一個香港留學生在美國的生活: Winnie

禮拜日全個下晝都係陪Phoebe Shopping，買完所有嘢已經差唔多五點，送咗Phoebe返屋企我就直接開車去同Joe食飯。今晚一齊食飯嘅兩個都係生意上嘅朋友，男嘅係同我哋一樣做Property，大陸人，女嘅係做投資顧問，主要係幫大陸人投資美國市場。Winnie係香港人，嚟咗美國差唔多三十年，離咗婚仲有個廿歲讀緊大學嘅女，四十歲左右，不過點睇都似三十出頭，細細粒身材皮膚樣貌都保養得好好，基本上成餐飯都係Winnie帶動，餐飯主要目的係介紹我同Joe畀個大陸客認識，幫佢投資南灣房地產。我一響對大陸客冇乜好感，所以成餐飯冇乜反應，反而Joe 就對個Project好有興趣。 

 

「你決定接手呢個Project？」食完飯之後同Joe一齊去攞車，「有錢搵，點解唔做？」「大陸人，都係小心啲好。」「有Winnie睇住，冇問題嘅。」「你同Winnie熟啲，我冇意見。不過睇落個大陸佬好Buy Winnie。」「Winnie除咗個樣，做嘢都好掂㗎，你放心，我會睇住。」 

 

一般來講，夜晚美國大多數地方係冇乜街燈，如果泊停車場，當然唔會有呢個問題，不過如果泊街又冇街燈，有時都幾危險。今晚，我同Joe泊響食飯間餐廳後面嘅細街，Joe就響正餐廳後面個Parking Lot,我就要行多一個Block，Joe「洗唔洗我車你去攞車？」「唔洗，行多兩步就到。」「咁聽日Office見。」 



 

行多兩分鐘搵到架車，正準備開門上車，突然間發覺停響我後面架車傍邊有人踎響地下，睇吓原來係Winnie，「Winnie？你做乜踎響度？」「我跌咗條車匙，黑麻麻又搵唔到！死啦！點開車走呀！」Winnie架車係部黑色Porsche Cayenne，一個女人揸咁大架SUV真係好少有，「等我幫你搵搵。」 於是我同Winnie一齊響地下四圍搵，不過條街好黑，條車匙又係黑色，搵咗好耐都搵唔到，Winnie開始有啲急「點算好？叫人開鎖都冇用，冇車匙點開車！」「你屋企有冇Spare Key？」「有不過一來一回要個幾鐘。」「你住邊區？」「Menlo Park。」「哈哈，我哋係Neighbor！」「你都住Menlo Park？」「咁又唔係，我住Palo Alto，隔離姐，好近！咁不如我車你返屋企先，聽日再攞車，我估條匙可能跌咗響車底，應該搵到。」「唉，冇辦法啦！咁我聽日叫阿女車我返嚟再搵過。」