一個香港留學生在美國的生活: Allison

「咦，你都鐘意Porsche喎。」「男仔鐘意Porsche好普遍，女仔揸Porsche就好少有。」「咁係你識女仔少！」「哈哈！可能係啦！」由Los Alto返上Menlo Park話遠唔遠話近又唔近，半夜冇Traffic都要半個鐘先返到，Winnie所講嘅Menlo Park，其實係響正Atherton隔離，屋價係驚人嘅貴，屋外有圍牆，經過大閘後係有個大噴水池嘅花園，雖然係半夜睇得唔清楚，不過目測呢間豪宅起碼要八百到一千萬，原來Winnie係個富婆。 

 

送到門口，Winnie「要唔要入嚟坐吓？呢個鐘數Allison應該未瞓。」「咁夜唔方便嘅，下次再約啦！」「咁好啦，今唔該晒你，呢個禮拜邊日得閑？我請你食飯？」「唔洗客氣啦，順路車埋你返嚟，舉手之勞。」「咁今晚個Deal都未傾好，我下個禮拜點都要搵你同Joe。」「呢個Project阿Joe一個人自己攪掂，唔洗我。」「咁你都係老闆吖。」「到時再講啦！」 

 

正當我準備走嘅時候，有個著住睡衣嘅女仔開門，「Allison，仲未瞓？過嚟叫Uncle，媽咪唔見咗條車匙，係Uncle車我返嚟。」「嘩！唔好叫Uncle，叫名得啦，我又唔係大你個女好多！咁我走啦，如果聽日攞車有乜問題再Call我！Good night！」 



 

離開Winnie間大宅，返屋企都係15分鐘路程，點知都未入到門口，電話又響「Hello阿偉，唔好意思，咁夜仲搵你。」「唔緊要，我都係啱啱返到屋企。」「我啱啱收到電話，我聽日一早要去三藩市開會，非常之重要，所以我想睇吓你可唔可以車我個女去攞車，因為得你知道架車泊咗喺邊，如果你唔得閒，我可以遲啲先去攞。」「我聽日應該可以，唔好等啦，等陣有人𢴇到條匙偷咗你架車就麻煩。」「咁唔該晒你先。」其實我返工響三藩市，攞車響Los Alto，一南一北，如果唔塞車，都要差唔多個半鐘車程，我竟然神推鬼㧬咁就應承咗，唯有第二朝早同Joe講下晝先返office。 

 

禮拜一朝早唔夠八點，我就返去Winnie屋企接Allison攞車，Allison仲係大學生，響UCLA 主修 Business，仲有一年畢業，依家就響Stanford讀Summer Program,所以佢哋攞完車之後會直接返學校。去到接Allison嘅時候Winnie已經出咗門，睇嚟佢今日個會都好緊要。尋晚太夜，冇乜點留意Allison個樣，今日接佢嘅時候先發現原來係靚女一名，身材高挑，今日著拖鞋都差唔多到我額頭咁高，扎起一頭長髮，眼大鼻高，個胸唔算大，不過條超級短褲加對長腿就足夠我睇到流晒鼻血，皮膚係健康嘅小麥色，估計佢平時應該成日做運動。 

 



「早晨，唔該哂你，咁早就要你接我去攞車。」「唔洗客氣，我自己工，時間比較Flexible。你幾點上堂？」「九點，夠時間先攞車再揸返學。」「你屋企都有好多車喎，車房前面都仲有兩架車。」「啊！架Mini係我嘅，隔離架BMW係我Uncle架車。」「咁早你Uncle泊架車響你屋企？」「佢係我媽咪個男朋友，佢同佢個仔Darren住響我屋企㗎。」「哦！咁點解你Uncle唔車你去攞車？」「佢成日要四圍飛，呢個禮拜去咗Rome，要下個禮拜先返，Darren住Dorm，好少響屋企。」 

 

我同Allison傾下講下，好快就到咗尋晚間餐廳，Winnie架車響響度，我一踎低就已經見到條車匙響車底前軚傍邊。「今次真係唔該晒你，搵到條匙，咁我依家返學先，媽咪話下禮拜再請你食飯。」之後Allison就開車離去。