一個香港留學生在美國的生活: Housewarming Party（1）

自從上次去完阿欣屋企發現佢同佢Housemate關係之後，我再冇去糖水舖食嘢， 更加冇再搵阿欣，可能知道咗佢同佢Housemate嘅關係，我對佢嘅觀感完全改變，甚至有啲抗拒。轉眼已經迎嚟陽光燦爛嘅加州夏天，六月中一個禮拜六，Joe帶咗佢個女嚟我屋企游水，Aaron同老婆Lisa都過咗嚟，Lisa已經見肚，雖然成六個月，目測佢身材仲好好，冇乜點肥。我哋幾個就坐響泳池傍，一邊飲酒一邊睇住Haley玩水，Joe「你睇吓Aaron，就嚟做老豆，我個女都咁大開始返學，你睇吓你自己，仲係吊兒郎當一個人，Uncle Auntie冇催你結婚咩？」「一個人唔好咩！自由自在！」Lisa「你都就嚟卅歲，你細佬個小朋友都好似就嚟出世。」「係呀，預產期同你差唔多。」「咁咪係囉，個個都結婚生仔，你都係時候啦！係咪有女朋友唔講呀？」Aaron「佢有條鐵！飛機就有得打！」Joe「唔係喎，佢身邊好多女氹氹轉，冇個啱咩？」「我邊度有好多女氹氹轉呀！你唔好噏得出就噏！」Joe「你洗唔洗我哋幫你介紹呀？網上好多Dating Site，要唔要幫你Sign Up？」「你哋唔好咁無聊好唔好？」Aaron「July 4th係咪響度開P？不如我哋帶幾個單身女仔一齊嚟，順便介紹畀阿偉啦！」Lisa「都好喎，我有幾個Girl Friends仲係Single。」「你哋唔好玩，我真係冇興趣，到時唔好叫埋啲三唔識七嘅人嚟，我唔同你哋講，游水！」Joe「唔好玩佢啦，差唔多四點，不如開始煮嘢食，Aaron，你起爐，我入廚房準備下。」 

我除咗件T-Shirt跳落水，Haley好開心要我教游水，我之前已經教咗一排，呢個小朋友好有天份，學得好快，唔用水泡都可以自己游一段短距離。玩咗陣，Aaron都跳埋落水，我「你又要Joe一個人整哂所有嘢？」「起咗爐，放咗舊肉入去，煮緊！」「算你有良心。」Aaron「我老婆好緊張你有冇女朋友喎！哈哈！我知道佢有兩個女仔想介紹畀你。」「你哋唔好咁多餘得唔得？你再玩我爆你啲嘢出嚟，睇吓你點死！」「你係咪玩嘢呀？」「好心你就玩少啲啦！就嚟做老豆啦！」「你放心，我有分寸！係喎，七月中Phoebe搬去你個Apartment，你過嚟幫手？」「我已經畀埋地方佢住，仲要幫手搬屋，你有病？」「唔好咁啦，人哋一個女仔！」「依家係你包人，又唔係我！」「說話又唔係咁講，你都有份，50/50!」「到時先至算啦！不如講下July 4th做乜？」「咪又係開枱游水唱K燒嘢食！不過今次算係你新屋Housewarming，你話事食乜請邊個，其他嘢我同Joe安排。」「不如Private Chef，唔洗煮唔洗清潔。」「嘩！正喎！未試過用Private Chef，咁其他嘢我安排啦！」呢個時候Joe大叫「Haley上水換衫，玩太耐，阿偉Aaron幫手響廚房攞嘢出Backyard。」