一個香港留學生在美國的生活: 救場

2004年嘅八月天氣熱到完全唔想出街，最好係響屋企開行冷氣又或者黃昏嘅時候浸響冰涼嘅泳池水入面，可惜現實就係要做，返少日工都唔得。Joe同我各自有Project響手，呢半年發展得唔錯，公司員工增加到六個，不過最幫到手嘅係我個Part Time私人助理Nikki。「老闆，呢個係今個禮拜Schedule，今日有Lunch同下晝三點City Planning Department Meeting, 仲有夜晚有個商會Event要去，唔好唔記得呀！」「我最怕去City開會，Joe呢？叫佢去得唔得？」「大老闆今日全日響South Bay，佢跟緊Winnie個Project，趕唔切返三藩市㗎！」「咁冇計，我去啦。」Joe同Winnie一齊攪嘅Project係一個180個單位響South Bay大學附近嘅Student housing，總投資額35 Million，大陸佬投資，我哋負責Manage, Contractor係另一間公司，對我哋嚟講風險唔大，回報又高，所以Joe大部份時間都放響呢單嘢度。  

 

接近中午，我準備去Downtown食Lunch，今日約咗Banker friend吹水，食完之後直接去City Hall開會，點知突然間收到電話個Lunch 要Cancel，「老闆，Michael個秘書打嚟，話啱啱五分鐘前有條儍佬響銀行打劫，依家個Building封咗，Michael要留低處理。」「又嚟？之前兩個月先打刧過一次，點解咁多儍佬？」「咁我同你Cancel個Lunch Booking？」「反正Book咗枱，你有冇約？冇就我請你食Lunch？」「哈！多謝老闆，不過我朋友12點接我放工，下次先至食！」「又係男朋友？」「男性朋友！」Nikki身邊啲男仔日日唔同，我早就見怪不怪。「得返我一個，咁你幫我Cancel啦，我買件Sandwich做Lunch。」點知話口未完電話又響，Nikki「Boss, 大老闆搵你。」 

 

「你唔係約咗GC傾嘢咩？咁得閑搵我食Lunch?」響美國，GC 係General Contractor簡稱，「你暫時幫睇埋呢個Project, 我今晚同阿爸要飛返香港，可能要幾個禮拜先返。」「發生乜嘢事？要走得咁急？」「我阿嫲中咗風，所以要即刻返去，我阿媽留低睇住Haley。」「吓？咁大件事？嚴唔嚴重？」「醒返不過唔係好講到嘢，話哂成八十歲，所以要即刻返去，呢度要麻煩你睇住。」「講啲咁嘅嘢！你放心返去，呢度我攪掂。」 



 

「咁我洗唔洗同你重新安排呢個禮拜啲行程？」我同Joe收咗線，Nikki好醒目咁即刻問，「要，我聽先去同Winnie開個會交代一下，你同我安排下啦！」「你幾時開學？有冇可能可以多啲時間幫手做多幾個鐘，你都睇到我有幾忙。」「等我過多兩禮拜睇吓功課多唔多先啦，我估應該可以嘅。」「咁今晚個商會Event你可唔可以代我出席？其實Show Up露個面就Ok，你以前都同我去過。」「今晚我得閑，不過我要睇完戲返屋企換過件衫先，我著到咁Casual點得呀！」「醒目女！咁靠你啦！」 




去咗附近間Bakery買咗個三文治，一邊食一邊睇返Joe個Project啲資料，順打俾Winnie，「Winnie，Joe屋企有急事要返香港一段時間，我會接手跟個Project。」「Joe今個朝頭早同我講咗，你聽日有冇時間？不如約過地方見到面再講？」「咁Lunch響Milpitas飲茶？我約埋GC一齊？」「可以，咁聽日見。」