一個香港留學生在美國的生活: Phoebe（5）

半夜十二點正，著住T恤短褲，我又再一次出現響Phoebe屋企門口，「嘩，你真係飛車過嚟！」「真係好近，不如等我睇吓乜嘢事先？」Phoebe已經換咗家居服，一件白色T加條短褲，五尺七寸既身材，扎起一頭長髮，露出對40寸白滑長腿，同晏晝個感覺完全唔一樣。 

 

我雖然係呢個Apartment Owner，不過整水電真係唔係我嗰辨，我只係知道洗手盤下面有個水制，不過睇完之後都係唔知點解冇水。「Sorry我真係唔係個花灑水制響邊，睇嚟要等聽日叫工人嚟先攪得掂。」「咁我唯有等有水先沖涼啦！」「咁你要唔要去我度沖？」「咁煩，又要你車嚟車去。」「咁你不如今晚響我度瞓，我有空房，聽日又係星期日，我都唔知搵唔搵到工人做嘢。」Phoebe諗咗陣，「咁等我𢴇兩件衫，你等等我。」 

 

Phoebe帶咗個背囊，都係著返同一套T短褲加對白布鞋，「咦，架Van換咗Porsche？我之前都坐個一次。」「我呢架係Boxster，你上次坐邊一個Model？」「我唔知呀，係我同學嘅，我只係坐順風車。」「男同學？」「哈哈！你有幾多時候見到女仔揸Porsche？」「咁肯定係男朋友。」「除咗Aaron同你，我冇其他男朋友。」我笑咗笑，冇再繼續問，好快就到屋企。 



 

「嘩，你間屋好大好靚，你一個人住？」「係呀，我一個人住，你隨便，拖鞋響左邊鞋櫃，我帶你上房，你沖涼先。」Phoebe好似細路仔咁好興奮四圍望，「沖完涼我再帶你參觀啦，嗱，你瞓呢間房，洗手間響走廊左邊，毛巾洗頭水護髮素沐浴露有齊晒，如果仲有乜嘢要話我知。」「你呢度好似酒店咁！」「哈哈，最緊要你住得舒服。」Phoebe攞咗個背囊去沖涼，我就去衣櫃攞枕頭同被，搬屋到依家呢間房從來冇人瞓過，只係得張雙人床同一張細枱，整理好之後，Phoebe都沖完涼，「阿偉，你有冇風筒？」Phoebe用毛巾擦佢頭長髮，著住件長到落大髀嘅粉藍色T Shirt睡衣，「呀，我屋企得一個風筒，要去我房個洗手間。」 

 

主人房響二樓另一邊，Phoebe 入到去，又嘩一聲叫「你間睡房仲大過我舅父屋企！嘩！張床對住落地大玻璃，個View好正呀！」「有冇咁誇張呀！你舅父間屋都唔細啦！風筒響洗手間，我攞畀你。」我去攞風筒嘅時候，Phoebe去咗我個Walk-in Closet，「我都係睇電視見過咁大嘅衣櫃，我以為拍戲先有，你真係好誇張，你啲衫褲仲多過普通女仔！嘩！好多錶，點解個櫃入面啲錶會轉嘅？。」「因為嗰幾隻錶係Mechanical Watch，要不停咁郁先唔會停，咁樣保養隻錶好啲。唔好睇住，過嚟吹頭啦！」