女神老細係我女朋友: 第二十四章
「做，做咩啊？」老細擰過頭埋嚟驚訝咁望住我，睇嚟老細俾我突然捉住佢隻手同埋叫佢全名嚇親。
「我......我真係好對唔住啊。老闆....你，你俾個機會我補償翻你啊！」我開始感覺到個頭有啲慶。
「俾個機會你......補償？」
「我想......我想。俾我用成世嚟補償你啊！」我究竟點解會諗到e句。。。
「成.....世？」
「我做埋啲嘢搞到你咁唔開心，唔用翻成世嚟照顧住你對我嚟講唔算補償！」我開始感到面紅，我甚至唔敢望老細塊面。
「張志明？！.......我。。。」我見到老細驚訝咁登大對眼，隱約留意到老細開始面紅。
「請，請你做我女朋友啊，老闆，請你你俾我照顧你一生一世啊，我以後都會對你好好，唔會再講任何令到你唔開心嘅嘢，唔會再令你感到孤獨，一直係你身邊陪住你！」大概係我成世仔最勇敢嘅一句，我面紅耳熱咁樣同老細講咗出嚟。
「我......我.......」我見到老細開始眼濕濕，抖氣開始急促起嚟，好似就想喊咁。
『做啲野啦張志明，你係咪男人嚟㗎！』
我即刻係梳化起身行過去攬住咗老細，而老細都將個頭埋係我心口，雙手捉實咗我件衫，開始認唔住喊咗出嚟。
「我以為.........嗚..........我以為你...嗰日..........會.....憎.......憎咗我..........嗚......雖然我淨係........嗚........淨識咗你......幾日..........但係.....從未試過......有人試過.......好似你咁.....對我咁好.........因為.......我.....嗚......唔想.......唔想冇咗你........我........好驚啊.........嗚......」老細一路喊住咁講我感覺到老細嘅眼淚開始整濕我心口，我攬得更加實。
「放心，只要你想，我會一直都係到，對你好，照顧你一世。」我一隻手摸住老細個頭一路講。
老細冇應到，只係攬住我喊，我都冇講到野，只係攬實佢。
『我要照顧好佢，一生一世都陪住黃景霖』
經過咗唔知幾耐，老細嘅呼吸開始慢落嚟，佢抬高個頭眼濕濕咁望住我，而我都望住老細。
e一刻嘅眼神接觸，唔再係尷尬或者感到奇怪，我只係感覺到我好愛我攬住嘅e個女仔。
「你頭先講嘅........係咪.......認真....」老細dup低翻個頭，捉咗我心口濕晒嘅衫細細聲問我。
「我點會對住老闆你講大話呢。」我用安慰嘅語氣摸住老細個頭同老細講。
「都話過......係到.......叫我景霖......」我聽到老細笑咗聲然係頂住我心口細細聲咁講。
「HEHE，咁姐係景霖你唔再嬲我應承做我女朋友啦，係咪？」
景霖佢咩到冇講，只係抬高頭錫咗我一啖，我有啲驚訝到擘大咗眼，不過同時我都好開心，我諗我成世人都好耐未試咁開心。
我突然聽到門外面有腳步聲。
「等我嚟。」我輕輕放開景霖坐低係梳化，走過去開門睇下邊個係到。
「全叔？！」我打開門後同景霖同時叫出，因為全叔就企咗係門後面，個姿勢就好似隔住道門偷聽梗咁。
全叔見我發現咗佢，即刻企翻好個人。
「我啱啱講嘅嘢......全叔你聽到晒啊.......?」我有啲尷尬。
「唔知呢~阿明仔你同景霖啱啱講過啲咩真係唔知啊，我就諗住上嚟借廁所嘅順便睇吓你走未使唔使我車你，不過唔急lu突然間，你都唔洗坐車啦，冇咩事全叔走先啦，拜拜~~」全叔笑住咁轉個身就入咗𨋢。
『全叔真係啊，唉』我不禁心中暗嘆，不過同時又覺得幾好笑。
我轉過頭望住坐係梳化嘅景霖，互相望住咁笑住，景霖都抹乾咗眼。
笑完之後，我行過去景霖面前，托起佢下巴，錫咗佢一啖。
「我愛你。」我輕聲講出。
今次唔再係偷錫我老細。
今次，我係錫我嘅老細女朋友。