食完飯就直接去咗佢朋友David同Yoyo嗰Apartment,去到已經好多人,開咗一枱麻將打緊,於是Joe介紹佢班朋友畀我認識,以下係我用咗好耐先攪清楚嘅關係:  

David and Yoyo,拍拖多年嘅情侶 
Sam and Joyce,Sam追緊Joyce,但Joyce對Joe有意,關係曖昧 
Dave and Maggie,啱啱拍拖 
Amy,單身美女,港美混血兒 
Anita,港女,Joe嘅SP  

打緊牌嘅係David,Sam,Dave同Amy。Amy 見到Joe就話:「我鄧腳嘅咋,你嚟到你打啦,我同班女仕唱K好過!」Joe :「咁我唔客氣啦!照舊?三三制打到十翻?」David:「係呀!有冇帶夠錢呀?」Joe:「我實輸㗎!打完先講!阿偉,我先打四圈跟著到你,OK?」「得啦!我睇下就得啦!我悶嘅話又可以去唱K!」  



咁男有男打牌,女有女唱K,Joyce就一直坐響Sam後面睇佢打牌,我就坐響Joe後面,打嘅係廣東牌,Joe 手氣唔錯,四圈未完已經贏咗兩底幾。佢哋打牌嘅時候我四圍望,我留意到Joyce不時會偷望Joe,可能係我多心,但我總覺得Joe同Joyce之間有啲嘢,不過我發覺Joe注意Anita多啲,成晚不停咁撩Anita,Anita係典型港女,全身名牌,靚就幾靚嘅,不過個樣有啲串,又唔多啋人,絕對唔係我杯茶!至於今晚衆多女仔中,Amy絕對係最索嗰個,可能因為佢係混血兒關係,五官十分標緻,大眼高鼻,皮膚好白,扎咗條馬尾,著住件鬆身毛衣加條牛仔短裙,對腳好瘦長,目測佢應該有170-172cm高,最難得佢廣東話十分流利。  

打完四圈Joe一家獨贏「拿!你同我打一個櫃桶,輸贏都一人一半!」於是我頂咗Joe個位,同枱一樣都原班人馬,Sam坐我對家,David坐上家,下家係Dave。「各位,小弟初嚟報,,手下留情呀!」「衰仔Joe贏咁多,你記得幫佢輸返啲呀!」Dave笑住講!大家技術差唔多,不Joe呢個位係旺位,四圈落嚟又贏多一底。最後佢地話要𢴇位上數,我叫Joe返嚟打,我走咗過去同班女唱K。  

Yoyo「阿偉你同Joe識咗好耐?我地冇見過你嘅?你啱啱香港過嚟?」「係呀!我同Joe 由小學開始做同學,佢讀完中二就移民過嚟,我就今年考完A-Level先過嚟,依家響S州大讀first year。」Maggie就好誇張咁講:「咁你有冇女朋友呀?冇嘅話呢度有兩位單身女仕喎!」 Anita完全冇反應當聽唔到,Amy就話:「Maggie 你唔好玩啦!阿偉高大靚仔又點會冇女朋友呀!」我笑住話:「我女朋友響香港,十二月尾先過嚟讀書,不過佢響三藩市先,暑假先Transfer入S州大。」聽完我講之後我感覺到Amy有一刹那失落,Yoyo:「咁你第日帶佢出嚟大家認識下啦!聽Joe講你出嚟多數住佢度,咁我地會有好多機會見㗎!係呢,你禮拜四晚join我地thanksgiving party 啦!如果你仲未走嘅話!」我:「多謝呀!Joe話會同我去party,應該係同你地!咁到時見啦」  

之後我地唱K,唔知係有心定冇意,Amy揀咗首合唱歌同我唱。Amy把聲好好聽,絕對係人靚聲甜,我坐響佢隔離聞住佢嘅體香,短裙長腿…  

(Amy)想講不要走 偏偏好勝說我那在乎 
面對世界我灑脫 一點不似太辛苦 


但在漫漫長夜裡 摘下面具便重因你再心碎 
我所有眼淚都彷彿因你而狂呼 
 
(我)原來自遠走 我方知道對你在乎 
願能留住你心 我卻高傲不顧 
現在夜夜唯後悔 但是現在像遲了一輩 
我一句再會 竟會有無窮痛苦 
 
(我)從不喜歡孤單一個 
(Amy)可惜偏偏孤獨一個 


(合)我不懂得跟我 獨自對坐 
原來沒有你 做人相當痛楚 
(我)從不喜歡孤單一個 
(Amy)可惜偏偏孤獨一個 
(合)你有否想起我 若是再遇 
求讓我悔過 可不可再戀過 

如果冇小詠,我估我絕對會追Amy!不過緣份嘅嘢真係好難講,命運中往往有好多意想不到嘅安排,一切隨緣吧! 
已有 0 人追稿