異域之界（異．界）: #1 開始

［#1 開始］

「我返嚟啦！」

我對住屋內講咗呢句話，一如既往般，沒有得到任何回應。

說畢，就關上門，將鎖匙放喺玄關隔離嘅神枱上面，對住神枱上面嘅佢地上咗柱香，拜咗一拜。

然後轉身開電視，雖然唔係咁在意播緊啲咩，但只不過係唔想屋企咩聲都無咁靜。





「大家好，歡迎收看六點半鐘新聞報道，今日新聞焦點係 - 隕石撞地球！ 有研究表示最近一星期紀錄到過千粒隕石撞向地球，而世界各地唔少市民都影有到隕石襲地球嘅影像，但神奇嘅係呢次隕石撞地球竟然無造成任何財物同人命傷亡......」

隕石撞地球？今日新聞幾有趣，如果大粒啲咪好，唔洗生活得咁辛苦，雖然有好多嘢未做過就係......（未拍過拖的說，喊出黎）

「咕～～～」嗯，唔理啦，煮嘢食先，肚子餓了。

隨即放低書包同搖控後，行去廚房，打開雪櫃，將一盒食剩一半嘅豆豉鯪魚拎出嚟放喺飯枱上面，再熟練咁撕開即食飯表面嘅膠放入微波爐叮，整個過程一氣呵成，熟練完美！

「鈴鈴鈴～」當我仲沉醉係佩服自己厲害動作嘅時候，電話嘅鈴聲打破咗我嘅興致。





「未知的來電？」我疑惑咁望一望部電話，諗一諗，平時我係唔會聽嘅，因為通常都係呃人電話，但今日正正就因為你打破咗我嘅興致，我就奉陪一下，陪你玩玩！

我接起電話

「喂，喂，喂，有......收到，係唔係....呀！」
傳過嚟嘅係一把聲音顫抖嘅男聲，而對面條友聽落好似好驚恐咁樣......但呢樣都唔係重點，重點係雜聲太多，根本聽唔清楚佢講咩，乜家下呃人電話玩埋啲咁嘅嘢？睇嚟我同時代脫節了！

「喂！邊位？」我嘗試回應下佢

「咔...咔...咔...咔...」斷咗線？得返啲咔咔聲





「你好，999」突然出現一把女聲

999？咩料？當我仲疑惑緊嘅時候，嗰個男人又開始講嘢，所以我決定先聽下佢地講咩先！

「喂，我依家喺......尖呀，我好似入咗......快啲搵人嚟幫我」

「先生，你冷靜啲先，你係唔係行山蕩失路呀？」

講到呢度，我諗應該係搭錯線，唔關我事（不過心諗呢個時代仲有搭錯線㗎咩？）

「唔係呀，我都話我......呀，我喺......尖，我個朋友都......快啲搵人嚟幫我哋」聽得出個男人好不耐煩，好大聲咁講嘢。

「好好好，先生，你有無見到附近有任何標距柱？」女接聽員講





「雖然實......置.......但有.....40」每次淨係男人講嘢，就一直咔咔咔，斷下斷下咁

「叮～」

聽到咁上下，我嘅飯都叮好了，算啦，唔聽啦，既然唔係咩呃人電話，又聽唔清楚佢地講乜嘢，都無嘢好玩，所以決定收線，專心醫好個肚算。

於是我熄咗電話，開始我嘅晚餐。

食完飯，做完功課，做埋運動，望一望個鐘，都就快12點，係時候瞓覺，捱埋聽日，後日教師專業發展日，連放三日假，可以真正咁休息下啦。

然後熄咗盞燈，合埋雙眼，瞓教。