一個香港留學生在美國的生活: Housewarming Party（2）

今年July 4th，好多公司都放早，我同Joe Office都唔例外，下晝兩點就收工，Joe「我今晚帶Haley返老豆度食飯，聽日我一早過嚟幫手。」「其實冇乜要做，我連買餸都唔洗，Chef Steve有自己個Crew，乜嘢都佢哋帶埋，中午兩點到，除咗Aaron阿成幾個，你仲叫咗邊個嚟？」「Edward，Fred，David，冇啦！有叫Amy同小美，不過唔知嚟唔嚟到。」「差唔多，咁我同Chef講14-15人。」「預多一兩個啦，Lisa可能會帶一兩個新朋友嚟。」「女仔？唔係又係啲老土嘢呀！唔該唔好又做雞仔媒人！」「乜嘢又做呀！Lisa話帶朋友，又冇話要介紹畀你，你唔好亂諗嘢嘅！哈哈！」「你唔好當我儍仔，唔好到時攪到尷尷尬尬！」「到時睇下點先啦！三唔識七，人哋未必嚟。」 

 

到咗禮拜四一早，阿成同小諾先到，幫我手準備，其實有Private Chef好多嘢都唔洗預備，主要係𢴇好屋企放好枱凳，買下小食汽水啤酒，中午我哋三個就去咗University Avenue食Lunch，返到屋企Aaron已經到咗，Aaron有我屋企鎖匙，可以自出自入，Aaron「食Lunch又唔叫埋我。」「你咪又係啱啱起身！阿成一早就過嚟幫手，你仲瞓緊！」「咁我老婆大肚婆要瞓耐啲吖嘛！」Lisa響大廳睇緊日劇木村拓哉嘅冰之驕子，Aaron響客廳另一邊打PS2。大約三點左右，其他人同Chef Steve 陸陸續續嚟到，班女人自己一堆睇劇嘅睇劇，唱K嘅唱K，男嘅就開枱。 

 

Lisa「阿偉，呢係我大學同學Eva，佢一個人響Bay Area，我帶埋佢嚟識下朋友。」禮貌上我點都要招呼「Hello Eva，歡迎你join我哋Party，你隨便得啦，唔好客。」Eva身材高挑瘦削，眼大脣薄，目測起碼五尺八，女仔嚟講非常之高，只係矮我少少，只係冇波冇囉，皮膚蒼白，睇嚟Lisa就係想介紹我哋認識。之後Lisa再一一介紹其他朋友，Aaron「點呀？合唔合眼緣？人哋Columbia畢業，依家讀緊Stanford MBA，屋企響香港做成衣出口，大陸有廠，有興趣就快啲出手，蘇州過後冇艇搭呀！哈哈！」「唔係個個好似你咁淫賤係女都啱！」 



 

Eva好易同人熟，好快佢就同班女仔一齊唱K，Chef Steve就同兩个助手響廚房準備晚餐，Steve係一間響San Francisco Mission District好細間 French Bistro嘅老闆，我認識佢唔夠一年，不過因為成日去食飯大家變得熟絡，今日July 4th都肯幫手Home Cooking，Steve係法國人，煮嘅係傳統法國菜，Steve響廚房忙嘅時候，我哋繼續Party。 

 

有Private Chef幫手，我同Joe就唔洗煮飯，咁就夠腳開兩枱麻將，一枱廣東牌一枱台灣牌，Eva同小諾都鍾意打台灣牌，我就同Edward加埋兩個女仔一枱，Joe Aaron 阿成同David一枱，其他人就唱K睇劇。