女神老細係我女朋友: 第三十章

我同景霖一齊擰轉頭睇下係邊個叫我個名，係個女仔，仲要個樣唔錯嗰隻。


「你係......？」我睇住眼前嘅女仔，完全醒唔起係邊個嚟。


「我啊，Sandy啊，你中學同學呢，住你附近㗎呢。」


「Sandy......?哦！原來係你。」我忽然記起我中學的確有個叫Sandy嘅人。







「你唔係中五嗰陣去咗外國咩？」


「係啊，而家讀完翻嚟香港啦，同女朋友行街啊？」


「係，係啊。」我初頭有啲猶豫，但係我見佢又唔係我公司嘅同事，知道咗都冇乜所謂，所以我捉住景霖隻手講。







「好啦唔阻你地啦，我都約咗人啊，拜拜。」


「拜拜。」


「個Sandy邊個嚟㗎？」景霖抬高頭問我。






「佢可以話係我中學時期為數唔多嘅朋友，因為嗰時我地住得好近，所以成日一齊翻學，佢唔提個名真係唔記得佢。」


諗翻起Sandy個樣，真係變化好大，已前戴眼鏡又唔識執個樣嘅學生妹竟然變到而家亭亭玉立，真係女大十八變。


「哦~」唔知點解，景霖更加橋實我隻手。


行咗一陣街，景霖最後決定咗買盒朱古力俾我阿媽，唉真係唔知景霖諗咩，行咁耐買盒朱古力都有，不過算啦，阿媽都唔會在意e啲形式上嘅嘢。


翻到屋企，我攞出鎖匙準備開門。






「好緊張啊我。」景霖捉住我開門隻手。


「唔洗驚喎，我阿媽份人好隨意㗎咋。」我摸摸景霖個頭安慰佢然後打開門。


「阿媽翻嚟啦。」我同景霖入到屋除咗鞋之後，幫景霖擺好對鞋。


「我都聽唔到你翻嚟tim。快啲介紹你女朋友俾阿媽識。」阿媽係廚房到一路抺手一路行出嚟。


「你好啊伯母，叫我景霖得㗎啦，小小意思。」景霖捉實我隻手fing咗一fing示意我攞盒朱古力出嚟。






「嗱景霖買俾你㗎。」我係袋到攞盒朱古力出嚟遞俾阿媽，搞到成件事好似我送禮咁。


「多謝景霖，阿明招呼住景霖先，我入廚房煮埋啲餸，就食得飯㗎啦，你一陣入嚟幫手攞嘢啊。」阿媽望住景霖接過我遞俾佢盒朱古力放低係枱，就翻入廚房。


我帶景霖係梳化坐低咗之後就入廚房幫阿媽。


「衰仔好野喎，溝個女朋友翻嚟咁靚女嘅。」阿媽一路裝飯一路同我講。


「係咁上下啦你個仔，哈哈。」老實講，追到景霖都可以話係我人生一大成就。






「食得飯啦。」我同阿媽一齊拎啲飯餸出去客廳。


「係呢，景霖啊，你做咩㗎？」阿媽啱啱開始食飯就迫不及待咁問景霖。


「我係，阿明同事嚟㗎。」景霖有啲口窒窒咁講，睇嚟佢真係幾緊張。


「佢係我老.....啊。」


「我同阿明同一group嘅同事嚟。」景霖窒停咗我，係枱底搣咗一下我大脾，示意我收聲。






一路食飯，阿媽問咗景霖好多問題，而景霖都好似唔再係咁緊張，但係對答方面都係好似個細路女咁，不過我阿媽又好似配合到佢咁，兩個女人係到一唱一和，我都唔知點插嘴。


食完飯後，我打電話叫全叔落樓下車景霖翻屋企，我就送景霖落樓下。


「翻去早啲沖涼瞓覺啦。」我錫咗啖景霖然後送佢上車。


「我想幾時瞓就幾時瞓，hehe。」景霖係車到扮咗個嬲嘅樣出嚟。


「係嘅係嘅老闆，唔該全叔。」我同全叔同景霖道別之後，全叔就開車送景霖翻去。


翻到屋企後我沖咗個涼，入房攤咗係床，攞起手機what’s app景霖。


正當我打開what’s app嘅時候，有個未知電話sd咗句Hi嚟。