一個香港留學生在美國的生活: 出大事

我同Aaron各自返到屋企之後已經係夜晚，阿君同小敏仲未返美國，成間屋就只有我一個人，收拾一下行李沖過涼食少少野就瞓覺。第二日一早起身係星期日，走咗成個月，好多朋友好耐都冇見，於是我就打個電話俾Alan，點知冇人接，我估可能星期日未起身？於是我就開車直接去佢屋企，睇吓佢有冇時間一齊食晏。去到佢屋企撳鐘，等咗一陣先有人嚟開門，我第一眼見到Alan真係嚇咗一條，個樣殘到好似七日七夜冇瞓過覺咁，我入到去，間屋亂到亂葬崗咁，成枱都係食完嘅碗碗碟碟，除咗Alan之外，屋入邊就再冇其他人。  

「做乜亂到咁呀！Kim仲未返？阿健呢？佢唔係應該喺LA返咗嚟？」Alan嘆左一口氣，攤左響沙發度「阿健搬走咗啦！」「吓？咁突然咁快？發生乜嘢事？我見佢啲嘢仲喺間屋度喎！無端端點解會搬走？」隔咗一陣Alan先慢慢講俾我聽發生乜嘢事！  

原來響上學期完咗之後，開始放聖誕假，大家都各自收拾行李返屋企。我Aaron同小詠返香港，Kim同阿君返大馬，小敏返上海，阿健就返去佢LA屋企。Alan就決定留低讀多一堂Winter Class早啲畢業。  

本來呢一個月應該係風平浪靜， Alan一個人生活，但係偏偏就係呢一個月出事。話說阿健響上一個學期尾嘅時候已經追到秋子，開始左半同居生活。秋子一個禮拜總有兩三晚會響佢屋企過夜，咁當然佢有鎖匙亦都可以響呢間屋自由出入。就響學期結束，大家都返咗屋企過聖誕嘅時候，秋子並冇離開，佢同Alan一樣留咗喺學校讀Winter Class，由於大部份朋友都走咗，最初開頭嘅時候秋子耐唔中會響屋企同Alan一齊食飯，秋子其實有一半時間都已經住喺呢間屋入邊，孤男寡女，唔知點樣搞下搞下結果就搞到上床！本來響外國大學嘅男女關係就係好混亂，大家唔講，你扑左幾多條女都冇人知，最緊要係食完要抹咀！ Alan最初諗住玩吓玩吓，打場友誼波就算，但係最後都係出咗事！  

原來就響三日前，秋子響屋企同Alan食完飯，就留低咗喺度過夜，本來只係得佢哋兩個搞乜都冇所謂，點知阿健竟然提早咗從LA返嚟。嗰晚阿健返到屋企已經12點幾，成屋熄晒燈， Alan同秋子響房入邊，阿健返到入屋其實係聽到Alan間房叫床聲，不過同Alan住埋一齊咁耐，都唔係第一次聽到呢啲聲，於是佢自己入房沖涼瞓覺。  



第二日一早，阿健起身行出房，就見到廚房有人企咗喺度，佢再睇真啲，見到嘅竟然係秋子，秋子全身赤裸，綁咗條煮飯嘅圍裙，響廚房爐頭煮緊早餐，呢個時候嘅阿健冇晒反應，擘大對眼O晒咀，秋子亦發現咗阿健嘅出現，完全唔知點反應！呢個時候Alan響房開門行咗出嚟，全身得條孖煙通嘅Alan一見到阿健就知道大鑊，根據Alan講，當時爭啲就已經大打出手，秋子完全冇任何解釋就返返入房，留低Alan同阿健兩個響客廳，最後佢哋兩個之間發生咩事，Alan冇詳細講，只係話阿健執咗幾件行李就走咗，到咗今日都無返過嚟！佢呢兩日打個電話但冇人聽，「咁Kim知道未？」「唉！佢都未返，返嚟我都唔知點同佢解釋！」「咁秋子呢？」「阿健走咗冇耐我入房執左幾件衫都走埋！我同佢上床俾人撞到正，第日喺學校見到面都尷尬啦！」  

之後我響佢屋企陪咗佢一個朝頭早，打咗個電話俾Aaron講比佢聽發生乜嘢事，之後我嘗試打電話俾阿健，電話一樣冇開機，睇嚟要等到開學，有機會見面我再嘗試做和事佬，睇吓有冇辦法解決！