一個香港留學生在美國的生活: 約會

大約十二點左右我就同Joe講我先返去，Joe知道我夠鐘打電話返香港，「咁我車你返去先，來回唔洗十分鐘，大家take個break先啦」點知Amy話：「我都攰啦！我都想返屋企，我車阿偉啦！」Joe:「咁麻煩你啦！我繼續打！」我：「唔好意思喎！要你特登車我！」Amy:「順便姐！我都住附近！Anita你走未呀？」「我未眼瞓，唱多陣先，等陣佢哋可以車我走。」  

Amy揸嘅係㗎紅色嘅Miata，車入面有好多毛公仔，仲有士多啤梨香水味，其實我有啲尷尬，為免出現Dead Air，我決定打開話題：「係呢點解你啲廣東話咁好嘅？仲會唱香港流行曲？」Amy:「我爸爸係香港人，媽媽係香港出世嘅中美混血兒，所以我只有四分一白人血統，我響香港出世，五歲先搬到美國，我響屋企都係講廣東話嘅。」「咁你屋企人呢？」「我屋企響Seattle，我自己一個響三藩市讀書。咁你呢？我頭先聽到你日Dave佢地講你由香港嚟冇幾耐？」「係呀，嚟咗三個月左右！」「我地交換電話保持啦！你有冇email或者ICQ之類呀？」「有呀！我寫畀你啦！」  

美好時光總係過得快，五分鐘就已到咗大廈入口，我落咗車，同Amy揮手講再見，目送佢離開嘅時候，唔知點解竟然有啲失落感覺。返上去之後習慣性打電畀小詠，講咗一陣就沖涼瞓覺！我瞓醒已經11點幾，起身全屋得我一人，唔通Joe 打通宵到依家都未返？我唯有先擦牙洗面先，再打電話搵人，打咗兩次都冇人聽，個衰仔去咗邊呢？我又冇佢其他朋友電！除咗Amy！係喎！咁係唔係應該打畀Amy問下呢？最後我都係打咗電話：「Sorry Amy咁早打畀你，我係阿偉，有冇嘈醒你呀？」「早晨！我起咗身好耐啦！」「哈哈！我啱啱先起身！不過Joe 唔響屋企，尋晚好似冇返過嚟，我打佢手機又冇人應，你知唔知點可以搵到佢呀？」「我試吓打電話問下啦！」收咗線冇耐，Amy打返電話比我：「阿偉呀，David話Joe應該下晝先返屋企，佢好似去咗朋友度過夜…」Amy有啲尷尬咁講，我呆咗一呆：「咁近屋企都唔返？去人哋度過夜？」Amy:「我都唔知，咁你等下啦！佢返嚟問佢啦！」「我唔等佢啦！我自己出去搵食，係呢，呢度附有冇食廳介紹？」Amy諗咗陣：「不如我帶你去食啦？」我諗都冇諗即刻話：「咁我嚟接你啦？畀個地址我啦？」  

第一次正式單獨同Amy約會，係去咗Oakland Chinatown 食越南粉。面對面坐，我可以正面睇清佢個樣，真係好吸引，今日佢著咗件紅色樽領冷衫，窄身長牛仔褲，加上一對黑色高踭長靴，同尋晚一樣紮咗條馬尾，一對修長美腿表露無遺。Amy同我都叫咗生牛肉粉，「估唔到呢度有咁好味嘅越南粉，多謝你介紹呀！」「Oakland Chinatown 比較近大學，好多香港學生會嚟呢度食，Joe同你尋晚見到班朋友就成日都嚟。」「你同Joe係同班同學？」「上年同過一班，之後又識咗David佢地，咪一齊玩囉！」呢個時候，Joe竟然打電話嚟：「喂！我返到屋企啦！你去咗邊呀」「我問你去咗邊就真！成晚冇返！」「哈哈！返嚟先講你知啦！你響邊？我依家過嚟同你食晏。」「Err，我就食完，不如屋企見啦？」難得同Amy單獨約會，更係唔想Joe出現啦！「死仔包，係唔係同女食緊飯？講！」「Err，咁你過嚟啦！我同Amy食緊越南粉。」「吓？咁快手？我仲諗住畀個驚喜你添！」「我嚟到你咪知囉！我接個人先，十五分鐘到！」  

過咗冇耐，Joe響餐廳出現，身後仲有個女仔，「Hello Amy，等我介紹，呢個係Nancy，Nancy，呢個係Amy，阿偉你應該記，唔洗我再介紹啦！你地兩個人食飯都唔搵埋我！阿偉你個衰仔有異性無人性！」 



估唔到Joe講嘅驚喜，會係Nancy！