用手指摸住其中一格電視螢幕，雖然影像較細，但佢仍然睇得出掛喺牆上面嘅其中一人，就係佢想搵嘅人。
「師兄被吊住喺度﹗」陳盈盈第一個想法就覺得師兄掛咗喺牆上面：「吊頸？」
一諗到呢度，陳盈盈幾乎成個軟晒，佢一直擔心師兄出事，如今真係出事了。
佢再望返住檯面上，一組組按鈕佢完全唔知用嚟控制乜嘢，其中有一個寫住「Progressing 」嘅按鈕亮起紅燈，旁邊就係把手，佢將把向反方向拉，並留意住螢幕上面有無嘢郁動。
「有嘢郁緊？」正在查看緊阿伯屍體嘅阿超突然抬起頭望住陳盈盈，佢聽到少少機械嘅聲，同埋感覺有嘢郁動緊。
「係呀，喺上面……」阿文一邊收埋槍，一邊擰轉身望住後面牆角天花板嘅一組東西。
一組巨大嘅棘輪系統，安裝喺牆角之上，正在緩緩轉動，一條金屬鏈正由棘輪系統帶動著，穿過牆壁到隔離單位。
陳盈盈轉頭望返去屏幕，掛起咗嘅嗰幾個人正在慢慢被垂低。「喺隔離呀！佢地喺隔離呀！」陳盈盈急不及待衝咗出去走廊，直奔隔離B室單位。
B室鐵閘門同普通家用嘅門一樣，托高鎖頭下方開門栓就可以打開，陳盈盈好快就趟開鐵閘門，但第二道木門卻絲毫不動。「道木門鎖咗呀！」佢心急地大叫，引得阿文同阿超立即走過去睇下。
「阿盈你點呀？」阿超第一個撲出嚟睇下發生咩事。
「道木門要用鎖匙先開到呀……」陳盈盈心急如焚：「嗰位師兄喺裡面啊！！」
「頭先我見到個阿伯有搵鎖匙開A室嘅門，我返過去搵下……」阿超轉過身正打算返入A室，卻被阿文兜住返轉頭：「搵得嚟人都死咗啦，夾手夾腳爆開佢啦！」
說畢，阿文拉住個鐵閘外框，一腳伸落道木門門鎖附近位置，「呯」的一聲，回音又沉又實。
「咁實嘅？」阿文加重力道踢落去，道門只鬆咗少少，踢得十幾下，阿文開始感到腳痛，遂換阿超繼續。
與此同時，陳盈盈再次掹走咗阿超組對講器聯絡電台：「Calling電台……我係PC21301陳盈盈，我需要白車兩架，現場係金巴利道香檳大廈5/F B室單位，持槍嘅疑犯頭部中槍，無生還跡象，另外仲有三位情況未明，快啲叫車嚟呀！」
「阿盈！您地無事嘛？」對講機嘅一方傳來寶哥嘅聲音。
「 我哋冇事呀！快啲幫我地call車呀！快啲呀！無時間講啦！」 通話完畢，陳盈盈掉咗組通話器落地，過去同阿超一齊踢門。
佢地輪流換咗幾轉，道木門嘅鎖頭終於被佢地踢爆，甫一撞開門，冰冷嘅空氣直湧出來。陳盈盈最先衝入單位，見到十幾部冷藏櫃整齊排列係室內，感到怪異，雖然佢之前已經喺閉路電視上見到。
「喺前面……」陳盈盈繼續往前走，不遠處嘅右方有道鐵製嘅趟門，已經打開咗，佢快步走入去，就已經見到半塌下來嘅假天花，同埋地上面橫七豎八瞓喺度嘅人。
其中三個人條頸被圈上了一條粗麻繩，當中一個著住件黑色風褸，陳盈盈一眼就認得係師兄阿謙。
「師兄！」陳盈盈尖叫了出來，一個箭步跣過去睇下師兄嘅情況：「拜託你唔好死呀！」一邊嗌一邊拍打住佢塊面。
任憑陳盈盈點想拍佢，阿謙依然毫無反應。頸上嘅粗繩緊緊纏了一圈，陳盈盈立即解開，俯伏係阿謙胸前，感受一下仲有無氣息，並且摸索住條頸嘅動脈。
「乜都無！乜都無！」陳盈盈啲眼淚就快湧住出眼框。佢撥一撥啲頭髮，吸了一大口氣，揑住師兄個鼻，擘開佢個口，吹一口氣入去。
佢眼尾亦見到阿超同阿文兩個，都開始向另外兩人做心外壓嘅動作。
三個警察，在幫三個剛被問吊嘅人做緊CPR(心肺復甦法)。CPR一旦開始咗就唔可以停落嚟。
陳盈盈已經忘記到底過咗幾耐，救護員先嚟到接手。佢喘著氣，筋疲力竭咁睇住師兄被抬上運送椅，佢軟軟的跟住出去，升降機太細，陳盈盈沿返剛剛走上嚟嘅樓梯落去，樓梯上面充滿住好多伙計，佢要用好大嘅力氣先擠到落樓。
