一個香港留學生在美國的生活: 大伯

2004年嘅冬天，我正式升級做咗大伯，除咗Aaron個出世，細佬阿𠎀個大仔響十月初都出咗世，最高興當然係我阿爸阿媽啦，加埋Joanne嘅父母 ，多倫多突然間變得非常之熱鬧，而我，就響啊BB出世當日飛咗去多倫多。 

 

「阿偉，咁快到嘅！今朝八點出世，依家未夠十二小時，你已經到咗！我你響度都係啱啱到！」我一去到醫院，響正門就碰到黃Uncle，「Hello黃Uncle，我尋晚半夜一收到電話，就即刻買機票，我搭九點直航，五點到，San Francisco飛Toronto 其實唔係好遠。」「哈哈！咁又係，你哋後生仔做嘢快，咁一齊上去啦，你知唔知幾號房呀？」「好似係708，應該係七樓。」我同黃Uncle響大堂登記咗之後一齊搭𨋢上去，「你遲咗半個鐘，小詩啱啱走咗。」好耐冇聽到小詩個名，諗返起，都有段時間冇聯絡，係咪應該去搵下人呢？點知黃Uncle跟著講「今次你見唔到佢啦，佢哋一家飛咗去意大利，Ben要去Rome開會，好似要十一月先返。」「哦，我仲諗住見下佢啲小朋友。」「下次啦！幾時到你呀？依家連你細佬都爬埋你頭，有女朋友未呀？」「哈哈！順其自然，順其自然！」 

 

上到病房，阿𠎀一家同四大長老全部響度，我一到打完招呼，就即刻去睇BB，阿爸「Ivan，呢個係大伯呀！」大伯！聽到呢個稱呼，突然間覺得自己老咗好多！係喎，細佬個仔，即係我個侄，我升咗呢喎！望住Ivan個樣感覺就係唔一樣，血濃於水，始終係自己家人，「我可唔可以抱下佢？」我有啲手足無措，「小心啲抱咪得囉！」阿媽笑笑口響張BB床將Ivan抱起，跟放響我手上，啱啱出世嘅BB都係用毛巾包實，得七磅重又唔多郁，其實唔係難抱，玩咗陣，冇耐護士入嚟話Joanne同BB都要做檢查同餵奶，於是除咗阿𠎀留低陪過夜之外，大家都一齊離開。 



 

阿傑陪老婆，我當然要陪阿爸阿媽食飯，Joanne第二日就出院，返咗去自己屋企，佢哋冇請陪月保母，所有坐日月照顧全部由四大長老包辦，我響Toronto住咗兩個禮拜，之後就飛返美國。