一個香港留學生在美國的生活: London (1)

成個十月我都忙住公司Project ，一個禮拜差唔多做足七日，一直忙到Thanksgiving前嗰一星期，Joe終於返咗嚟，我先可以休息下。「我要放下假，後日會去London，可能會十二月先返。」同Office同開完會，我就同Joe講輪到我放假，「無啦啦去London？一個人去？」「係呀，去探朋友順便休息下。」「咁你玩耐啲，返正幾個Project都上哂馬又有同事跟緊，年尾又冇咁忙。」「咁你都多啲休息，有乜嘢可以交俾Winnie。」「Winnie Thanksgiving week都出Trip，算啦，我攪得掂！放心！」於是我放工返屋企𢴇行李，禮拜六出發。 

 

London係我喜愛嘅城市之一，呢個城市會令我聯想起香港，特別係佢嘅雙層巴士同郵筒，音樂，公園，仲有無處不在嘅香港人，我阿爸阿媽九七年之前已經以居英權嘅方式移咗民嚟英國，所以我哋響London係有間屋嘅，每次我過嚟都唔怕冇地方住。 

 

由San Francisco直航London大約11個多小時，抵達Heathrow係朝早六點幾，響機度我瞓咗大部分時間，落機一啲都唔攰，Call咗車直接出London，由機場開車大約四十幾分鐘車程，加埋Monday Traffic，返到去屋企都已經成十點。 



 

十一月尾天氣已經非常之凍，我用密碼打開大門，一股暖氣撲面而來，響門口除低件大褸同鞋，行去廚房，見到一個久違嘅背影仲響度煮緊早餐。我行去後邊雙手圍住佢條腰，跟住響佢嘅頭髮上深深咁吸咗一口氣「估唔到你咁早就嚟到！」「我夠估唔到我message你，唔夠幾日你就出現喺我面前。」「你掛住我呀嘛，我梗係第一時間飛過嚟見你啦！」我雙手開始唔安瞓咁響Heather嘅身上摸嚟摸去，「唔好咁心急好唔好？等我整埋個早餐先啦！」「你咪係我嘅早餐囉，我淨係想食咗你！」「唔得呀，你啱啱落機，唔該你沖咗涼先，你咁污糟邋遢，我走㗎啦！」「好啦好啦，我沖埋個涼先！」 

 

其實響我同Joe開會嗰個朝頭早，一早起身我就收到Heather嘅短訊同我講話Stewart會去香港同中國大陸兩個禮拜，問我有冇興趣去倫敦玩幾日，咁我當然有興趣啦，於是我即日就買機票，交落公司要做嘅嘢，就即刻飛過嚟搵佢。 

 



Heather自從舊年12月搬咗嚟倫敦之後，我同佢耐唔中有交換吓email聯絡，Heather屋企響Mayfair，同我響London間屋住得非常之近，揸車同搭車都係大概20到30分鐘左右，於是我就俾咗佢我屋企大門嘅密碼，叫佢嚟我屋企等我。