一路跑落去，陳盈盈嘅眼淚再一次崩瀉出嚟。
※※※※※※※※※※※※※※※※※※※※※※※※※※※※※※※※※※※※
救護員接手繼續做CPR，阿文同阿超終於可以停落嚟，佢兩個坐咗係牆嘅一邊抖著大氣。
阿文遞咗包紙巾畀阿超抹，因為佢隻手上面滿佈血跡。
「抹都無用，要攞水洗先得啦！」阿超苦笑，然後再望一望剛剛做CPR嘅對象，佢嘅右胸口位置似乎有嚴重刺傷，或者槍傷。佢唔太分辨到。阿超頭先已經用返佢件衫，緊緊按實傷口止血，但無奈心外壓亦同時無可避免地按到動脈而出血。令到阿超做CPR時狼狽非常。
「雖然我唔識你，但能夠幫你做CPR都係一種緣份，希望你可以大步欖過啦……」阿超喃喃自語咗一陣，行咗出去搵水洗手。
陳盈盈已經跟咗落去，阿文亦跟隨住其他陸逐上到嚟嘅伙記過返去A室，講返究竟發生乜嘢事。
個阿伯嘅屍體仲喺地上面，法醫未到場，所以在場嘅警察都唔敢郁條屍，生怕破壞咗現場環境。阿文走過去單位最入嘅地方，企喺部電腦前面。
部電腦仍然開著，螢幕上顯示著一個香港嘅討論區畫面。
「香討？」阿文大惑不解：「臨死前仲上討論區？」佢仔細留意個畫面。畫面上係一個帖，剛剛發出嘅新帖，帖上面無一隻中文字……
帖上面全部都係數字，阿文清楚地數過，足足有22行，鋪滿整個帖嘅版面。
「密碼？」阿文第一個諗法就係密碼，或者係暗語，如果無解碼方法，外人係難以明白內容。
「阿文，您過一過嚟丫！」另一位警察叫住阿文，想問佢啲問題。
「哦！」阿文應著，雖然佢覺得奇怪，但阿文無再深究落去了，呢啲大單嘢，最後都係會由CID接手，都唔到前線嘅警員去查。
「係呢師兄，李Sir呢？」阿文問，通常有大單嘢發生，李Sir都總會第一個衝出嚟。
「唔見喎，你唔講我都唔覺……」同事應答：「 唉，李Sir有名你叫啦，李恒先嘛，又點會自己行先丫。一陣有記者就閃出嚟啦！」阿文好想笑，但又唔敢笑得咁大聲 。
同事見狀，自己都忍唔住笑咗出嚟。
※※※※※※※※※※※※※※※※※※※※※※※※※※※※※※※※※※※※
阿超帶住染血嘅手，走返出大廳。
佢從來未見過一個住宅單位可以放得落咁多冷藏櫃，佢稍微睇下最近佢嗰兩隻櫃，黑色玻璃之下睇唔到有乜嘢喺入面。
佢無再理會啲凍櫃，直接行咗去廳嘅另一邊搵洗手間。另一邊有三間房，三道白色嘅門分別坐落喺唔同位置。
喺唔知邊度先係廁所嘅情況下，阿超隨便打開其中一道門，佢小心翼翼咁用張紙巾包住個門鎖先開，勉得破壞咗啲證據。
門無鎖，一推就開，裡面係一個放滿雜物嘅房間，而且都擺放咗好多工具、鐵枝及木板等，旁邊仲一個細工作檯，電鑽、鋼鋸、虎鉗應有盡有。
工作檯旁邊，有一個同張檯一樣高嘅木箱，木箱很舊，好多木嘅纖維已經披哂口，甚至有啲位置已經被蛀食出一個個窿。
阿超好奇，佢睇到其中一個比較大嘅窿入面，有幾條平衡間距所排列嘅鐵枝，儼如一個鐵籠一般。
佢用紙巾粗略地抹一抹走手上嘅血，從腰間抽出佢支電筒，打開照入去個窿入面，然後彎起腰望入去。
一副白骨安靜地躺喺鐵籠中嘅地上。
阿超吞了吞口水，發愣了。
正當佢想走出去通知同事之際，另外一間房內傳出一陣驚呼聲。
「咩事？」其他係單位內嘅同事緊張起來，大家身處一個咁奇怪嘅環境，特別容易神經過敏，阿超都唔例外。
阿超比其他同事較近驚呼聲嘅來源，所以一個箭步上前睇下發生咩事。
甫一進房間，刺鼻嘅化學劑臭味撲面而至，直逼上腦。佢見到同事同樣都用手掩住口鼻，但另一隻手則指住門口右邊一個浴缸。
