一個香港留學生在美國的生活: 餃子

我同小諾去嘅呢間北方餃子店響San Carlos，由我屋企去大約十五分鐘就到，間舖好細，只有八張細枱，廚房同飯廳有一塊大玻璃相隔，從外面可以睇到廚房入面有兩位大媽用粉團包餃子，而玻璃前面有兩個大冰箱，入面全部係已經包好外賣急凍水餃，廿隻一包，我平時買唔少放響屋企做存貨。小諾「估唔到響個咁細嘅Strip Mall有間北方水餃！四圍都係墨西哥嘢。」「響中半島應該係得呢間，係大陸人開，算係幾正宗嘅北方水餃，仲有饅頭同小籠包都唔錯，冷盤都可以試吓。」「等我睇吓食乜先！」呢個時段已經過咗午飯高峰，成間餐廳得我同諾一枱，我哋一坐低就有個起碼五六十歲帶北京口音嘅阿毛攞咗兩份甩皮甩骨嘅餐牌同一壺茶放響我哋張枱，之後就走返入廚房繼續包佢嘅水餃。第一次嚟嘅小諾「服務好差喎！地方又細，咁你都會嚟！」「啲嘢好食㗎，呢啲城中小店，係咁上下，食過你唔滿意先再講啦！」睇咗陣餐牌，有另一個後生仔過嚟，又係一口北京口音嘅普通話準備同我哋落單「你們想點些什麼？」「鮮蝦豬肉韮菜餃！」估唔到我同小諾同時叫同一樣嘢！「哈哈，原來你都鐘意食韮菜！」於是我同個Waiter講「兩個鮮蝦豬肉韮菜餃，一個馬蘭頭，一個烤夫，謝謝！」 

 

「你係我識嘅唯一一個男仔鐘意食韮菜！」「係咩？阿Joe同Aaron都食㗎喎！只不過唔係Favorite，我平時叫咗佢哋都會食。」「咁我又唔知道喎！不過阿成最怕韮菜祲味，平時我冇得食㗎！」「咁又唔係人人都受到嗰祲韮菜味嘅，尤其係你嘔返啖胃氣出嚟嘅時候！」「哈哈！係呀！阿成最怕就係呢祲味！」好快個Waiter送咗兩個頭枱上嚟，我發覺小諾同我一樣，都係一個好鐘意食嘢嘅人，又唔揀食，小諾「同你食飯真係正好多，平時我冇乜機會出街食，多數響屋企煮。」「工作太忙？」「梗係唔係啦！係阿成難服侍，佢唔食牛唔食羊唔食海鮮唔食生冷嘢唔食辣，你話出街可以食乜？」「咁又慘啲！」其實認識咗阿成同小諾咁耐，都知阿成好多嘢唔食，不過就唔知道咁嚴重！「最慘係佢唔多飲酒！」「係喎！冇人陪你飲，又係幾悶嘅！」「算啦！唔講我老公！水餃到啦！食咗先講！」食完晏，開車返Palo Alto「你約咗阿成幾點？」「六點左右，我要返到屋企。」「咁我車你返我屋企攞車。」「仲有時間，我想試吓你部琴，得唔得呀？」「梗係得啦！咁你依家返去我度咪有得試吓囉！」 

 

搬琴工人裝完部琴同時亦調好琴音，除時可以彈，小諾一返到我屋企即刻衝去大廳打開部琴準備彈，「喂！乜你得部琴，冇琴譜嘅？」「啱啱搬，仲響箱入面，你想彈乜嘢？」「等我睇下。」裝書嘅箱放響車房，由大學搬出三藩市再搬到Palo Alto，我差唔多有成四十幾個紙箱，大部分由大學到依家都冇開過，「嘩！你有冇咁多嘢呀？」「嗱，琴書響呢個箱入面，你自己揾啦！」我同一時間就搬咗其他幾個會用到嘅箱入屋，主要係廚房雜物，過咗陣，小諾就攞咗本Mozart入嚟，「阿偉，呢本琴譜係four hands，你同邊個一齊彈？」「哈，係我讀大學時嘅女朋友。」「咁我可唔可以彈呀？仲有，呢兩本係Violin譜？邊個拉Violin？」「我囉，我兩樣都玩。」「嘩！兩樣都會，勁！我好耐冇彈啦，都唔知得唔得！」「試吓啦！最緊要Enjoy。」