異域之界（異．界）: #2 約定

「諾斯～～～早晨呀呀呀！」


一聽到呢把好嘈嘅聲音，我就知係佢，我最好嘅朋友 - 迪文。


「頂你，洗唔洗次次叫我都叫咁大聲呀？我唔係聾㗎，你個仆街仔！」


每朝返學，佢都會喺我唔為意嘅時候，大聲叫我，每次都俾佢嚇親，都已經兩年，我都仲未適應到，睇嚟我嘅適應力都差下。






「喂，諾斯，返埋今日，就放三日假，有無諗過去邊度玩？」諾斯一邊將手搭喺我膊頭一邊講


「我又無諗過，可能喺屋企瞓下教，煲下劇咁，hea下」我認真思考有咩好做，好似瞓教係最好選擇？


「聽日星期五，不如去行山囉？人少啲，星期六日放假可以休息。」迪文語帶興奮






「去行山？行山喎？你迪文想去行山？」我十分驚訝，因為以前初識佢嗰陣，我成日約佢行山，打波，踢波呢啲體能活動，佢都以體能差推哂我，今日竟然主動話想行山，真係世界變！


「咁你想行咩山？」既然咁難得佢想行，一定奉陪！


「就蚺蛇尖啦，一係唔行，一行就行啲勁嘅，好唔好？」






「蚺蛇尖？西貢三尖之一嚟喎，我驚到時要call飛行服務隊救你，哈哈哈」我語帶恥笑


「誰怕誰，我都唔驚，驚X呀？」


雖然迪文係笑住咁講，但我睇得出佢都幾堅定下，既然係咁，佢鐘意啦，陪下佢，最多行慢啲就下佢


「我體能不嬲fit到爆，無驚過，到時唔好叫我扶你就得」


我望一望手錶，發現就快遲到！！！






「喂，迪文，其他嘢遲啲再傾，我地要行快啲啦，如果唔係實遲到，遲到實俾個老女人煩死！」

*老女人=訓導主任（唔重要）



最後我同迪文約好聽日喺西貢市集合，然後一齊搭車去北潭凹，喺北潭凹出發。