浴缸上有一幅白色嘅大布覆蓋住，阿超望一望同事，同事揚手示意佢揭起塊白色布，但面有難色。
阿超揸住布嘅一角，心中數咗三聲：「1……2……3……」幫自己心裡做啲準備。
佢拉起了一角，一盆墨綠色、黏稠稠嘅液體滿載成個浴缸內，偶爾仲有啲泡浮上嚟，更加刺鼻難聞。阿超索性抽起成塊布，想睇清楚到底係乜嘢。
「啊！」連阿超都被嚇倒，有一個人頭浮係綠色液體上面，連接係人頭之下嘅頸部只能隱約見到少少白色嘅嘢，人頭嘅下巴亦都呈少少被腐蝕般嘅潰爛，見到白骨。
第一眼睇阿超已經意識到呢個係一個用嚟溶掉屍體嘅浴缸，只係佢估唔到眼前嘅人頭係自己佢都認識嘅人。
呢個人活躍係尖沙咀嘅地下賭場同鳳樓。阿超平時行咇遇到佢，都總會截停佢查問一番，平時出入總見佢有兩個一肥一瘦嘅手下做跟班，但最近兩個月已經唔見佢地露面，阿超以為佢地已經著咗草走佬。
「黑吃黑？」除咗係呢啲事，阿超都諗唔到乜嘢原因，佢只係知道如果再留喺度，恐怕連隔夜飯都嘔埋出嚟。是以佢快手冚返幅布，一手捉返佢個同事出去。
「呼！」大廳中嘅冷空氣令佢地精神不少，阿超望住現場好多伙記都好忙碌，但仍然未見有IP出現。
「怕且……今日都要OT了……」阿超叉住腰說道。
※※※※※※※※※※※※※※※※※※※※※※※※※※※※※※※※※※
雨勢已經減弱，只有零星雨粉仍然飄落。
陳盈盈剛由救護車上落返嚟，坐咗喺大廈旁邊。
「阿盈！阿盈！」遠方傳嚟孫麗嘅叫喊聲。
隔住警方封鎖線，陳盈盈見到孫麗向佢嘅方向走過去。
一見到孫麗，本身止住了嘅淚水又再次流出來，而哭得更厲害。
「無事啦無事啦……」孫麗立刻抱住陳盈盈，輕拍佢膊頭安慰佢。
「麗麗姐……」陳盈盈攬到孫麗實一實，而且幾乎攤軟喺佢身上。
人喺經歷完一啲過度緊張嘅情緒之下，係會一下子崩潰起來。
「阿盈，無事啦，過咗去啦！」孫麗說著安慰之話，同事都開始留意到現場已經有唔少記者到達，企喺外圍影相。
「師兄佢……會唔會……死㗎？」陳盈盈邊哭如囈語般反覆問著。
「阿盈，你盡咗力㗎啦！就算結果係點都好，都唔好怪自己啦。」孫麗唔識點答，而且對情況都唔太掌握。
「其實如果無您嘅堅持，佢地可能死咗都無人發現到……」孫麗見到救護員推住其他傷者離開香檳大廈正門，正往救護車方向出去。
孫麗指一指個方向畀陳盈盈睇。
擔架上瞓嘅係個著紅色衫嘅女仔，陳盈盈記得個短訊有提到個女仔叫做譚俏冰。
佢走上前睇下個女仔，只見佢頸上有一圈深深嘅繩痕，救護員仍然為佢做緊心外壓，並戴上氧氣罩及心電圖機。心電圖機剛剛顯示出脈搏跳動，但仍然微弱。救護員準備幫傷者打强心針。
的確，如果唔係佢堅持查落去，堅持唔當係惡作劇處理，堅持同李Sir作對，或者眼前呢一幕應該唔會出現。
另一個傷者被推到另一架白車前，陳盈盈亦走過去睇下，紅色毛毯下係一個短頭髮男仔，頸上同樣有一條深色嘅繩痕。
雖然陳盈盈唔認識佢地，但感覺上佢地就好似係特殊嘅人，因為佢地嘅求救就只有陳盈盈一個人收到，佢地嘅生命就只能交託喺自己手中。
一念天堂，一念地獄。
如果佢好似李Sir咁唔去查證就終止行動，結果只會害死兩條人命，一想到呢一點，陳盈盈就覺得好嬲。
「李Sir呢？」陳盈盈問孫麗。
「我出嚟嘅時候佢仲喺房，我諗佢一陣就會過嚟。」孫麗應答著：「唔好理佢住啦，其他嘢有阿超阿文同其他伙記處理啦，我陪您返警署換件衫先啦。」
「我……我想去醫院等師兄……」陳盈盈心裏戚戚然。
「好好好，您先返去換件衫，我再陪你去啦。」孫麗搭著陳盈盈膊頭，慢慢走出封鎖區域。
停雨了，黑雲慢慢散退，隱約中有陽光。
(待續)