出奇地,第二朝景霖竟然早過我起身,仲要唔洗鬧鐘叫都醒咗,我起身嗰陣,景霖已經梳洗完,換好衫化梗妝,可能係尋晚搞完之後瞓得好啲掛。


「早晨啊,懶瞓明,hehe。」景霖係鏡到見到我醒咗,就行埋嚟錫咗我啖,然後坐翻埋枱化妝。


「嗯.......早...晨。」我睡眼惺忪咁樣應景霖。


我仲未清醒,回想起尋晚同景霖嘅事,一切都好似發夢咁。不過我睇一睇手機,原來時候都唔早,我即刻起身洗個面換好衫,啱啱好景霖都搞掂好晒出得門口,我著好鞋就同景霖拖住手咁落樓下,全叔都係車外面食煙等梗我地。




「早晨啊景霖,明仔。」全叔一見到我拖住景霖落嚟,就同我單咗下眼,好似知道晒發生咩事咁,我都唔知應唔應全叔好。


翻到公司樓下,同樣地,我同景霖都係前後腳上去,景霖上去先,我順便去買個早餐。


翻到公司,我電話what’s app響起,係我阿媽。




(阿媽:阿明,你尋晚冇翻屋企啊?)


(我:係啊,你翻咗嚟啦?)


(阿媽:今朝一早翻咗啦,你去咗邊到瞓?)




(我:去咗女朋友到囉。)


(阿媽:係喎,幾時帶個女朋友仔上嚟食飯先,就今晚啦,我一陣落街買餸。)


(我:都要睇下佢得唔㗎。)


(阿媽:聽日又紅日,一定得啦,就咁話啦,唔阻你翻工啦。)


除咗全叔外,阿媽係第二個知我拍梗拖嘅人,雖然具體我只係係電話入面提過一兩次我有女朋友,但係估唔到阿媽咁好記性,無辦法啦,阿媽叫到,唯有問下景霖佢。




「老闆。」我行去景霖房敲門。


「入嚟。」景霖用翻老細嘅語氣答我。


「今晚呢,我阿媽話想見你喎,你得唔得閑上嚟食個飯啊?」我見景霖拉埋咗百葉窗,就行近景霖細細聲問佢。


「伯母想今晚見我?」景霖都細細聲咁應翻我,但係有啲驚訝。


「都得嘅,遲早都要見下伯母㗎啦。」




「好啦就咁話啦,放工樓下全叔到等啦。」我同景霖就好似傾秘密咁樣竊竊私語,驚出面嘅同事聽到。


「知道老闆。」


「出去做野啦。」


我臨出房前錫咗啖景霖,景霖都笑得好似個細路女咁開心。


放工後,我率先搞掂晒手頭上嘅野落咗去先,景霖隔咗幾分鐘後都落到嚟。




因為景霖話想買啲嘢送俾阿媽,所以全叔係景霖屋企附近嘅商場放低我地。


「買咩俾伯母好呢?」景霖橋實我隻手,一路行商場周圍望,我隻手食晒景霖波餅,搞到我都有啲專心唔到。


「冇所謂啦,阿媽好隨便㗎姐。」


「唔得,我第一次見伯母,梗係要留個好印象啦,話晒我都係你未來.....」景霖欲言又止。


「未來咩啊?」我搣咗一下景霖塊面望住佢問。




「你話呢,hehe」景霖笑住咁搣翻我塊面一下。


「張志明?」突然我地後面有人叫我個名。