一個香港留學生在美國的生活: 開學

一月尾嘅最後一個禮拜，所有人都陸續返嚟，呢個朋友圈其實好細，好快Alan同阿健之間嘅事已經通晒天，第一時間就已經傳到去Kim嗰度，出奇地Kim十分冷靜，響學校見到面嘅時候完全唔覺得佢有唔開心，我估佢哋兩公婆應該已經講掂數，Kim已經原諒左Alan。到咗開學，我哋仲冇人成功聯絡上阿健，佢就好似人間蒸發咁完全消失。至於秋子，佢本來就同我哋唔同一個生活圈，自從佢搬離開咗Alan間屋之後，亦都再冇出現過。  

小詠響三藩市住咗兩晚就返番入嚟，同佢一齊返入嚟嘅仲有阿君同小敏，佢哋約埋一齊響阿君同小敏落機同一日租車，大家有個照應。  

阿君返到嚟之後又帶俾我另一個唔好嘅消息，就係佢打算讀完呢個學期之後，就會轉校去東岸完成餘下兩年嘅學位課程，佢已經申請咗幾間大學，到咗三月嘅時候就應該知道會去邊一間讀，佢話希望喺美國讀書嘅時候可以去唔同嘅城市生活，因為佢畢業之後就會返去大馬接手家族生意，所以佢唔想四年都響同一個地方。咁我都明嘅，佢成績好，屋企又有錢，轉去東岸一啲名校繼續絕對係正確嘅選擇！  

開學前一日，我如常約咗Aaron去健身，如果冇同小詠一齊，我哋都會去Cafe食飯，可能心中有鬼，我總係唔想Joey同小詠碰面， 

Joey見到我亦唔會特別尷尬，呢個學期佢會繼續學小提琴，我都一樣只會喺學校教佢。「Alan嗰度搞成點啊？你有冇搵到阿健？」Aaron一路食住佢碟焗豬扒飯一路問我 「冇消息啊！希望聽日開學，響學校會見到阿健啦！」「Alan又係嘅，自己Roommate條女都搞，就算係搞，都唔好喺自己屋企搞啊！死蠢！」「個個好似你咁咩， Lisa喺香港，呢邊搞Joey ！」「我同Joey純屬友誼波，完全冇感情，各取所需！」「你仲有搞人㗎 ？」「一個禮拜一兩次咁啦！你有興趣咩？你知佢鍾意你㗎 ！」「睇到Alan咁，仲敢咩！千祈唔好比小詠知道有Joey存在添啊！費事多是非！女人特別敏感又特別小氣！」  



食完晏買單之後我同Aaron就去做健身，完咗之後Aaron接咗Joey放工一齊走，Aaron每次接完放工送Joey返屋企都必定順便上埋床，呢個已經係例行動作。  

禮拜一係Spring Semester第一日開學，今個學期大部份嘅堂我都係自己一個人上，其實同佢住埋一齊之後開始發覺生活上有好多細節係好唔同，例如同小詠上堂嘅Schedule就好唔一樣，我比較喜歡上早堂，下晝嘅時間比較自由，全日工作效率比較高，而小詠佢比較瞓得晏，鍾意下晝同埋夜晚上堂，上堂時間唔同，大家見面嘅時間相對就少咗，小詠響學校亦都認識咗一批新嘅朋友。佢認識嘅朋友大部份都唔係香港人，可能佢人嘅性格比較外向，加上外貌甜美，身邊總係唔少狂風浪碟。呢一班朋友之中最討厭嘅係一班富二代印尼人。  

一講開呢班印尼人，第一日開學食晏就比我撞到正！過去嗰幾個學期，我哋都習慣咗食晏嘅時候會喺Student Union 個 Canteen碰面， 今日同平時一樣，落咗堂差唔多12點，我就一個人行去canteen睇吓有冇朋友喺度，行到去嘅時候一個識嘅人都見唔到，於是我就自己攞枱揾食，小詠十二點半左右放學，我哋約好咗一齊食晏。攞咗嘢食之後坐咗冇耐，小詠就行咗入嚟，而係佢身邊仲有三個男仔跟住。