一個香港留學生在美國的生活: 合作

Winnie Office 響Sunnyvale，中午食飯就約咗響Milpitas飲茶，兩個地方距離我屋企都係三十分車程左右，不過同返公司方向就完全相反，所以冇可能先返自己三藩市Office再揸去South Bay，咁唯有留響屋企等到差唔多時間先出門口。其實每日開成大半個鐘先返到三藩市Office都幾煩，如果落雨又或者有交通意外，隨時可以成個幾兩個鐘先返到，放工就更恐怖，長期咁樣真係人都癲，睇嚟係時候考慮下將個Office搬近啲Peninsular。 

 

一早響屋企游完早水做埋Gym，跟著打返Office開會，到十一點半左右出門口，去到餐館都未夠十二點，不過Winnie同個GC就已到咗，「唔好意思，要你哋等我！」Winnie：「阿偉，呢個係阿峰，同Joe合作過好多次。」我同阿峰握手，「我認識阿峰，見過幾次，我哋公司同阿峰合作好多次，不過都係Joe跟嘅Project，非常之多謝阿峰支持。」大家客氣完一輪，就直接進入正題，一講到生意，Winnie嘅女強人本色顯露無遺，我就一路食一路聽，其本上成個Project都係Winnie主導，我哋只係配合。成餐飯食咗三個幾鐘，酒樓老闆又係Joe嘅朋友，雖然我哋只係得三個人，我哋都係用咗唯一嘅Private Room。食到差不多三點，阿峰要早走，Winnie堅持要由佢埋單，「你上次幫我攞返架車我都未請你食飯，今次點可以你埋單。」「你介紹咁大Job畀我哋，等我請啦！」「飲餐茶咁小事都爭，不如約下禮拜食晚飯，我請。」「咁好啦，我唔同你爭，下禮拜我請。」「下禮拜係多謝你幫我攞車，都係我請，就係咁話，將來我哋仲有好多合作。」 

 

好快Winnie就埋咗張單，「下晝有冇嘢做，要唔要嚟我公司睇吓？你好似未去過我Office，次次都係Joe上嚟開會。」「今日唔得啦，我仲有嘢做。」「你唔係諗住依家開車上三藩市？成三點啦喎！上到去都放工啦！」「咁又冇咁癲，不過我今晚約咗朋友食飯，再去你Office會好趕時間。」其實我跟本冇約，只係唔想去Winnie Office應酬，「咁下次啦，合機會多的是，過兩日我再約你下個禮拜食飯。」 



 

送走Winnie，睇吓鐘，差唔多到放工放學時間，Freeway開始塞車，返屋企起碼一個鐘，於是我打畀Aaron「喂，今晚有冇時間食飯？」「唔得呀，約咗Lisa同學一家食，唔得閑陪你。」「加埋我得唔得呀？多我一個唔多。」「我哋講湊仔經，加埋你做乜！你咁得閑點解唔搵Phoebe？」「又係喎，好耐冇見過佢。」「咁你唔好煩我！Bye！」