女神老細係我女朋友: 第八十二章
自從呢件事之後，我同Sandy都有繼續落商場傾野，但我都有同景霖坦白咗成件事，雖然佢都有少少呷醋，但每次都俾我用糖水氹返佢
Sandy搵明星做一日店長活動，再加上我地將清潔過程公開，令到唔少市民對我地有返信心，人流都回復達標次數。
「老細，我地得到咗啦」Ada好興奮咗揸住報紙沖入景霖間房
原來商場上咗香港十大必去商場排行榜第一名
「好嘢呀！」景霖大聲到我係出面都聽到
「各位同事！我地成功咗啦」Ada大聲宣布
「我地終於得咗啦」一眾同事都好感動
「係呀」
「唉，呀明我地得咗啦」細強係我隔離感動就黎喊出嚟既樣
「係呀」我拍咗細強膊頭一下
「張志明！同我一齊去長誠集團」景霖好心急跑出門口
「嗯？好呀！黎啦。」我都有啲反應唔切
——————————————
下晝，長誠集團CEO房
「Uncle，呢份就係商場呢兩個月黎既報告，咁我地呢兩個月嚟就......」景霖好詳盡咁將份報告講俾uncle聽
「放心，我都會信守我嘅承諾，注資入妳間公司」
「多謝你呀Uncle，咁你幾時會注資呀？因為公司都急需」景霖好擔心，因為公司真係就黎捱唔住
「放心啦，一陣間我會同銀行講注資金入瀚霖集團，同埋係美國發放注資消息，」
「嗯，好多謝你呀uncle，咁我返去準備一下先」景霖同我打算離開
「咪行住先，我仲有啲嘢要同妳講」
「咩事呀uncle？」
「話說早排商場係咪有兩個大品牌舖頭想轉間大啲嘅鋪既？最後件事圓滿解決咗係咪？」究竟Uncle想同我地講啲咩，我唔太明白
「係呀，當時係Ada解決咗呢件事呀嘛，唔係咩？」景霖反問Uncle
「其實當時係妳阿媽係美國返黎解決咗我同呢兩個品牌既紛爭，如果唔係佢我諗呢兩個品牌應該提早解約走咗」
「下，阿媽佢......」景霖個表情好愕然
「仲有好多好多問題其實係妳阿媽係背後解決，雖然妳阿媽冇話比你聽，但係我都想比你知道阿媽其實都好緊張妳」
「咁知唔知阿媽去咗邊呀？」景霖聽到呢度已經好想轉身走離開
「妳阿媽搭4:30機返美國.......」
「唔該你uncle！」景霖一聽到就轉身跑出房