一個香港留學生在美國的生活: 喜訊

電話入面傳嚟Aaron把聲「放工未呀？我睇你都係未走。」「走啦！乜嘢事？唔好叫我去南灣陪我你食飯！依家成八點，落到去都九點，乜都閂晒門。」「唔係約你今晚食飯，聽晚得唔得呀？落Palo Alto。」「Lunch啦，我聽日要去新屋，工人嚟斬樹。」「Lunch唔得喎，應承咗同老婆去整頭髮，你幾點斬樹呀？」「三點。」「咁等埋你斬完樹先食，六點得唔得？」「咁就六點啦！你揀地方，到時再講。」 

 

響美國起屋最煩係攞Permit同City Inspection，手續多時間又耐，連斬棵樹都攪咗成個月先批，City of Palo Alto又要求你斬一棵樹就要種返另一棵樹，話要保持生態平衡喎！到咗禮拜六中午，準備出門口先去食飯再去新屋，Aaron再打嚟「喂，我同Lisa剪完頭髮啦，食唔食飯呀？我哋已經響Palo Alto，你仲有幾耐到？」「四十分鐘啦，我啱啱先出門口！」「咁我攞位先，鴨子樓？」「好，等陣見。」我都有好幾個月冇見過Lisa，大家始終住得太遠，一南一北，除咗大時大節之外，真係冇乜機會見面。 

 

鴨子樓響Palo Alto開咗好多年，老闆係Linda嘅親戚，同我哋都算相熟，雖然係禮拜六，Aaron去到都唔洗點等位就有枱，我就比Aaron遲咗半個鐘先到。「有冇遲啲呀！我哋都就食飽啦！」Lisa「阿偉咁遠開車嚟，算快啦！」睇吓枱面，其實佢哋都係叫咗個拚盤頭枱，冇乜點食嘢，老闆呢個時候啱啱行過，咁我哋同佢打招呼順便點菜，呢度叫做鴨子樓，當然要食鴨，不過美國食片皮鴨同香港食嘅係冇得比，肥膏同肉嘅比例差唔多1:1，皮又唔脆，肉質又硬，只係有得食總好過冇得食。食到一半，我開始發覺有啲奇怪「咦，Lisa做乜成晚飲暧水？你又唔係唔舒服。」「佢呢排都唔飲得茶呀咖啡呀酒呀，又唔食得刺激性食物。」「吓？點解？」「哈哈！其實講你知都冇乜所謂，Lisa有咗，八個禮拜，我老媽子話陀足三個月先好同人講。」「嘩！恭喜哂！幾時預產期？」「九月中。」「咁咪隨時同我同日生日？」 「你生日九月尾喎，邊會遲咁多日呀！」「知道係仔定女未？」「下個月睇醫生做檢查先可能知道。」「知道記得通知我呀！」「一定啦！」 



 

食完晏，Aaron送Lisa返屋企，我就直接去新屋睇住啲工人斬樹。間新屋其實只係差內部裝修，買傢俬電器，同等Occupancy Permit，響新屋留咗三個鐘左右，睇吓住工人搬走哂啲切成一段一段嘅樹幹同枝葉，而深入地下嘅樹根就要等另一批工人去清理，應該聽日就可以完工。「每次嚟到你間屋都唔同樣，次次都大啲靚啲，好有成功感！」Aaron送完Lisa返就即刻飛車返返嚟。「我都希望可以早啲搬入嚟住。」「我最鍾意係你個大廳同個泳池，可以完全打開個玻璃門，成個大廳同泳池後園打通哂，夏天BBQ一流！個圖則你改完又改，最後依家全屋幾多尺？」「上下兩層六千五，六間房，唔計Garage。」「咁Q大你一個人住係咪有啲過分？」「我唔想再搬，以後會結婚吖嘛！費事麻煩。」「你連條女都未有，仲話結婚！係啦，有嘢要同你傾，你走得未？」「行啦，我Book咗六點Sundance食Steak，酒我都帶埋。」