一個香港留學生在美國的生活: Phoebe（4）

Phoebe雖然住響附近，不過對周圍環境都好陌生，咁又係，佢又唔揸車，靠踏單車同行路，可以去得邊！今晚我帶Phoebe去咗Bistro Elan，一間非常Local嘅法國餐廳，平時禮拜六晚冇訂位就要等好耐先至有枱，今晚好彩得我同Phoebe兩個，加上已經過咗八點Peak Hour，我哋等咗十分鐘就有位。 

 

Phoebe「我第一次嚟呢度，不如你幫我點菜？」 Bistro Elan主打country French cuisine，價錢大衆化，我幫Phoebe點咗個洋蔥湯同鴨胸，我自己就叫咗個Caesar Salad加個Lamb Chop，「你飲唔飲酒？」禮貌上我都先問聲，「我未夠廿一喎，飲得咩？」「係喎，我差啲唔記得！咁我陪你飲其他嘢，Coke？」「唔洗啦，水就得。」最後我都係叫咗杯Sherry Temple畀佢。成餐飯Phoebe食得好拘緊，小心翼翼，「你第一次食French？」「算係掛，平時好少出街食，一係響舅父餐館食，一係舅父響餐館帶外賣返屋企食，最多係響學校附近同同學食下Burger。」「你舅父開餐館？」「係呀，響Menlo Park，不過主要做鬼佬生意，典型美國中餐。」「你同舅父住唔好咩？點解要搬出嚟自己住？」「住舅父屋企始終冇咁方便，不過搬咗出開支真係大咗好多。」「你屋企人響廣州？」「係呀，我媽每三個月寄一次錢畀我，不過都係唔夠，所以要打工囉。」 

 

呢種casual嘅French Bistro上菜快，不過食到Dessert都九點半餐廳要閂門，Phoebe「原來已經咁夜，今日麻煩哂你，呢餐等我請啦。」「邊有要女仔請食飯？不如你𢴇好屋煮飯畀我食，我哋個Deal唔係話你做我嘅女朋友咩？。」「呢個當然啦！」「咁依家埋單，我車你返新屋。」 



 

送完Phoebe返去，我再返自己屋企，做咗成日苦力，第一件事更係沖返個涼先，入到睡房，除咗啲污糟衫，放咗缸熱水，播住Mozart 嘅 Requiem浸熱水浴。我瞌埋眼半俟住浴缸邊，好快就瞓著咗，突然間我畀電話聲嘈醒，「Hello？」「Sorry阿偉，我係咪嘈醒你？」原來係Phoebe打嚟，「Hi Phoebe，我未瞓，你仲𢴇緊嘢？」我睇吓個鐘，啱啱十一點九，「唔好意思咁夜打畀你，我其實已經𢴇得七七八八，啱啱準備沖涼，點知冇水？」「吓？點會冇水㗎！成屋都冇？」「咁又唔係，淨係沖涼個花灑冇水。」「咁奇怪，可能個水制冇開，咁我依家過嚟睇吓。」「真係麻煩晒你，咁夜仲要你過嚟。」「唔麻煩，好近，開車都係十分鐘，你等等，好快到。」