一個香港留學生在美國的生活: 新屋
每年十二月都係忙於公事上嘅應酬,雖然知道Heather聖誕前就會離開,不過見到面嘅機會係越嚟越少,後來我先知道原佢除咗忙於收拾屋企傢俬雜物之外,好多時候都去咗同Chase見面,甚至冇同我講獨自參加Chase同佢哋啲同學嘅Christmas Party,呢個有機會先再另外加幾章Heather故事外傳。
聖誕節我又去咗多倫多同家人一齊過,阿傑正式宣布佢老婆大咗肚,已經一個月,成功做人,而預產期係明年九月。「咁早結婚生仔,細佬你係得嘅!」「哥,唔係我想㗎,諗住順其實自然啦!點知咁快就中咗!哈哈!」「阿爸阿媽最開心!可以抱孫!」「係呀!所以佢哋應該會多好多時間住響多倫多,聽阿爸講佢打算響Richmond Hill附近買屋。」「都好嘅,住近啲,咁我可以多啲嚟探你哋。」坐言起行係我阿媽嘅座右銘,新年都未過,兩老已經落咗訂等緊Close Escrow,仲要因為假期關係,先要等多幾日,不過我等唔到佢哋新居入伙,我就飛咗返三藩市。
我自己間新屋都差唔多完工,本來以為要2005又或者2006先起好,點知進度出奇地快,今年夏天就可以搬入去,而同一時間,我同Joe又有幾個新Project開工,所以今年會係非常之忙嘅一年。
2004年一月嘅最後一個禮拜五,夜晚差唔多八點,我同Joe仲響Office做緊嘢,同我哋一齊嘅仲有另一個同事,「老細,我走先,約咗人食飯。」Joe「你走啦,我哋都就嚟走啦!」最後一個同事都返咗屋企,剩低Joe同我,「你仲唔返企屋陪Haley?你返屋企又遠過我。」「走啦,十五分鐘,我應承咗今晚帶Haley返去爺爺嫲嫲度瞓。」「真係廿四孝老豆!」「你聽日記得去睇下你間新屋,下晝三點有工人去斬樹。」「你知唔知下禮拜幾時City Inspection?」「禮拜四九點。」「過埋Final Inspection就可以買傢俬做埋最後裝修,希望三月可以搬去住。」「你好唔鍾意依家三藩市間屋咩?返工咁近。」「返工近不過去其他地方遠呀,又成日塞車,Palo Alto環境好啲,我都係唔太鍾意City Life。」其實自從Heather搬走咗之後,住響三藩市已經冇乜意思,好多朋友都係住響南邊,我要搬離三藩市係遲早嘅事。「咁你三藩市間屋打算點?賣咗佢?」「唔啦!留返做Vacation Home。」「咁樣都好,依家個市咁差,你賣都賣唔出好價錢。好啦!我都走啦,你唔好做咁夜啦!下禮拜見!」Joe 啱啱離開Office,我個手機就響起。