一個香港留學生在美國的生活: 糖水

小諾本身有八級證書，不過有好多年冇再彈琴，佢攞咗本Mozart Sonata出嚟試咗幾首都彈得唔順，「我睇你要認真練返一段時間先彈到，不如你試吓呢本，流行曲易啲上手。」我響紙箱入面搵咗本許經燕嘅香港流行曲譜，「咦！你都有買佢嘅琴譜？我都有好多本，不過留哂響加拿大冇帶嚟，依家屋企又冇琴，冇得彈。」「你同阿成仲未決定買屋，買咗屋地方大啲咪可以買個大琴囉。」小諾應該好喜歡彈流行曲，一坐低就進入狀態，彈得流暢自然，尤其係譚校長嘅歌，我哋相信佢以前一定成日彈。最後響小諾一再要求下，我同佢彈咗首Mozart Four Hands先至返屋企。 

 

小諾走咗，我一個人獨自𢴇拾間屋，咁大間屋一個人住其實都幾難打理，我用咗成晚時間先拆哂廚房啲箱，洗碗，清潔，再放入廚櫃，攪得掂已經過哂晚飯時間，Palo Alto唔係三藩市，過咗八點冇餐廳開門，雪櫃又空嘅，一係依家去Supermarket買嘢返屋企煮，一係就去遠啲搵食，最後我決定開車去San Mateo Downtown，嗰度有幾間中餐，應該會收晏少少。禮拜六晚冇乜Traffic，去到泊埋車差唔多九點，果然除咗一間港式茶餐廳同阿欣返工嗰間糖水舖之外，其他都閂哂門。二揀一，本來應該去茶餐廳食會多啲選擇，不過最後都係去糖水舖。 

 

雖然話唐人舖收夜啲，夜極都係到十點，不過我去到嘅時候都仲有好多人，我見有張空枱，就自己坐低，好快阿欣就發現我，「咁夜嘅？你等陣，樓面得我一個，我轉頭先幫你落單。」轉個頭就係十五分鐘，我餓到咕咕聲都未落單，到阿欣做完嘢行過嚟先同我講「咁夜廚房收咗工，淨係得返幾款甜品。」「吓？我肚餓喎！連碗公仔麵都冇？」「師傅走咗啦！我整個什果椰汁西米你食住先啦！」睇嚟我今晚要去24hr McDonald’s買漢堡包食！時間一分一秒咁過，餐廳客人亦續漸散去，最後剩低我同阿欣，「我食完啦，不如埋單先，你閂舖我車你返屋企。」「你食飽啦咩？一碗西米露就夠飽？」「哈哈！唔夠㗎！等陣麥記Drive Through。」「唉！等我𢴇埋啲手尾埋數，之後我煮個公仔麵畀你食。」「你煮？」「廚房都走哂，唔係我煮唔通你煮？」 



 

做完樓面簡單清潔，再將枱枱凳凳反轉放好，落埋大閘鎖門，之後仲要埋數，阿欣一個人做，足足攪咗半個鐘，我就一個人坐響度望住佢忙出忙入，「你響度等等，我依家去廚房煮麵。」夜闌人靜，街上只有一兩個行人，應該都係放工趕返屋企，成間舖大部分嘅燈都熄咗，只剩低廚房同我坐張枱附近有燈，反正坐喺度冇嘢做，於是我起身行埋去廚房。