一個香港留學生在美國的生活: 婚禮（2）

黃昏嘅太陽仍然好猛，外邊氣溫仲係90F，如果有選擇，我係絕對唔會出去嘅，不過呢間酒店餐廳睇落應該好難食，於是我換咗件T恤短褲，開車去附近搵食。Downtown其實有唔少餐廳，尤其是近Old Town，有幾間好出名下，不過最後我竟然返返去我以為成日食嗰間日本餐廳，亦即係以前京子做Part time嗰間。 

 

桃花依舊，人面全非。去到嘅時候發現除咗老闆之外，所有侍應都未見過，咁又係，響度做嘅，多數倞College Student，兩三年換一批都好正常。餐牌菜色冇變，老闆仲認得我，我同樣叫咗Omakase，一個人坐Bar同老闆邊傾邊食。呢個餐飯一食就食咗差唔多三個鐘，埋單嘅時候已經九點，正當我起身準備走，電話響起「Hello阿偉，你依家響邊？我已經食完飯，可唔可以攞衫過嚟？」「可以，我十五分鐘先返到酒店，你響Lobby等我？」「好呀！等陣見。」 

 

我已經唔記得對上一次見到Addie係幾時，應該有兩三年冇見過，估唔到今次再見係響佢嘅婚禮。由日本餐廳開車返酒店十分鐘左右，我入到大堂見到Addie企咗響大堂，Addie個樣冇變，扎住條長馬尾，著住件淺藍色吊帶長裙，身邊放咗兩個大紙袋同兩個大紙箱，「Hello Addie，等咗好耐？」「我啱啱到，唔該晒你，借個地方我放嘢。」「唔好客氣，嘩，你又袋又箱，你一個人點攞？」「你記唔記得我以前Roommate Julie？係佢幫我攞過嚟，我哋兩架車先攪掂。」「咁Julie呢？」「佢返咗屋企，仲有好多嘢要準備，Julie係我Bridesmaid。」「我記得佢，咁多嘢，我幫你搬上房先！」 



 

我住響酒店最高嗰層十四樓嘅Business Suite，係Corner位，有獨立房間廁所，客廳有兩面大玻璃，可以睇哂成個Downtown，算係城中最高嘅建築物之一。「嘩，你間酒店房好大喎，咁我放咁多嘢都唔會阻住你！」「隨便放，衣櫃響睡房左手邊。」Addie掛衫，我就將兩個紙箱放響飯枱，箱入面係啲嘉賓簽名簿，襟花，名牌等等，仲有啲婚紗相。「呢幾張細相係放響門口Reception table，大嗰張先響教堂行禮嘅時候用，之後先送去餐館。」「影得好靚喎，你著婚紗好好睇。」「哈哈，多謝！夜晚有三套衫，掛咗響你房，聽日Julie會嚟攞去餐館。」「我可唔可以睇吓先？」 「當然可以，又唔係乜嘢秘密。」