其實我咁做已經過晒界,錫完老細之後我頭腦即刻好似清醒翻晒咁,意識到自己唔應該咁做。


望住老細熟睡個樣,我諗起全叔講起老細佢嘅故事,佢係香港無親無故,同埋我今日第一日翻工就對我咁好,突然之間我對眼前e個女仔有一種想照顧佢想保護佢嘅心態,而唔係簡單咁因為佢靚女而想溝佢咁簡單。


「走開啊.......Edward.....」突然老細係被入面用手推開我,好似本能反應咁大力。


正當我以為老細俾我錫一啖而醒咗所以先推開我嗰陣,我睇到老細原來仲合埋對眼,原來係發開口夢,我隨即鬆咗啖氣。




『但係邊個係Edward?』


為免真係噪醒老細,我瞓翻開小小,瞓翻平個人先瞇埋眼瞓覺,廢事老細朝早一起身見到我瞓咁近又誤會我。


第二朝我好早就醒咗,比鬧鐘響嘅時間早半個鐘到,可能唔係自己張床,瞓唔慣。




一起身我立刻醒起我尋晚冇沖涼,見老細未醒,我細細力咁揭開張被,走入廁所沖咗個涼,尋晚放入洗衣機嘅衫都已機乾好晒,我沖完涼就換翻好套西裝。


沖完涼換好衫,我見仲有啲時間就入廚房煮咗兩個面俾自己同老細,拎出客廳放係茶几到,煮完面我就聽到房入面嘅鬧鐘響,幾分鐘後老細就係房到行咗出嚟。


「早晨啊。我煮咗個麵當早餐,你食唔食?」




「嗯....唔該。」老細捽住眼咁點頭,睇嚟都係未瞓醒,隨即老細就入咗廁所擦牙洗面,出翻嚟就坐低食麵,個樣精俾啱先精神好多。


「我想問呢......邊個係Edward...?」我食住麵咁樣問老細。


「你點....知e個名㗎?」老細好似好驚訝我知道e個名。


「你尋晚瞓覺嗰陣......發開口夢.....我無心聽㗎,只係咁啱。。。」


「當冇聽過e個名,佢唔關你事。仲有,出到街叫翻我老闆。」老細又好似變翻平時嘅語氣,好似真係好抗拒e個Edward,我見老細咁,都唔敢再問落去,不過咁樣更加挑起我嘅好奇心。




「係。。。」


食完麵之後我就入咗廚房洗野,出翻嚟老細已經換好衫,化好妝,打梗電話叫全叔過嚟。


「你落樓下阿全到等我先,我攞一攞野同去埋個廁所先。」


我聽老細嘅指示落樓,一落到去就見到全叔企係架七人車外面食住煙咁同我揮手。


「早晨啊明仔,尋晚點啊?冇對阿景霖做啲咩啊嗎,哈哈。」




我當然冇講到廁所發生嘅事啦,講出嚟都尷尬。


「冇啊,上到去食咗啲野,好早就同老闆上床瞓咗。。。」


「同老闆上床?明仔你....」全叔笑住咁望住我。


「係呢全叔,你知唔知邊個係Edward啊?」我急忙打斷全叔。


「咦?你又知個Edward嘅?」全叔將煙頭純熟咁彈入面前嘅煙灰缸。