一個香港留學生在美國的生活: Annabel

「阿偉，唔該晒你，要你幫Aaron攞袋。」「唔好客氣啦！攞個袋咁少小事，舉手之勞姐，係呢，點解得你一個？Aaron呢？」「佢陪BB去做檢查同打針，好快返。」Lisa啱啱生完，面色有啲蒼白，護士將Lisa由手術床搬到去病房張床，交代咗一啲要注意嘅事項同止痛藥，跟著就離開。「咁你休息下先，我坐喺嗰邊睇吓書。」「我ok喎，食咗藥唔係好痛。」「咁你食咗飯未？」「未呀，醫應該好快會送餐。」話口未完，護士就推咗架餐車入嚟，晚餐非常簡單，主菜係Chicken Noodle Soup，麵包加個水果同Jello，「唉！其實我最想係食粥。」Lisa一面無奈，「依家咁夜，買唔到粥喎！」「講下姐，我都知冇得食。」 

 

Lisa睇嚟好餓，三扒兩撥就食晒啲食物，食完晚餐，Aaron同BB返到入房。「恭喜哂！睇吓BB先，好可愛喎！」Aaron滿臉春風，「出世六磅，唔算好大隻，唔洗開刀可以順產。」「改咗名未？」「Annabel。你要唔要抱下呀？」「嘩！唔好啦！我又未抱過BB，等佢大喲先啦！」「Annabel係咪似我多啲呢？」對我呢啲未結婚又係單身嘅人嚟講，啱啱出世嘅BB其實個個都差唔多，跟本睇唔出似阿爸定係阿媽，不過為咗唔好掃Aaron興，我好免強咁話「好似有啲似你！」「乜嘢叫做有啲似，直頭係我餅印啦！」Lisa就只係笑一笑，「阿偉你唔洗陪我哋，我同BB應該後日就可以返屋企，到時你再嚟探我哋啦。」「會唔會擺滿月酒？」「會呀，等埋我阿爸阿媽過嚟，應該係十月尾，你唔好又飛咗去玩呀！」「你放心，十二月前我都唔會出Trip。」 

 

過咗冇耐，Maggie, Dave, Fred, Edward成班朋友都嚟哂，話哂響我哋呢班朋友入面,Annabel係第一個出世嘅BB，我見有咁多人，於是我就同Aaron講我走先，「咁我走先，過兩日出院後我再去你屋企探你。」「定咗邊日滿月酒再通知你，咦，小美都嚟咗喎！好耐冇見啦！你去咗邊呀！次次食飯都唔見咗你！」小美係希客，佢一出現，大家都爭住同佢傾謁，咁我當然唔好意思佢一嚟我就走，結果我又留低Hea多陣，到咗差唔多九點，小美「夜啦，我要走先，你哋慢慢傾，Lisa你返咗屋企我再嚟探你同Annabel。」Aaron「咁早走？呢度可以留到十點㗎喎。」「唔好啦，我仲要Call taxi，我架車攞咗去做Service，我啱啱都係朋友Drop Off我響醫院。」「咁不如叫阿偉查你返去，返正佢都準備走，又住得近。」「冇問題！小美唔介意我可以車佢返屋企。」我好爽快就答應做司機送佢返去。 



 

去咗停車場攞車，「小美你屋企地址係咩？」「唔係好遠，近92同280 Freeway，我話你知點行啦！」其實小美住得一啲都唔近，出咗Freeway仲要行一段山路先到，佢住嗰區叫做Belmont，算係中產區，不過佢就住係山頂最高嗰啲屋，即係最貴嗰啲。「你屋企環境都幾好喎，你父母做Tech？」「唔係呀，我爸爸做航運，香港美國兩邊飛，我媽咪冇做嘢，不過大部分時間響香港。」「咁咪得你一個人響美國？」「咁我仲有個妹響Texas。不過仲未畢業，佢讀Pharmacy,仲有一年先讀完。你呢？你有冇屋企人響Bay Area？」「我都係自己一個，我父母同細佬响Toronto。」我同小美傾下傾下，好快就到佢屋企。