女神老細係我女朋友: 第十一章
『上條毛咪，老細啲咁嘅性格，埋身都難啦。』我一路行入大堂一路心入面暗暗回應全叔
老細一入到𨋢就撳咗16樓，然後翹埋雙手咁企埋一邊。
「老闆你.....e個時候帶我上你屋企係.....做咩.....」我終於忍唔住率先打破沉默。
「我見你第一日翻工又OT翻唔到屋企，費事兜嚟兜去，咪請你上嚟過一晚夜。」老細用完全唔係邀請人地上屋企作客嘅語氣回應我。
「多....多謝老闆。」不過我點都要循例講翻句多謝嘅。
好快就到咗16樓，一出𨋢口行兩步就到老細間屋門口，老細個門口仲要係嗰啲指紋辨識門鎖，有錢人係真係唔同啲。
一入到屋，見到個非堂整齊企理嘅客廳，睇落應該係有設計師設計過，因為成間屋嘅間隔同配色都睇落十分協調，總之一睇就知係我e啲普通人住唔起嘅地方。
「隨便坐。廚房有公仔面，肚餓就自便，我入去攞啲衫褲俾你，你一陣放啲污糟衫落洗衣機到自己洗。」講完老細就入咗房。
「哦..」我坐咗係對住電視嗰張梳化。
幾秒後老細攞咗一件tee，一條底褲同長褲出嚟俾我，然後翻咗入房。我拎住啲衫褲入廁所換，掟晒啲衫入部洗衣機，撳咗洗衣加乾衣個制。老細俾我套衫啱啱好fit我，仲估唔到個廁所仲大個我間房。
『點解老細會有男裝衫嘅？』
我睇一睇鐘，原來都差唔多成10點，我先醒起我飯都未食，起身走入廚房睇下有咩食。
一打開櫃筒，哇，我咁大個仔都未見過咁多公仔麵，老細唔係每日放工都係食e啲啊？我跟手打開雪櫃，入面放住一盒盒食淨嘅外賣，仲有幾支啤酒同埋一堆未用過嘅醬料，一睇就知老細平時飯都唔煮下啦。
冇辦法，老細屋企連一樣新鮮食材都冇，唯有淥兩個麵俾自己同老細，叮翻熱幾盒外賣食算。
我將所有野食放晒出廳張茶几，然後膽粗粗咁去敲老細半掩嘅房門。
「老......闆。我煮埋你......嗰份，你肚餓...就出嚟食啦。」
老細打開道門企係房門隔離，打開門嗰下仲索到陣香味，唔通e啲就係傳聞中少女香閏嘅味道？
原來老細翻嚟之後老細已經換咗套衫，一件黑色嘅短袖衫，應該係俾平時啲衫大一個碼，老細著落好似oversized咁，心口同個bra嘅形狀隱約咁見到，仲著埋條傳說嘅真理褲，嗰對白滑無瑕嘅美腿真係睇到我扯扯地，感覺我地而家就好似係同屋住嘅情侶咁。
不過老細都好似意識自己唔應該係個男人面前著到咁，即刻嚇到閂埋門，1分鐘後著翻條長睡褲出嚟，嗰下我都唔知點算，唯有出翻客廳等。
「唔該你.....張志明..」同佢係公司講唔該嗰陣嘅語氣一樣，搞到我都有啲不知所措。
老細一坐低就大大啖咁食起茶几上嘅野食，我估啱啱係公司我俾佢個杯面都唔係好夠飽。
我同老細好快就食晒所有野，我都自動自覺咁收拾好客廳同洗野，老細本來想幫手，但係俾我拒絕咗，然後就翻咗入房。
過咗一陣我聽到廁所有水聲，老細應該係去咗沖涼。
『沖涼？e個咪大好機會探索下老細間屋？仲可以.....』都唔知那來嘅膽量，我開始係老細間屋周圍探索，仲行去廁所嗰面......