女神老細係我女朋友: 第二十三章

三分鐘前•張志明


「先生請問你係？」老細屋企樓下大堂保安幫我開門之後問我。


「我嚟探人㗎16樓黃小姐。」我話都未講完就沖咗入𨋢。


「先....」






係𨋢入面我一直都諗梗一陣見到老細要講啲咩，雖然我翻咗工唔夠一個禮拜，但係老細對我咁好，我係佢背後講埋啲咁嘅嘢，我真係好仆街。


話咁快就到咗16樓，我踏出𨋢，行到去老細屋企門口，鼓起勇氣撳門鐘。


「~叮噹~」






隔咗幾秒之後我聽到開門聲，e一刻嘅我仲緊張見工嗰日。


打開門後，老細企咗係到，著我同我嗰晚係到過夜嗰陣一樣嘅衫，睇到佢條真理褲加，我不自覺咁呑咗啖口水。睇老細個樣似啱啱沖完涼，因為我留意到個頭仲有啲濕，應用係未吹乾就停咗。


「老闆，我......」






「入嚟先講。」老細佢用翻一貫嘅語氣叫我入屋，然後我地隔住咗咁坐咗係梳化。


「老闆我今次上嚟係同你道歉㗎。」


「道咩歉？」


「尋日你聽到我同細強講嗰啲嘢呢.......我冇心㗎係.......只係太攰又OT，所以先同佢呻下........」


「唔梗要，翻工有啲抱怨正常嘅，不過唔洗特登上嚟同我講啊，有咩咪what’s app我囉，你有我電話，再唔係翻工嗰陣敲門入嚟講聲咪得。」老細嘅語氣都係冇變。






「唔係啊........老闆，我試過......但係你都冇應到。」


「可能我e兩日忙卦，係房聽唔到你敲門，what’s app都遲啲先覆到。」我聽得出老細仲係嬲梗我，不過我今日點都要氹翻好老細！


「仲有全叔同阿Sam都同我講過啦，你卜咗位想聽日同我食飯多謝我，仲有你幫我講好說話，話我份proposal做得好，叫阿Sam照住我，明明我嗰晚就對住個客講得好差。。。」


「我突然聽日有野做，個booking我叫阿全同我推咗啦，仲有我只係覺得你份proposal做得唔錯先叫阿Sam睇住你，你翻工冇幾耐，又做得下野，我先見佢照顧下你，冇咩特別理由。」


『死啦點算啊，老細佢仲好似好嬲我咁，講啲咩好啊，快啲諗啦張志明！』






「老.......」


「冇咩事啦嗎，我入房做啲嘢就瞓，麻煩你離開，唔送。」老細窒停咗我想講嘅嘢，然後起身走入房。


其實我點解會對老細咁執著？明明老細發爛渣好正常姐，我打工仔受氣係正常㗎，做咩我要咁在意佢點諗，咩感受呢？


我諗起全叔講老細係香港無親無故，諗起細強講老細連係公司都冇乜朋友，諗起嗰晚偷錫老細嗰種想保護佢嘅心情。


我確信e一刻我係愛上咗老細。






愛上咗e個係我面前叫黃景霖嘅女仔。


「黃景霖！」我捉住老細隻手叫停咗佢。